Tshibangidilu 9
9
Mvidi Mukulu udi utua ndondu ne Nowa
1Mvidi Mukulu kuela Nowa ne bana bende lupemba wamba ne: “Tantayi, nuvu-langane buloba bujima.#9.1 Fuanyikija ne Tshib 1.28. 2Nyama yonsu ya pa buloba ne nyunyi idi ibuka mulu, ne minyinyi ya mu mayi neyinutshine bikole ikuatshika buowa. Bionsu abi mbintu bienu bindi munupe. 3Nanku, bu mumvua munupe bisekiseki bua nuenu kudia,#9.3 Tangila Tshib 1.29-30. ke mundi munupe kabidi nyama yonsu ikale biakudia bienu. 4Kadi kanuena mua kudia munyinyi wa nyama muikale ne mashi. Bualu muoyi wa tshintu udi mu mash#9.4 Fuanyikija ne Lev 7.26-27; 17.10-14; Diel 12.16, 23; 15.23. atshi. 5Bu mudi muoyi wa tshintu muikale mu mashi, ndi nnukandika bua kanushipi muntu nenu, tshianana meme nennushipeshe panyi. Pashishe nyama kayena mua kushipa muntu to, tshianana meme nenyishipeshe kabidi.
6Udi upumuna mashi a muntu,
nebapumune ende kudi muntu,
bualu mbafuke muntu mufuanangane ne Mvidi Mukulu.#9.6 Udi upumuna mashi a muntu: fuanyikija ne Tshim 20.13. — mufuanangane ne Mvidi Mukulu: Tshib 1.26.
7Nuenu tantayi, nuvulangane, numuangalake pa buloba bujima.#9.7 Fuanyikija ne Tshib 1.28.”
8Mvidi Mukulu kuambila Nowa ne bana bende ne: 9“Ndi ntua nenu ndondu,#9.9 Tun. 9-17: mu tunungu tuonsu etu: kutua ndondu, ke kulaya bualu bunene budi Mvidi Mukulu musue kukumbaja. kabidi ne ndelanganyi yenu. 10Ndi ntua kabidi ndondu ne bionsu binuvua bapatuke nabi mu buatu: nyunyi, bimuna ne nyama ya muitu, kabidi ne bivuavua kuenda ne muoyi pa buloba pashishe. 11Ndondu undi ntua nenu biangatshile ku lelu udi nunku: tshiena nguwuja kabidi buloba ne mayi a tshipupu bua kubutula bionsu bidi ne muoyi, kunyangakaja bidi pa buloba. 12Tshimanyinu tshia ndondu wetu ewu nenu, kabidi ne bionsu bidi pa buloba tshidi nunku: 13Ndi nteka muanzankongolu mulu mu mavuba bua wikale tshimanyinu tshidi tshivuluija ndondu udi pankatshi panyi ne bantu, kabidi ne bionsu bidi ne muoyi pa buloba. 14Pafinda mvula kulu, pambamona muanza-nkongolu, 15nemvuluke ndondu awu. Mayi a tshipupu kakubutula kabidi bantu ne bidi ne muoyi pa buloba to. 16Nemmone muanza-nkongolu mvuluka ndondu undi mutue ne bionsu bidi ne muoyi pa buloba. 17Muanza-nkongolu udi tshimanyinu tshidi tshivuluija ndondu wa kashidi undi mutue ne bantu ne bionsu bidi ne muoyi pa buloba.”
Bana basatu ba Nowa
18Bana ba balume ba Nowa bapatukila mu buatu bavua: Sheme, Kame ne Yefete. Kame udi tatuende wa Kenaane. 19Bantu bonsu ba pa buloba mbafume anu kudi bana aba basatu ba Nowa.
20Nowa ke tshidime wa kumpala uvua mukuna mitshi ya maluvu. 21Nowa uvua munue maluvu mukuatshike. Kulalaye mu nzubu muende butaka. 22Kame, tatuende wa Kenaane, kumona butaka bua tatuende Nowa, kupatuka bua kuambila bana babu babidi bavua pa mbelu. 23Nanku Sheme ne Yefete kuangata tshilamba tshia Nowa, kutshibuikila pa makaya abu. Bonsu babidi kuya natshi tshianyima, kubuikila tatuabu uvua butaka. Bavua batangila luseke lukuabu bua kabamonyi butaka bua tatuabu. 24Maluvu mamane kumutenduka, Nowa kumvua tshivua muanende wa mukala mumuenzele atshi. 25Kumuelaye mulawu wamba ne:
“Kenaane ikale muena diakabi!
Ikale mupika wa bana babu.”
26Kuambaye kabidi ne:
“Bantu batumbishe Maweja-Nangila, Mvidi Mukulu wa Sheme!
Kenaane ashale mupika wa Sheme!
27Mvidi Mukulu asankishe Yefete,#9.27 Yefete: muaku Yefete udi umvuija ‘kusankisha’ mu buena ebrewu. ndelanganyi ya Yefete isombe mu nzubu ya ntenta ya bena Sheme; Kenaane ikale mupika wa Yefete!”
28Mayi a tshipupu mamane kukama, Nowa kushala ne muoyi bidimu nkama isatu ne makumi atanu. 29Bidimu bia Nowa bidi nkama tshitema ne makumi atanu. Pashishe kufuaye.
Currently Selected:
Tshibangidilu 9: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
