Tshibangidilu 35

Yakobe udi umuangala ku Shekeme, uya ku Betele

1Dituku dikuabu Mvidi Mukulu kuambila Yakobe ne:

— Juka, uye kuasa ku Betele. Ungashileku tshilambuilu, bualu ke muaba umvua mukumuenekele pauvua unyema muanenu Esawu.#35.1 Tangila 28.10-12.

2Yakobe kuambila bena diku diende ne bantu bende ne:

— Dilongololayi. Umushayi mvidie ya bisamba bikuabu idi munkatshi muenu. Dikobololayi, nuvuale bilamba bikuabu. 3Dilongololayi, tuyayi ku Betele. Nengashileku Mvidi Mukulu tshilambuilu, bualu uvua mungambuluishe pamvua mu dikenga dikole. Uvua mundame miaba yonsu imvua nya.

4Nanku bantu bonsu kumupesha mpingu yonsu ivua ileja mvidie ya bisamba bikuabu ivuabu nayi, kumupesha kabidi ne tukanu#35.4 tukanu tua ku matshi: bivua mua kuikala bintu bivuabu batendelela nabi mvidie. tua ku matshi tavuabu natu. Yakobe kubijika bionsu muinshi mua mutshi wa lusanga udi pabuipi ne tshimenga tshia Shekeme. 5Yakobe ne bonsu bavuaye nabu, kumukabu muaba awu. Mvidi Mukulu kukuatshisha bantu bonsu ba mu bimenga bivua nabu mutumba bowa bukole. Kupangabu mua kulondakaja Yakobe ne bana bende.

6Ke Yakobe ne bena diende bonsu kufika mu Luze, udibu babikila mpindiewu ne Betele, mu ditunga dia Kenaane. 7Yakobe kuashilamu Mvidi Mukulu tshilambuilu. Kutshinyika dina ne: Mvidi Mukulu wa mu Betele, bualu muaba awu ke uvua Mvidi Mukulu mumumuenekele diba divuaye unyema muanabu Esawu.

8Anu dituku adi Debora, ndeji wa Rebeka, kufua. Kumujikabu muinshi mua mutshi wa lusanga udi pabuipi ne Betele. Batshidi babikila lusanga alu ne: “Lusanga lua muadi.”

9Yakobe ufuma ku Mezopotamiya, Mvidi Mukulu kumumuenekela tshiakabidi, kumuela lupemba. 10Mvidi Mukulu kumuambila ne:

— Kabena bakubikila kabidi ne: Yakobe to. Mpindiewu nebakubikile ne: Izrayele.#35.10 Tangila 32.29 ne diumvuija.

Nanku Mvidi Mukulu kumuinyika ne: Izrayele. 11Kumuambila ne:

— Ndi Mvidi Mukulu wa bukole buonsu. Utante, uvulangane, wikale nkambua wa bisamba bia bungi, bakalenga nebafume ku ndelanganyi yebe. 12Wewe ne ndelanganyi yebe, ndi nnupesha ditunga dimvua mulaye Abrahame ne Izake. Nenku nendipeshe kabidi ndelanganyi yebe.#35.12 Tun. 11-12: fuanyikija ne Tshib 17.4-8; 26.3.

13Mvidi Mukulu kumuka muaba uvuaye uyukidila ne Yakobe. 14Yakobe kuimanyika dibue muaba awu, kuela manyi ne maluvu a mulambu pa dibue adi bua kudijidila. 15Yakobe kuinyika muaba awu ne: Betele, mmomumue ne: Nzubu wa Mvidi Mukulu (muaba uvua Mvidi Mukulu muyukile nende#35.15 Tangila 28.18-19.).

Diledibua dia Binyamine ne Lufu lua Rakele

16Yakobe ne bena diende kumuangala ku Betele. Kabayi banji kufika ku Efrata, Rakele kulela muana. Kadi kulela aku kuvua kukole! 17Nanku pavua Rakele ulela muana ukenga bikole, muleleshi kumuambila ne:

— Kutshinyi to. Muana ngua balume kabidi.

18Rakele ulela, kushala ukengakana ne lufu. Pa kukulaye muoyi, kuinyikaye muana awu ne: Benoni, mmumue ne: Makenga. Kadi Yakobe, tatuende kumuinyika ne: Binyamine, mmumue ne: Diboku dia bukole.#35.18 Yakobe udi umusha dina dia dikenga Ben-Oni, muana wa makenga, upingaja dia disanka dia Binyamine, muana wa ku diboku dia bukole. Bavua batangila diboku dia bukole bu dia diakalenga (tangila Mis 137.5), nansha kabidi luseke lua balume (Mis 110.5 ne diumvuija; fuanyikija ne Mat 25.34).

19Rakele ufua, kumujikabu ku muelelu wa njila udi muye ku Efrata, muaba udibu binyika mpindiewu ne: Betleyeme. 20Yakobe kuimanyika dibue pa lukita luende alu. Dibue adi too ne lelu, batshidi badibikila ne: “Dibue dia pa lukita lua Rakele.”

21Yakobe kumuangala muaba awu, kuya kuasa mitanda yende dishiya dia Migdale-Edere.#35.21 Migdale-Edere, nansha: kaleya ka tshisumbu tshia nyama: ke muaba uvua pabuipi ne mukuna wa Siyone. 22Pavua Yakobe musombe muaba awu, Rubene kubuelela Bila, mukaji mupika wa tatuende, mu nzubu. Yakobe kumanya bualu abu, kunyingalala bikole.#35.22 kunyingalala bikole: ke muvua bena Ngreke bandamuna kanungu aka kale. Kadi kabena basangane miaku eyi mu mikanda ya mu buena ebrewu to.

Bana ba balume bonsu ba Yakobe bavua dikumi ne babidi. 23Leya uvua ne bana ba balume basambombu: Rubene, ke muanabute, bamulonda kudi Shimeyone, Levi, Yuda, Isakare ne Zebulone. 24Rakele uvua ne bana ba balume babidi: ke Yozefe ne Binyamine. 25Bila mukaji mupika wa Rakele uvua mulele bana ba balume babidi: ke Dane ne Naftali. 26Zilpa mukaji mupika wa Leya uvua mulele bana ba balume babidi: ke Ngade ne Ashere. Bana bonsu aba ba balume ke bavua Yakobe mulele mu Mezopotamiya.

27Yakobe kuya kudi tatuende Izake mu Mambre pabuipi ne Kiriyate-Arba, muaba udibu babikila lelu ne: Ebrone. Ke muaba uvua Abrahame ne Izake basombe kale.#35.27 Fuanyikija ne Tshib 13.18. 28Izake uvua ne bidimu lukama ne makumi muanda mukulu, 29kufuaye, mumane kulala panu nuboboke. Kulondaye bankambua bende. Kumujikabu kudi bana bende Esawu ne Yakobe.

Currently Selected:

Tshibangidilu 35: TSH96

Highlight

Copy