Matayi 6

Nuambuluishe bapele

1— Dimukayi: kanuenji malu enu mimpe bua mesu a bantu, bua kunumonabu. Nuenu benze nanku, Tatu wenu udi mu diulu kena unufuta to.

2— Nanku paudi wambuluisha bapele, kukebi bua bantu bakumone bimpe. Bena mpala ibidi badi benza nanku mu nzubu ya kutendelela ne mu misesu. Badi bakeba amu bua bantu babatumbishe. Ndi nnujadikila bulelela ne: mbamane kupeta difutu diabu. 3Kadi wewe, paudi wambuluisha bapele, enza mushindu udibu kabayi mua kumanya nansha kudi mulunda webe menemene. 4Nanku diambuluisha diebe dikale dia mu musokoku. Mvidi Mukulu, Tatu webe, udi umona biudi wenza mu musokoku, neakufute.

Munudi mua kutendelela

(Luk 11.2-4)

5— Panudi nutendelela, kanuenji bu bena mpala ibidi to. Mbasue kutendelela, bimane mu nzubu ya kutendelela, ne mu masangu a njila,#6.5 Bena Yuda bavua batendelela meba ne miaba bibafundila. Kadi bena Yuda bakuabu bavua batendelela kabidi miaba ivua bantu batuilangana, bua bantu bamone disuminyina diabu mu malu a Mvidi Mukulu. Fuanyikija ne Luk 18.10-14. bua bantu bonsu babamone. Ndi nnujadikila bulelela ne: mbamane kupeta difutu diabu. 6Kadi wewe, paudi musue kutendelela, ubuele mu nzubu muebe, winjile tshiibi, utendelele Tatu webe, udi kayi umueneka ku mesu a bantu. Nanku Tatu webe udi umona biudi wenza mu musokoku, neakufute.

7— Panudi nutendelela, kanuambi meyi mapite bungi, bu mudibu benza kudi bantu ba bisamba bikuabu. Badi bela meji ne: bua Mvidi Mukulu atuteleje, anu tuetu bambe meyi mavule. 8Kanubidikiji to. Bualu Tatu wenu Mvidi Mukulu mmumanye bionsu binudi nabi dijinga, diambedi kanuyi banji kumulombabi.

9Nutendelele mushindu ewu:

“Tatu wetu udi mu diulu,

dina diebe dia tshijila ditumbe;

10Bukalenga buebe bufike;

biudi musue bienzeke pa buloba,

bu mudibi bienzeka mu diulu.

11Utupe tshiakudia tshietu ku dituku ku dituku.#6.11 ku dituku ku dituku: mu mikanda mikuabu mbafunde ne: tshia dituku dia lelu, nansha: tshia dituku didi dilonda (mmumue ne: didi kumpala).

12Utufuile luse ku malu etu mabi,

bu mutudi tufuila badi batuenzela bibi luse.

13Kutubueji mu ditetshibua,

kadi utusungile kudi Muena bubi.

[Bualu wewe ke udi ne bukalenga,

bukole ne butumbi, kashidi tshiendelele. Amene.]#6.13 Miaku idi mu tuboku kayena mu mikanda mikuaba yonsu ya kale to. Tangila 1 Kul 29.11-13.”

14Nanku panudi nufuila bantu bakuabu luse, bua malu mabi adibu banuenzela, Tatu wenu udi mu diulu neanufuile penu luse. 15Kadi panuikala kanuyi nufuila bantu bakuabu luse, bua malu mabi adibu banuenzela, Tatu wenu kabidi kena unufuila luse bua mibi yenu to.

Munudi mua kujila biakudia

16— Panudi nujila biakudia, kanushadi babungame bu mudi bena mpala ibidi benza. Badi banyenga mpala, bua bantu bonsu babamone ne: mbajile biakudia. Ndi nnujadikila bulelela ne: mbamane kupeta difutu diabu. 17Kadi wewe, paudi ujila biakudia, wowe mayi kuisu, wele nsuki tshisaku, 18bua bantu kabamanyi ne: udi mujile biakudia. Anu Tatu webe udi kayi umueneka, neamanye. Nanku Tatu webe udi umona biudi wenza mu musokoku, neakufute.

Nukebe bubanji bua mu diulu

(Luk 12.33-34)

19— Kanukungujidi bubanji buenu pa buloba to, padi misanda ne dimona mua kubunyanga, kabidi padi bivi mua kushipa biibi, kuiba. 20Nutekelayi bubanji buenu anu muaba udi Mvidi Mukulu, mudi misanda ne dimona kabiyi mua kubunyanga, kabidi mudi bivi kabayi mua kushipa biibi, kuiba. 21Bualu muaba uudi uteka bubanji buebe, ke muaba udi muoyi webe kabidi.

Butoke ne Midima

(Luk 11.33-36)

22— Mesu adi bu muendu wa mubidi. Pikala mesu ebe amona bimpe, mubidi webe mujima udi mu butoke. 23Kadi pikala mesu ebe kaayi amona bimpe, mubidi webe mujima udi mu midima. Nanku pikala butoke budi munda muebe buikale amu midima, newikale mu midima mikole be!

Mvidi Mukulu ne biuma

(Luk 16.13)

24— Muntu nansha umue kena mua kuenzela bamfumu babidi mudimu to. Neanange umue, abenge mukuabu; nansha neitabe umue, adiule mukuabu. Kanuena mua kuenzela Mvidi Mukulu mudimu, kuenzela kabidi ne biuma musangu umue.

Nutekemene kudi Mvidi Mukulu

(Luk 12.22-31)

25— Ke mundi nnuambila ne: kanuditatshishi bua biakudia ne bua biakunua binudi nujinga, nansha bua bilamba bia kuvuala binudi nukengela. Bualu muoyi mmupite biakudia, mubidi mmupite bilamba. Ki mmomu anyi? 26Tangilayi nyunyi idi ibuka mulu. Kayena ikuna biakudia, kayena inowa, kayena nansha iteka biakudia mu mayeba. Kadi Tatu wenu udi mu diulu udi uyidisha! Nuenu bantu, kanuena bapite nyunyi anyi? 27Munkatshi muenu udi mua kuditatshisha, kusakidila dituku ku matuku ende a panu nnganyi?#6.27 ku matuku ende a panu: mu mikanda mikuabu mbafunde ne: ku bule buende.

28— Nudi nuditatshisha bua bilamba bia kuvuala bua tshinyi? Tangilayi mudi bilongu bia mu mpata bidiunda. Kabiena bienza mudimu, kabiena bikuma bilamba. 29Kadi ndi nnuambila ne: nansha Shelomu, uvua ne bubanji bua bungi, kavua ne bilamba bimpe bipite tshilongu nansha tshimue!#6.29 Tangila 1 Bak 10. 30Mvidi Mukulu udi uvuadika bisosa, bidi lelu mu mpata, maloba babiosha. Nanku kena mua kunuvuadika nuenu bantu bilamba bimpe bipite anyi? Kadi ditaba dienu ndikese be! 31Nanku kanuditatshishi, nuebejangana ne: “Netudie tshinyi? Netunue tshinyi? Netuvuale tshinyi?” 32Anu bantu badi kabayi bamanye Mvidi Mukulu bimpe, ke badi bakeba amu kukeba bionsu abi nanku. Kadi Tatu wenu udi mu diulu mmumanye ne: nudi dijinga ne bintu bionsu abi. 33Nuenu bangabanga nuditatshishe bua Bukalenga bua Mvidi Mukulu; nukumbaje tshidi Mvidi Mukulu musue. Nanku Yeye neanusakidile bikuabu bionsu abi. 34Kanuditatshishi bua malu a maloba to. Patshiabu, malu a dituku adi neadikumbanyine. Lutatu ludi lumueneka ku dituku dionsu, ndukumbane bua dituku adi.

Currently Selected:

Matayi 6: TSH96

Highlight

Copy