Tshibangidilu 4
4
Kayine ne Ebele
1Adame kubuelela mukajende Eva mu nzubu. Awu kuimita difu, kulelaye Kayine. Eva kusanka bikole wamba ne: “Ndi mufuke muana wa balume ku bukole bua Maweja-Nangila.#4.1 Ndi mufuke: badi mua kuandamuna kabidi ne: ndi mupete.” 2Pashishe kulelaye kabidi Ebele muakunyi wa Kayine. Ebele uvua mulami wa mikoku, Kayine uvua tshidime. 3Matuku a kunowa akumbana, Kayine kulambula Maweja-Nangila biakudia bia mu madimi ende. 4Ebele pende kumulambula banabute ba mikoku mimpe ya mafuta. Maweja-Nangila kuanyisha milambu ya Ebele,#4.4 Fuanyikija ne Ebr 11.4. 5kubenga ya Kayine. Nanku, Kayine kupeta tshiji tshikole, kufika munda. 6Maweja-Nangila kumukonka ne:
— Tshiji ntshia tshinyi? Udi mufike munda bua tshinyi? 7Bu wewe muenze bimpe, uvua ne bua kuikala ne disanka. Kadi paudi kuyi wenza bimpe, bubi budi bukuimanyine ku tshibi; kadi ukebe mua kubutshimuna.
8Kayine umvua nanku, kuambila muanabu Ebele ne:
— Tuye kuendakana.
Bafika mu budimi, Kayine kukuata muanabu Ebele kumushipa.#4.8 kumushipa: tangila Mat 23.35; Luk 11.51; 1 Yow 3.12.
9Maweja-Nangila kukonka Kayine ne:
— Muanenu Ebele udi penyi?
Kayine kuandamuna ne:
— Tshiena mumanye. Meme ndi mulami wa muanetu anyi?
10Maweja-Nangila kuebeja ne:
— Udi muenze nanku bua tshinyi? Muadi wa mashi a muanenu#4.10 mashi a muanenu: tangila Ebr 12.24. wafiki kundi ufumina pa buloba. 11Mpindiewu udi ne mulawu pa buloba buvua bumatshile mashi a muanenu uuvua mushipe. 12Wewe newikale udima, kadi buloba kubuyi butoloka bintu bia nsongu. Newikale muendakanyi pa buloba, kuyi ne muaba wa kusomba.
13Kayine kuambila Maweja-Nangila ne:
— Dinyoka diudi mumpe ndipite bukole. 14Lelu udi ungipata pa buloba. Ndi nya kusomba mutantshi mule nebe. Nenshale muendakanyi. Muntu yonsu ungasangila nende neanshipe.
15Maweja-Nangila kumuandamuna ne:
— Muntu kena ukushipa to. Muntu wakenzela bibi, nebamusombuele misangu muanda mutekete. Maweja-Nangila kuteka tshimanyinu pambidi pa Kayine bua muntu yonsu wasangila nende kamuenzedi bibi to. 16Kayine kumuka muaba uvua Maweja-Nangila, kuya kusomba mu ditunga dia Node#4.16 Node: ki mbamanye ditunga edi to. luseke ludi diba dipatukila lua Edene.
Ndelanganyi ya Kayine
17Kayine kubuelela mukajende mu nzubu. Awu kuimita difu, kulela muana, dina diende Enoke. Kayine kuasa tshimenga, kutshinyika dina dia muanende Enoke. 18Enoke kulela Irade. Irade kulela Meyuyayele. Meyuyayele kulela Metushayele. Metushayele kulela Lemeke.
19Lemeke kusela bakaji babidi: dina dia mukalenga muadi divua Ada, dia mutu wa lubanza divua Sila.
20Ada kulela Yabale. Yabale ke nkambua wa badi basomba mu nzubu ya ntenta bikale ne bimuna. 21Dina dia muanabu ne Yabale divua Yubale. Uvua nkambua wa bimbi ba bisanji ne bedi ba nshiba. 22Sila, mukaji muibidi wa Lemeke, uvua mulele Tubale-Kayine. Yeye ke uvua nsenda wa biamu bishilangane bikunze ne bifike.#4.22 Tubale-Kayine: badi mua kuandamuna kabidi ne: uvua nkambua wa bansenda badi bafula biamu bitue. Tubale-Kayine uvua ne muanabu wa bakaji, dina diende Naama.
23Lemeke kuambila bakaji bende ne:
“Ada ne Sila, telejayi diyi dianyi.
Bakaji banyi, umvuayi tshindi nnuambila:
Eyowa ndi nshipa muntu padiye untapa mputa.
Ndi nshipa muana padiye untuuta.
24Eyowa, Kayine nebamusombuele
misangu muanda mutekete.
Kadi Lemeke nebamusombuele
misangu makumi muanda mutekete.”
25Adame ne Eva kulela muana we balume mukuabu. Eva kumuinyika dina dia Shete, wamba ne:
— Mvidi Mukulu wakumpesha muana mukuabu pa muaba wa Ebele uvua Kayine mushipe.#4.25 Shete: mu muakulu wa bena Ebrewu, dina dia Shete didi diumvuija bantu ne: Mvidi Mukulu wakumpesha.
26Shete kulela muana wa balume, kumuinyika dina dia Enoshe. Tshikondu atshi ke tshivua bantu batuadija kutendelela Mvidi Mukulu, batela dina dia Maweja-Nangila.
Currently Selected:
Tshibangidilu 4: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996