Tshibangidilu 11
11
Kaleya ka Bahele
1Mu tshikondu atshi bantu bonsu ba pa buloba bavua bakula anu muakulu umuepele. 2Kadi bumuke ku luseke ludi diba dipatukila, kusanganabu mpata munene mu ditunga dia Babilone. Kuasabu muaba awu. 3Kuambilanganabu ne: “Tuenzayi tushole, tuoshe!” Bavua basa nzubu ne tushole, bibake pamue ne kabudimbu. 4Kuambilanganabu kabidi ne: “Tuasayi tshimenga tshikale ne kaleya katumbuke mulu bua tupete lumu lunene. Nanku katuakumuangalaka pa buloba bujima to.”
5Maweja-Nangila kupueka bua kubandila tshimenga ne kaleya bivua bantu abu base. 6Ke Maweja-Nangila kukema, wamba ne: “Bu mudi bantu aba bikale tshisamba tshimue, bakula muakulu umuepele, ke padibu batuadije kudienzela malu. Bidi bimueka ne: kakuena tshidi mua kubakolela kabidi. 7Nanku tuyayi kubondakaja muakulu wabu, bua bapange mua kumyuangana munkatshi muabu.” 8Maweja-Nangila kubamuangalaja pa buloba bujima. Kulekelabu diasa dia tshimenga. 9Badi babikila tshimenga atshi ne: Babele,#11.9 Babele: ke dina dia Babilone mu muakulu wa bena ebrewu. Dina adi didi diumvuija bantu ne: dibondakaja (kan. 7 ne kan. 9.). bualu Maweja-Nangila uvua mubondakajilamu miakulu ya bisamba bionsu. Kabidi uvua mumuangalajilamu bantu pa buloba bujima.
Ndelanganyi ya Sheme
10Ndelanganyi ya Sheme idi nunku: mayi a tshipupu mamane kukama, kupita bidimu bibidi, Sheme kukumbaja bidimu lukama, kulela Arpakshade. 11Sheme mumane kulela Arpakshade, kushalaye kabidi ne muoyi bidimu nkama itanu. Kulelaye balume ne bakaji.
12Arpakshade mumane kukumbaja bidimu makumi asatu ne bitanu, kulelaye Shela. 13Kushalaye kabidi ne muoyi bidimu nkama inayi ne bisatu. Kulelaye balume ne bakaji.
14Shela mumane kukumbaja bidimu makumi asatu, kulelaye Ebere. 15Kushalaye kabidi ne muoyi bidimu nkama inayi ne bisatu. Kulelaye balume ne bakaji.
16Ebere mumane kukumbaja bidimu makumi asatu ne binayi, kulelaye Pelega. 17Kushalaye kabidi ne muoyi bidimu nkama inayi ne makumi asatu. Kulelaye balume ne bakaji.
18Pelega mumane kukumbaja bidimu makumi asatu, kulelaye Reyu. 19Kushalaye kabidi ne muoyi bidimu nkama ibidi ne tshitema. Kulelaye balume ne bakaji.
20Reyu mumane kukumbaja bidimu makumi asatu ne bibidi, kulelaye Seruga. 21Kushalaye kabidi ne muoyi bidimu nkama ibidi ne muanda mutekete. Kulelaye balume ne bakaji.
22Seruga mumane kukumbaja bidimu makumi asatu, kulelaye Nahore. 23Kushalaye kabidi ne muoyi bidimu nkama ibidi. Kulelaye balume ne bakaji.
24Nahore mumane kukumbaja bidimu makumi abidi ne tshitema, kulelaye Tera. 25Kushalaye kabidi ne muoyi bidimu lukama dikumi ne tshitema. Kulelaye balume ne bakaji.
26Tera mumane kukumbaja bidimu makumi muanda mutekete, kulelaye Abrame, Nahore ne Arane.
27Ndelanganyi ya Tera, tatuende wa Abrame, wa Nahore ne wa Arane idi nunku: Arane kulela Lote. 28Kadi, patshivua Tera ne muoyi, Arane kutuila mu Ure wa bena Babilone, ditunga dia bankambua babu. 29Abrame ne Nahore kusela bakaji: dina dia mukaji wa Abrame divua Sarayi, dia mukaji wa Nahore divua Milka. Milka ne Iska bavua bana ba Arane. 30Kadi Sarayi uvua nkumba.
31Tera kuangata muanende Abrame, Lote muana wa muanende Arane ne Sarayi mukaji wa Abrame. Kumuangalaye nabu mu ditunga dia Ure wa bena Babilone, kuya kuasa mu ditunga dia Kenaane. Kusombabu mu tshimenga tshia Arane.#11.31 Arane: ke tshimenga tshivua ku mutu kua misulu ya mu ditunga dia Mezopotamiya. Bantu bavua batendelelamu ngondu bu mvidie. Ke muvuabu benza kabidi mu tshimenga tshia Ure tshivua ku manda kua misulu ya mu Mezopotamiya. 32Tera kushala ne muoyi bidimu nkama ibidi ne bitanu, kufuila mu Arane.
Currently Selected:
Tshibangidilu 11: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
