Sira 50
50
Simone mutuangaji munene
1Simone, mutuangaji munene, uvua muana wa Onyase,
uvua mulongolole nzubu wa Mvidi Mukulu patshivuaye panu,
kulongololaye muaba wa tshijila.
2Yeye ke uvua mutuadije bitaku bia bimana bile bia nzubu wa Mvidi Mukulu,
ne tshia lupangu lua nzubu awu.
3Mu tshikondu tshivuaye mutuangaji munene,
bavua bumbula tshiina tshia mayi tshinene,
bunene bu bua luesu lunene lua tshiamu tshikunze,
luvua mu nzubu wa kale wa Mvidi Mukulu.
4Bu muvua Simone musue kuepula bantu bende ku kabutu,
ke pavuaye mukoleshe tshimenga ne bimana bua baluishi kubabuedi nansha.
5Pavuaye upatuka mu muaba wa tshijila menemene,
ukosolola mu nzubu wa Mvidi Mukulu, uvua umueneka ne lumu lunene!
6Uvua bu mutotu wa mu dinda udi ukenka mu mavuba,
bu ngondu pakadiye mumane kubulunga
mu matuku a tshibilu tshia Dipita dia Maweja-Nangila,
7bu diba ditokesha nzubu wa Muena Kulu,
bu muanza-nkongolu ubalakana mu mavuba,
8bu tshilongu tshia rose mu mvulambedi,
bu tshilongu tshimpe tshipite bikuabu
tshidi tshimena pabuipi ne mpokolu wa mayi,
bu mitshi ya mu Lebanone mu matuku a luya,
9bu musenga wa kamonya udi upia pa tshilambuilu
bu dibungu dia mpawungi,
dilengeja ne mabue a mushinga mukole a mishindu yonsu,
10bu mutshi wa olive mukuama bimuma,
bu mutshi wa siprese udi mutumbuke mulu.
11Pavua Simone uvuala muntumpu wa mutuangaji munene ne bilengejilu bia muanzu wende,
ubanda ku tshilambuilu bua kulambula Mvidi Mukulu,
uvua ne butumbi bua bungi mu nzubu wa Mvidi Mukulu.
12Pavuaye muimane pamue ne mbabula wa tshilambuilu,
uvua wangata milambu kudi batuangaji,
batuangaji nende bamuele munkatshi,
bu mitshi ya sedre ya mu Lebanone,
bamunyungulule bu mitshi ya mabue a ngaji.
13Batuangaji, ndelanganyi ya Arone, bavua bonsu muaba awu,
bavuala bilamba bibalakana,
bavua bakuata mulambu wa Maweja-Nangila mu bianza biabu,
bimana kumpala kua bena Izrayele.
14Simone uvua ukumbaja midimu ya butendeledi,
ulongolola mulambu wa Mvidi Mukulu Muena Kulu,
muena bukole buonsu, pa tshilambuilu.
15Uvua wolola tshianza wangata dikopu,
wela nwinyo mukunze tetetee,
umumiamina kuinshi kua tshilambuilu.
Ke mulambu wa muenya muimpe
uvua usankisha Muena Kulu, Mukalenga wa buloba bujima.
16Diba adi, batuanganji bavua bela tunkunduluila, bela mpungi ya tshiamu,
bavua bela mbila mikole, bua Mvidi Mukulu kuvuluka bantu.
17Diakamue bantu bonsu bavua biname, batua mpala panshi,
bua kukukuila Maweja-Nangila muena bukole buonsu,
Mvidi Mukulu Muena Kulu.
18Pashishe bena misambu bavua bimbe misambu mimpe,
mu nzubu wa Mvidi Mukulu ne diyi dikole.
19Bantu bavua batekemena Maweja-Nangila, Muena Kulu,
batendelela Muena Luse,
too ne muvua mudimu onsu wa kutendelela ujika.
20Nanku Simone kutuluka ku tshilambuilu,
kuelaye bianza kulu,
pa mitu ya bena Izrayele,
bua kubela lupemba mu dina dia Maweja-Nangila.
Ke muvuaye ne lumu lua kutela dina dia tshijila dia Maweja-Nangila.
21Ke bonsu kutua mpala panshi tshiakabidi,
bua Muena Kulu abeele lupemba.
Kulombela bantu lupemba kudi Mvidi Mukulu
22Kadi mpindiewu, elayi Mvidi Mukulu muena bukole buonsu tuasakidila,
yeye ke udi muenze malu a dikema miaba yonsu.
Ke udi mutusangule biangatshile ku buana buetu,
udi utuenzela amu mudi luse luende.
23Atusankishe mu mioyi yetu,
atupe bupole patutshidi ne muoyi,
ditalala dikale amu muvuadi mu Izrayele kashidi!
24Luse luende luikale kutudi,
atusungidile matuku onsu atudi tusomba panu!
Bisamba bisatu bidiombola
25Kudi bisamba bibidi bidi muoyi wanyi udiombola,
kadi tshisatu tshiena mua kutshibala bu tshisamba to.
26Ke bantu badi base pa mukuna wa Seyire,
pashishe ne bena Peleshete,
ne bantu batshimbakane badi basomba mu Shekeme.
Mufundi wa mukanda ne mukanda muine
27Meme Yezu, muana wa Sira, muikulu wa Elazare wa mu Yerushalayime, ndi mufunde mukanda ewu ne malongesha, muwule ne meji ne dimanya ditue. Ndi mufundemu bionsu bindi mumanye, ne bionsu bindi mumone. 28Muntu udi ulonga misangu yonsu malongesha aa, mmuena diakalenga, yonsu udi ulama malu aa munda muende neikale muena meji! 29Bualu yeye mukumbaje neikale ne muoyi mukole mu bionsu bidi bimuenzekela, bualu padi muntu utshina Maweja-Nangila, udi upeta muoyi.
Currently Selected:
Sira 50: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996