Tshibangidilu 15

Mvidi Mukulu udi utua ndondu ne Abrame

1Malu onsu mamane kupita, Maweja-Nangila kumuenekela Abrame, umuambila ne:

— Abrame, kutshinyi to! Ndi nebe, nenkulame ku njiwu yonsu, kabidi difutu diebe nedikale dinene.

2Abrame kumukonka ne:

— Maweja-Nangila Mvidi Mukulu wanyi, neumfute tshinyi? Meme tshiena mulele muana. 3Bianyi bionsu nebabipiane anu kudi Eliyezere, muena Damase, udi wenza mudimu mu nzubu muanyi.

4Maweja-Nangila kukolesha Abrame ku muoyi, umuambila ne:

— Bintu biebe kabena babipiana kudi muena mudimu webe to. Nebishale anu kudi muana wa munda muebe.

5Maweja-Nangila kupatuka ne Abrame mu ntenta wende, umuambila ne:

— Tangila mulu ne udi mua kubala mitotu idimu.

Ke muikale bungi bua ndelanganyi yebe.#15.5 Rom 4.18; Ebr 11.12.

6Abrame kuitaba bionsu bivua Maweja-Nangila mumuambile. Nanku Maweja-Nangila kujadika ne: Abrame mmuntu muakane.#15.6 Rom 4.3; Ngal 3.6; Yak 2.23. 7Pashishe Maweja-Nangila kuambila Abrame ne:

— Meme Maweja-Nangila ke uvua mukupatule mu Ure wa bena Babilone, bua kukupesha ditunga edi, dishale diebe.

8Abrame kumukonka ne:

— Maweja-Nangila Mvidi Mukulu wanyi, nemmanye ne: ditunga edi nedishale dianyi mushindu kaayi?

9Maweja-Nangila kumuambila ne:

— Ntuadile muana wa ngombe, mbuji ne mukoku wa tshimpanga bia bidimu bisatu. Pashishe ntuadile kamanda-nkutshi ne nkudimba.

10Abrame kumutuadila nyama yonsu ayi, kuyipanda nseke, kuteka luseke ne luseke bitangilangane.#15.10 Ke muvuabu benza bua kutua ndondu nansha bua kujadika bivuabu balaya. Badi bela meji ne: badi batua ndondu bavua bamba ne: tuetu katuyi balame ndondu badi mua kutuenzela muvuabu benzela nyama ayi. Yirm 34.18 udi utela mushindu wa momumue wa kujadika ndondu. Kadi kena mupande nyunyi to. 11Pashishe, nyunyi ya mikanku kupueka bua kuzokola minyinyi ya nyama ayi, kadi Abrame kuyipata.

12Ku dilolu Abrame kulala tulu tukole. Bowa ne luzakalu kumuenzabi bikole.#15.12 Yob 4.13-14. 13Maweja-Nangila kuambila Abrame ne:

— Umanye bimpe ne: ndelanganyi yebe neyisombe mu ditunga dia bende. Nebayikengeshe, ishale ku bupika bidimu nkama inayi.#15.13 Bupika mu Ejipitu: Tshim 1.1-14; MM 7.6. 14Kadi, meme nennyoke tshisamba tshikale tshiyikuata ku bupika atshi. Ndelanganyi yebe neyipatuke mu bupika ne biuma bia bungi.#15.14 Dipatuka mu Ejipitu: Tshim 12.40-41; MM 7.7. 15Wewe neukole ukulakaja, ufua ne disanka ne ditalala, ulonda bankambua bebe. 16Amu tunkanunuina tuebe tua tshikondu tshinayi netupingane mu ditunga edi kashidi. Bualu nengipate bena Amore anu pambamona ne bubi buabu budi bukengela dinyoka.

17Butuku bumane kuila, midima kuenzeka. Tshikutu tshia kapia ne ndimi yaku kupitabi pankatshi pa bitupa bia nyama bivua Abrame mupande abi. 18Dituku adi, Maweja-Nangila kutua ndondu ne Abrame muaba awu, kumulaya ne:

— Matunga#15.18 MM. 7.5. aa nengapeshe ndelanganyi yebe, biangatshile ku musulu wa Ejipitu ne ku musulu munene wa Perate. 19Ke ditunga dia bena Keni, dia bena Kenizi, dia bena Kadmoni, 20dia bena Iti, dia bena Perizi, dia bena Refayime, 21dia bena Amore, dia bena Kenaane, dia bena Ngirgashi ne dia bena Yebusa.

Currently Selected:

Tshibangidilu 15: TSH96

Highlight

Copy