Tshibangidilu 30
30
1Lakele umona ne: tshiena mulele, kumfuila mukenende mukawu.
Kuambilaye bayende Yakobe ne: — Undeleshe panyi, bualu ndi mua kufua!
2Yakobe kufikila Rakele munda, umuambila ne:
— Meme tshiena Mvidi Mukulu udi mukukandike ne: kuledi to!
3Rakele kuandamuna Yakobe ne:
— Angata nansha Bila, mupika wanyi ewu, ashale mukajebe, bua alele bana, bikale banyi.
4Rakele kufila Bila mupika wende kudi Yakobe, yeye kumuangata. 5Bila kuimita difu, kulelela Yakobe muana wa balume. 6Rakele kuamba ne:
— Mvidi Mukulu mmumbingishe. Wateleji dilomba dianyi, wampeshi muana wa balume. Rakele kuinyika muana awu dina ne: Dane.#30.6 Dane: mu buena ebrewu dina edi didi diumvuija ne: mmumbingishe. 7Bila kuimita difu, kulelela Yakobe muana wa balume mukuabu. 8Rakele kuamba ne:
— Ndi muluangane mvita mikole ne mukuluanyi wa bakaji. Kadi mbamupitshi bukole.
Rakele kuinyika muana awu dina ne: Naftali.#30.8 Naftali: mu buena ebrewu dina edi didi diumvuija ne: ndi muluangane mvita.
9Leya umona ne lulelu luakoseki, kufilaye mupika wende Zilpa kudi Yakobe, bua ashale mukajende. 10Zilpa kulelela Yakobe muana wa balume. 11Leya kuamba ne:
— Ndi ne dikasa dimpe be!
Kuinyikaye muana awu dina ne Ngade.#30.11 Ngade: mu buena ebrewu dina edi didi diumvuija ne: ndi ne dikasa dimpe. 12Zilpa mupika wa Leya kulelela Yakobe muana mukuabu wa balume. 13Leya kuamba ne:
— Ndi muena diakalenga, bualu bakaji nanyi nebambikile ne: mmuena diakalenga.
Kuinyikaye muana awu dina ne: Ashere.#30.13 Ashere: mu buena ebrewu dina edi didi diumvuija ne: muena diakalenga.
14Dimue dituku tshikondu tshia kunowa ntete ya kuenza bukula, Rubene kuya mu madimi bua kukebela mamuende Leya bimuma bia mutshi wa dinanga.#30.14 mutshi wa dinanga (Mandragore): bantu bavua bela meji ne: bimuna bia mutshi wa dinanga bivua biambuluisha bua kukeba lulelu. Kumutuadilaye bimuma abi. Ke Rakele kulomba Leya ne:
— Bu wewe musue, mpeshaku bimue bimuma bia mutshi wa dinanga, bidi muanebe mukutuadile.
15Leya kuandamuna Rakele ne:
— Wewe ukadi muangate bayanyi! Udi musue kuangata kabidi bimuma bia mutshi wa dinanga, bidi muananyi muntuadile bua tshinyi?
Rakele kuandamuna ne:
— Paudi umpesha bimuma abi, Yakobe neikale nebe butuku bua lelu.
16Dilolu Yakobe ufuma ku budimi, Leya kuya kumuakidila, umuambila ne:
— Lelu udi umbuelela mu nzubu, bualu nkadi mumane kufuta Rakele bimuma bia mutshi wa dinanga, bivua muananyi muntuadile, bua tuikale nebe butuku ebu.
Yakobe kubuelela Leya mu nzubu butuku abu. 17Mvidi Mukulu kumvua dilomba dia Leya. Kuimitaye difu, kulela muana wa balume muitanu. 18Leya kuamba ne:
— Mvidi Mukulu wamfutshi, bualu mvua mufile mupika wanyi kudi bayanyi, bua ikale mukajende.
Leya kuinyika muana awu dina ne: Isakare.#30.18 Isakare: mu buena ebrewu dina edi didi diumvuija ne: wamfutshi difutu dianyi. 19Leya kuimita difu dikuabu, kulela muana muisambombu wa balume. 20Leya kuamba ne:
— Mpindiewu Mvidi Mukulu mmunsankishe bikole. Bayanyi neannemeke, bualu ndi mumulelele bana ba balume basambombu.
Kuinyikaye muana awu dina ne Zebulone.#30.20 Zebulone: mu buena ebrewu dina edi didi diumvuija ne: neanemeke. 21Pashishe Leya kulela muana wa bakaji, diende Dina. 22Mvidi Mukulu kusamba Rakele. Kumvuaye dilomba diende, kumupeshaye buledi bua bana. 23Rakele kuimita difu, kulela muana wa balume. Kuambaye ne:
— Mvidi Mukulu wangumushi bundu ku mesu.
24Kuinyikaye muana awu ne: Yozefe. Kuambaye ne: “Maweja-Nangila ampe kabidi mukuabu muana wa balume.#30.24 Yozefe: mu buena ebrewu dina edi didi diumvuija ne: ampe kabidi.”
Yakobe udi upeta bubanji
25Rakele mumane kulela Yozefe, Yakobe kuambila Labane ne:
— Itaba bua mpingane kuetu, mu ditunga dietu. 26Ndi nkulomba bua umpeshe bakaji banyi ne bana banyi, bua mpingane nabu kuetu, bualu udi mumanye mundi mumane kukuenzela mudimu bidimu bia bungi bua kubasela.
27Labane kuandamuna Yakobe ne:
— Bu wewe musue, nteleja. Mbandeje munda muanyi ne: Maweja-Nangila mmungele lupemba amu bualu buebe. 28Nanku ungambile anu difutu dindi mua kukufuta, nenkufute.
29Yakobe kuandamuna ne:
— Udi mumanye mudimu undi mukuenzele. Ndi mukuvudijile bimuna bimvua mulame. 30Pamfikile muaba ewu mvua mukusangane ne bintu bikese. Kadi lelu udi ne bintu bia bungi. Maweja-Nangila mmukusankishe katshia mfika kuebe, bua mudimu onsu undi mukuenzele. Mpindiewu, ndi musue kuenzela bena diku dianyi mudimu.
31Labane kumukonka ne:
— Udi musue nkufute tshinyi?
Yakobe kuandamuna ne:
— Kuena ne bua kumfuta. Ndi musue kulama ne kudisha bimuna biebe bu mumvua ngenza. Kadi witabe amu tshindi nkulomba etshi. 32Lelu nengendakane munkatshi mua bimuna biebe bionsu. Nensungule bana ba mikoku bonsu badi ne matoba, nansha mipolu pambidi, nansha badi ne mubidi mufike, ne bana ba mbuji bonsu badi ne matoba nansha mipolu pambidi, bua bikale difutu dianyi.#30.32 Tun. 32-42: bivuabu benzela bimuna kudi Yakobe kabiena bimanyike bimpe to. Kadi bualu menemene budibu basue kutulondela mbuebu: Yakobe uvua ne budimu buvule, mutalamine muku wende, bualu Labane uvua mushintulule difutu diende misangu dikumi (31.7, 41). 33Pashishe neujadike ne: ndi muntu muakane, anu pawafika bua kutangila bimuna bingikala muangate bua difutu dianyi. Wewe musangane mbuji udi kayi ne matoba anyi udi kayi ne mipolu pambidi, nansha mukoku udi kauyi mufike, nengikale muivi.
34Labane kuandamuna Yakobe ne:
— Ndi muitabe bionsu biudi muambe ebi.
35Anu dituku adi, Labane kuumusha mbuji ya mpumbu yonsu ivua ne mipolu nansha ivua ne matoba pambidi. Kumbushaye kabidi mbuji ya mashina yonsu ivua ne matoba manene ne makese. Pashishe kumushaye mikoku yonsu ivua ne boya bufike. Kupeshaye bana bende bimuna bionsu abi. 36Bana ba Labane kumuka nabi muaba uvua Yakobe, kuenda nabi matuku asatu. Kadi Yakobe uvua anu udisha bimuna bia Labane bivua bishale. 37Yakobe kukosa matamba mabishi a mitshi mishilangane (ya peupliye, ya amandiye ne ya platane). Kuvulaye bizubu bia matamba awu bibakabibaka. 38Kutekaye matamba avuaye muvule bizubu bibakabibaka mu luuvu luvua bimuna binuina mayi. Pavua bimuna binua mayi awu, bimpanga bivua bikuata mashina. 39Kadi bu muvua bimpanga bikuata mashina kumpala kua matamba a mitshi, avuaye muvule bizubu bibakabibaka awu, bimuna bionsu bivua bilela bana bikala ne mipolu ne matoba manene ne makese pambidi. 40Yakobe uvua umusha mikoku yonsu, uyiteka pa nkayayi. Pashishe uvua uteka mikoku ayi mitangilangane ne ya Labane ivua ne mipolu ne ivua ne boya bufike.
Ke muvua Yakobe mupete bimuna bia bungi nanku. Bimuna biende kabivua bibalakana mu bimuna bia Labane to. 41Pavua Yakobe umona bimuna bia mashina ne bia bimpanga bivua ne mubidi muimpe bikuatangane, uvua uteka matamba a mutshi avuaye muvule bizubu awu mu luuvu luvua bimuna binuina mayi, bua bimuna bikale bikuatangana kumpala kua matamba a mitshi awu. 42Kadi pavuaye umona bimuna bia mashina ne bia bimpanga binyane bikuatangane, Yakobe ka-vua uteka matamba a mitshi awu to. Nanku bimuna binyane bivua bishale bia Labane, bia mubidi muimpe bivua bia Yakobe.
Yakobe udi unyema Labane
43Yakobe kupeta bubanji bua bungi. Uvua ne bapika balume ne bakaji, bimuna bipite bungi, tumelu ne mpunde kabidi.
Currently Selected:
Tshibangidilu 30: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
