Yone 5

Yesu udi ushikisha disama dia muntu mu Yelushalema dituku dia Lumingu

1Hakashika malu â, disanka dia Bena Yuda diakadiku; Yesu wakaya ku Yelushalema. 2Mu Yelushalema, hehi ne tshibuelelu tshia mikoko, mudi mpokolo wa mai a kuowa, udi Bena Yuda babikila ne, Beteseda, wakadi ne bitanda bitanu. 3Mu bitanda amu muakadi mulale tshisumbu tshia bakadi batekete ne bafofo ne balema ne banyane. [ 4]#Bantu bakuabo ba kale bakabuesha nvese—nunku: Bia; Bakadi bindila kuvuandulula kua mai; 4 bualu bua muanjelo wa Nzambi wakadi ne tshilele tshia kubuela mu mpokolo ku musangu ne ku musangu, wakavuandulula mai. Hakavuandululeye mai nunku, muntu yonso wakadianjila kubuelamu wakondahibua; disama dionso diakadiye nʼadi diakashika. 5Muntu wakadimu ne disama dia matekete bidimu makumi asatu ne muanda mukulu. 6Hakamumona Yesu mulale, hakamanyeye ne, Yeye wakadi mu bualu ebu musangu mule, wakamukonka ne, Udi musue kuondahibua, anyi? 7Muntu musame wakamuandamuna ne, Mukelenge, havuandululabo mai, tshiena ne muntu wa kumbuesha mu mpokolo; hantshidi nya, munga udi umpita ku mpala. 8Yesu wakamuambila ne, Bika, ambula bulalu buebe, endaku. 9Muntu wakakoleshibua lukasa, wakambula bulalu, wakenda. Dituku adi diakadi dia Lumingu lua Bayuda. 10Bena Yuda bakambila wakondahibua ne, Lelu ndituku dia Lumingu, kutuala bulalu buebe kudi kushiha mukenshi. 11Kadi yeye wakabandamuna ne, Wakungondaha wakungambila ne, Ambula bulalu buebe, endaku. 12Bakamukonka ne, Nganyi wakukuambila ne, Ambula bulalu buebe, endaku? 13Wakondahibua kakamanya wakamukolesha; bualu bua Yesu wakumukaku, tshisumbu tshia bantu tshikala ha muaba au. 14Hashishe Yesu wakamusangana mu ntempelo, wakamuambila ne, Mona, wakukola; kuenji bualu bubi kabidi, bua dikenga ditambe kadilu kûdi. 15Muntu au wakumuka, wakambila Bena Yuda ne, Wakankolesha udi Yesu. 16Bua bualu ebu Bena Yuda bakatatshisha Yesu, bua yeye wakenza malu â dituku dia Lumingu. 17Kadi Yesu wakabandamuna ne, Tatu wanyi udi ukuata mudimu tô ne katataka, ne meme kabidi ndi ngukuata. 18Bua bualu ebu Bena Yuda bakatamba kukeba mua kumushihabo, bua yeye wakashiha mukenshi wa Lumingu, ne bua wakubikila Nzambi ne, Ntatu wanyi, udivuisha muomumue ne Nzambi.

Yesu adi wambila bantu malu andi ne a Tatu wandi

19Yesu wakabakudimuna dî ne, Bulelela, bulelela, ndi nuambila ne, Muana kena mumanye mua kudienzela bualu, utu wenza anu budiye umona Tatu wandi wenza; malu onso adi Tatu wenza Muana utu wênza muomumue. 20Bualu bua Tatu udi musue Muana, udi umulesha malu onso atshidiye wenza; yeye neamuleshe malu a kukema matambe â, bua nuenu kukema. 21Bu mudi Tatu ubisha bafue, ubaha muoyo; nunku kabidi Muana udi uha badiye musue muoyo. 22Tatu kena ulumbuluisha muntu, kadi yeye wakuha Muana bulumbuluishi buonso, 23bua bantu bonso batumbishe Muana bu mudibo batumbisha Tatu. Udi kai utumbisha Muana kena utumbisha Tatu wakamutuma. 24Bulelela, bulelela, ndi nuambila ne, Unvua dî dianyi, witabusha wakuntuma, udi ne muoyo wa tshiendelele, kena ulua ku tshilumbu, wakumuka mu lufu, wakubuela mu muoyo. 25Bulelela, bulelela, ndi nuambila ne, Diba nedilue, didiku katataka mene, diunvua bafue dî dia Muana wa Nzambi; badi bunvua nebikale ne muoyo. 26Bu mudi Tatu ne muoyo munda muandi, nunku yeye wakaha Muana kabidi bua kuikaleye ne muoyo munda muandi; 27yeye wakamuha bukokeshi bua kulumbuluisha, bualu bua yeye udi muana wa muntu. 28Kanukemi bua bualu ebu; bualu bua diba nedilue diunvua bonso badi mu nkita dî diandi, 29nebajuke; bakenzenza bimpe nebajuke mu dibika dia muoyo, bakenzenza bibi nebajuke mu dibika dia dihila. 30Meme nkayanyi tshiena mumanye mua kuenza bualu; ndi ndumbulula bu mundi ngunvua; ndi ndumbulula biakane, bua tshiena nkeba kuenza bu mundi musue, ndi nkeba kuenza bu mudi wakuntuma musue. 31Binadiamba, dî dianyi kadiena dijalama. 32Udi ungamba nmukuabo; ndi mumanye ne, Budiye ungamba mbulelela. 33Nuenu nuakatuma bantu kudi Yone, ne yeye wakujadika bualu bulelela ne kuamba kuandi. 34Tshiena ngangata dijadika dia bualu buanyi kudi muntu; kadi ndi ngamba malu â bua nuenu kusungidibua. 35Yeye wakadi muinda utema ukenka; nuenu nuakitabusha bua kusanka mu dinkenka diandi musangu. 36Kadi tshimanyinu tshindi nʼatshi tshidi tshitambe dî dia Yone, bualu bua malu a kukema akumpa Tatu bua meme kuenza, malu antshidi ngenza mene, adi angamba ne, Tatu wakuntuma. 37Tatu wakantuma waku ngamba kabidi. Kanuena banze kunvua dî diandi tshikondo tshimue, kanuena banze kutangila mubidi wandi. 38Kanuena ne dî diandi dishala munda muenu, bualu bua kanuena nuitabusha wakatumeye. 39Nudi nukeba kujingulula malu adi mafunda mu Mukunda wa Nzambi, bua nudi nuelangana meshi ne, Mu malu â tudi ne muoyo wa tshiendelele; malu au kabidi adi angamba; 40kanuena basue kulua kundi bua nuenu kuikala ne muoyo. 41Tshiena nkeba kuangata butumbi kudi bantu. 42Kadi ndi munumanye ne, Kanuena ne luse lua Nzambi munda muenu. 43Nakulua mu dina dia Tatu wanyi, kanuena nungitabusha; biadiluila mukuabo mu diandi dina, nenumuitabushe. 44Nuenu, badi batumbishangana, badi kabai bakeba butumbi budi bufuma kudi Nzambi nkayandi, nudi bamanye mua kuitabusha munyi? 45Kanuedianganyi meshi ne, Meme nenubande ku mesu kua Tatu; mukuabo udiku, Mose mene, unudi beyemene, yeye neanubande. 46Bu nuenu bitabushe Mose, nuakadi kungitabusha meme, bua yeye wakafunda bualu buanyi. 47Binuikala kanui nuitabusha malu akafundeye, nenuitabushe mei anyi munyi?

Currently Selected:

Yone 5: TSH

Highlight

Copy