Tshibangidilu 25

Lufu lua Abrahame. Ndelanganyi yende mikuabu

1Abrahame kusela mukaji mukuabu, dina diende Ketura. 2Mukaji awu kumulelela bana basambombu: Zimrane, Yokshane, Medane, Madiyane, Ishebake ne Shuwa. 3Yokshane ke tatuende wa Saba ne wa Dedane. Ndelanganyi ya Dedane ivua nunku: Bena Ashure, bena Letushe, ne bena Leyume. 4Madiyane uvua mulele bana ba balume batanu: Efa, Efere, Anoke, Abida ne Elda. Bana aba ke ndelanganyi yonsu ya Ketura.

5Abrahame kupesha Izake bia bumpianyi bionsu bivuaye nabi. 6Patshivuaye ne muoyi, kupeshaye bana bavuaye mulele ne bakaji bakuabu, biabu bintu bia bumpianyi. Kadi kubumushaye mu ditunga divua Izake. Kubatumaye mu ditunga dia ku luseke ludi diba dipatukila. 7Abrahame mumane kukulakaja, mukumbaje bidimu lukama makumi muanda mutekete ne bitanu, 8kutuilaye mu diakalenga, kulonda bankambua bende. 9Bana bende Izake ne Ismayele kumujika mu lubuebue lua Makpela luvua pabuipi ne Mambre, mu budimi bua Efrone, muana wa Sohare, muena Iti. 10Ke budimi buvua Abrahame musumbe kudi bena Iti.#25.10 Tangila 23.3-16. Ke mu wabu bamujike pabuipi ne muena kuende Sara. 11Abrahame mumane kufua, Izake kuya kusomba pabuipi ne tshiina tshia mayi tshia Lahayi-Royi.#25.11 Tangila 16.14. Mvidi Mukulu kumuela lupemba mu malu onsu.

12Eyi ke ndelanganyi ya Ismayele, muana wa Abrahame, uvuaye mulele ne Agare, muena Ejipitu, uvua ukuatshila Sara mudimu. 13Muanabute uvua Nebayote, balonda kudi Kedare, bamutua mu nyima kudi Adbeyele ne Mibsame, 14Mishema, Duma, Masa, 15Adade, Tema, Yeture, Nafishe, uvua mushile Kedma dibela. 16Ke muvua mena a bana ba balume dikumi ne babidi ba Ismayele nanku. Bobu aba ke bankambua ba bisamba. Bantu binyikile misoku ne miaba ya kusomba mu mitanda mena abu. 17Ismayele mumane kukumbaja bidimu lukama makumi asatu ne muanda mutekete, kulondaye bankambua bende mu lufu. 18Ndelanganyi ya Ismayele ivua miase pankatshi pa Avila ne Shure. Shure udi pabuipi ne Ejipitu, mu njila wa ku Ashure. Ndelanganyi ayi kayivua misombe muaba umue ne ndelanganyi mikuabu ya Abrahame to.

YAKOBE

Diledibua dia Esawu ne Yakobe

19Malu a Izake, muana wa Abrahame, adi nunku: 20Izake mumane kukumbaja bidimu makumi anayi, kuselaye Rebeka, muana wa Betuyele, muena Arame, mufumine ku tshitupa tshia Mezopotamiya tshia ku mutu kua misulu. Rebeka uvua ne muanabu wa balume, dina diende Labane. 21Kadi bu muvua Rebeka muikale nkumba, Izake kutendelela Maweja-Nangila bua mukajende awu alele muana. Maweja-Nangila kuitaba dilomba adi. Rebeka kuimita difu dia bana ba mapasa. 22Bana abu bavua baluangana bikole munda mua mamuabu. Rebeka kudiebeja ne:

— Malu a mushindu ewu adi angenzekela, meme ne difu, bua tshinyi?

Pashishe kuyaye kuebeja Maweja-Nangila. 23Maweja-Nangila kumuandamuna ne:

Bisamba bia bantu bibidi bidi munda muebe,

neulele bisamba bibidi bishilangane.

Kadi tshisamba tshimue netshipite tshikuabu ku bukole.

Muanabute neikale mupika wa muakunyende.#25.23 Tangila Rom 9.12.

24Diba dia kulela dikumbana, kamuvua kabidi mpata to. Rebeka kulela bana ba mapasa babidi ba balume. 25Mbuyi uvua mukunze, muikale ne boya pambidi, buenza bu tshinkutu. Kumuinyikabu ne: Esawu.#25.25 Esawu: mu muakulu wa bena Ebrewu dina dia Esawu didi diumvuija ne: udi ne boya mubidi mujima. 26Kadi Kabanga kulua, mukuate muanabu Esawu ku tshikankanya. Kumuinyikabu ne: Yakobe.#25.26 Yakobe: mu muakulu wa bena Ebrewu dina dia Yakobe didi diumvuija ne: Tshikankanya. Tangila kabidi 27.36 ne diumvuija. Diba divuabu balele bana abu, Izake uvua ne bidimu makumi asambombu.

27Bana ba mapasa abu kukola. Esawu uvua tshilembi wa kalanda-musenga, musue kukeba nyama mu tshisuku. Kadi Yakobe uvua muntu wa lutulu, musue kulama ku mbelu. 28Izake uvua mutambe kunanga Esawu, bualu uvua munange bikole munyinyi wa nyama ya mu tshisuku. Kadi Rebeka uvua mupite kunemenena anu kudi Yakobe.

29Dituku dikuabu, Esawu ufuma ku dipata nyama mu tshisuku, mupungile ne nzala, kusanganaye Yakobe mulamba nsupu wa nkunde. 30Esawu kumulomba ne:

— Mpeshaku nsupu wa nkunde mukunze uudi mulamba, ndia, bualu mukana mmungume.

(Ke padibu babikila Esawu ne: Edome,#25.30 Edome: mu muakulu wa bena ebrewu dina dia Edome didi diumvuija ne: nsupu mukunzubile. mmomumue ne: mukunzubile.)

31Yakobe kuandamuna ne:

— Bua meme kukupesha nsupu wa nkunde ewu, bangabanga unsumbishe bumuanabute buebe.

32Esawu kuandamuna ne:

— Bumuanabute kabuena bungambuluisha kabidi to. Nzala idi mua kunshipa.

33Yakobe kuandamuna Esawu ne:

— Nanku anji kuditshipa ne: Ndi mpesha Yakobe bumuanabute buanyi. Esawu kuditshipa, kusumbisha bumuanabute buende kudi muakunyende. 34Pashishe Yakobe kupesha mukuluende mampa ne nsupu ya nkunde. Esawu kudia, kunua, kutungunuka ne luendu. Ke muvua Esawu kayi muangate bumuanabute buende abu ne mushinga nansha.#25.34 Ebr 12.16.

Currently Selected:

Tshibangidilu 25: TSH96

Highlight

Copy