Tshibangidilu 21

Diledibua dia Izake

1Maweja-Nangila kusankisha Sara, kumukumbaja bionsu bivuaye mumulaye. 2Sara kuimita, kulelela Abrahame muana wa ku bukunda, mu tshikondu tshivua Mvidi Mukulu mujadike.#21.2 Tangila Tshib 18.10; Ebr 11.11. 3Abrahame kuinyika muana, uvua Sara mumulelele ne: Izake. 4Matuku muanda mukulu akumbana, Abrahame kuteka Izake panshi bu muvua Mvidi Mukulu mumuambile.#21.4 Tshib 17.12; MM 7.8. 5Tshikondu tshivuabu balele Izake, Abrahame uvua mumane kukumbaja bidimu lukama. 6Sara kusanka wamba ne:

— Mvidi Mukulu mmunsekeshe. Nanku bonsu bumvue batela Izake nebaseke pamue nanyi.

7Kuambaye kabidi ne:

— Muntu kaayi uvua mua kuambila Abrahame ne: Dimue dituku Sara neamushe bana mabele? Mpindiewu ngaleledi Abrahame muana wa ku bukunda buende.

Abrahame udi wipata Agare ne Ismayele

8Muana awu kukola, kulekela diamua mabele. Abrahame kulongolola masanka dituku adi.

9Dituku dikuabu, Ismayele, muana wa Abrahame uvuaye mulele ne Agare muena Ejipitu, uvua unaya#21.9 uvua unaya: bena Ngreke bavua bandamuna kanungu aka ku kale ne: uvua utuadija kupotela Izake. ne Izake. Sara umona nanku, 10kuambilaye Abrahame ne:

— Ipata mukaji mupika ewu ne muanende, bualu muana wa mukaji ewu kena mua kufuilakana bintu bia bupianyi ne muananyi Izake to.#21.10 Ngal 4.29-30.

11Miaku eyi kutonda Abrahame bikole, bualu Ismayele uvua kabidi anu muanende. 12Kadi Mvidi Mukulu kuambila Abrahame ne:

— Kufiki munda bua muana ewu ne bua mukajebe mupika to. Itaba bionsu bidi Sara mukuambile. Uvuluke ne: ndelanganyi yebe yonsu imvua mukulaye neyifumine anu kudi Izake.#21.12 Rom 9.7; Ebr 11.18. 13Kadi bua muana uudi mulele ne mukaji mupika ewu, nealele pende bana ba bungi. Neikale tshisamba tshinene, bualu udi muanebe.

14Abrahame, kujuka dinda dionsu, kupesha Agare diampa ne kabulubulu tente ne mayi. Kumusuikaye muana panyima, umuambe ne: Ndaku. Agare uvua wenda ulalakana mu tshipela tshia Bersheba. 15Kadi mayi avuabu nawu mu kabulubulu kujika. Agare kushiya muana muinshi mua mutshi. 16Kuyaye kusomba pa nkayende mutantshi muipi udibu mua kuela muketa ufika. Uvua wamba ne: “Tshiena musue kumona mudi muananyi ufua to”. Agare kusomba ku mpenga, udila muadi. 17Mvidi Mukulu kumvua muadi wa muana. Mutumibue wa Mvidi Mukulu kuela diyi difumine mu diulu, kuebeja Agare ne:

— Tshidi tshikutonda nanku ntshinyi? Kutshinyi to. Mvidi Mukulu umvu muadi wa muana. 18Juka, ubishe muana, umukuate bikole ku tshianza. Ndelanganyi yende neyenze tshisamba tshinene.

19Mvidi Mukulu kutabeja mesu a Agare. Kumonaye tshiina tshia mayi muaba awu. Kusunaye mayi kabulubulu tente, kunuisha muana.

20Mvidi Mukulu kulama muana awu bimpe. Kukolaye, kushalaye tshilembi tshia buta bua mbale tshia kalanda musenga. Kusombaye mu tshipela tshia Parane. 21Mamuende kumuselesha mukaji wa bena Ejipitu.

Abrahame ne Abimeleke badi batua ndondu

22Matuku awu, Abimeleke ne Pikole, mulombodi wa bena mvita bende, kufika kudi Abrahame, bamuambila ne: — Mvidi Mukulu udi ukuambuluisha mu bionsu biudi wenza. 23Nanku, uditshipe mpindiewu kumpala kua Mvidi Mukulu ne: tshiakuenzela Abimeleke, bana bende ne ndelanganyi yende bibi to. Kadi ungenzele meme, ne bena ditunga dianyi diudi usomba, bimpe mumvua mukuenzele.

24Abrahame kuitaba ne:

— Eyowa, ndi nditshipa nanku.

25Kadi, Abrahame kuela Abimeleke lusanzu bua tshiina tshia mayi tshivua bena mudimu bende bakandamana natshi. 26Abimeleke kukema wamba ne:

— Tshiena mumanye udi muenze nanku to! Kuvua mungambile bualu ebu kuonsu eku! Nkadi mbumanya anu lelu.

27Abrahame kupesha Abimeleke mikoku, mbuji ne ngomba. Bonsu babidi kutua ndondu. 28Kadi, Abrahame kuteka bana ba mikoku muanda mutekete pa nkayabu. 29Abimeleke kumukonka ne:

— Wenji nanku bua tshinyi?

30Abrahame kuandamuna ne:

— Ndi nkupa bana ba mikoku aba muanda mutekete bua bakuvuluije ne: uvua mumbule tshiina tshia mayi etshi ngAbrahame!

31Nanku kuinyikabu muaba awu ne: Bersheba, bualu bonsu babidi bavua batuilapu ndondu ne mutshipu.#21.31 Tun. 28-31: mu buena ebrewu badi mua kuandamuna dina dia Bersheba ne: tshiina tshia nyama muanda mutekete, nansha ne: tshiina tshia mutshipu

32Bobu bamane kutua ndondu nanku, Abimeleke ne Pikole, mulombodi wa bena mvita bende, kupingana mu ditunga dia bena Peleshete.

33Abrahame kuya mu Bersheba, kukunamu mutshi wa kampanga-nzevu. Ke muvuaye utendelela Mvidi Mukulu wa kashidi, utela dina dia Maweja-Nangila. 34Abrahame kushala mu ditunga dia bena Peleshete matuku mulongulongu.

Currently Selected:

Tshibangidilu 21: TSH96

Highlight

Copy