Baruke 2
2
1“Nanku, Maweja-Nangila, udi mukumbaje muuvua musue kutunyoka tuetu, balombodi betu, bavua bakosa nsambu ya bena Izrayele, bakalenga betu, balombodi betu ba matunga, bena Izrayele kabidi ne bena Yuda. 2Pa buloba kabavua banji kupeta dikenga muaba mukuabu bu diuvua mukengeshe nadi Yerushalayime. Bavua bafunda bua dikenga edi mu Mikenji ya Moshe. 3Ke patudi bafike, bua muntu kudiaye muanende wa balume, mukuabu kudiaye muanende wa bakaji.#2.3 Tangila Lev 26.27-29; Diel 28.53-57; Yirm 19.9; Yez 5.10. 4Pashishe wewe Maweja-Nangila uvua mubafile mu bianza bia makalenga onsu adi matunyungulukila, bua bantu babapende, kabidi bahele bibingu kudi bena mutumba bonsu bauvua mubatangalaje. 5Nenku, pa mutu pa tuetu kutshimuna baluishi betu, bobu bavua batupita bukole, bualu tuvua bakuenzele wewe Maweja-Nangila Mvidi Mukulu wetu bibi, katuvua balonde tshiuvua mutuambile nansha.
6“Maweja-Nangila Mvidi Mukulu wetu, katuena mua kukudiwula. Kadi tuetu ne bankambua betu, tudi ne bundu too ne lelu. 7Maweja-Nangila, makenga onsu auvua mututumine mmamane kutukuata. 8Kadi katuena balombe kuudi Maweja-Nangila bua umushe yonsu wa kutudi mu njila yende mibi. 9Nenku Maweja-Nangila, uvua amu mutumina makenga aa bua atukuate. Bionsu biudi wewe Maweja-Nangila ututumina diyi bua kuenza bidi anu pa bualu. 10Kadi katuvua bakuteleje pauvua utuambila bua tuetu kulonda mikenji iuvua mutuelele.
Bena Izrayele badi basengelela Maweja-Nangila
11“Maweja-Nangila Mvidi Mukulu wa Izrayele, ku bukole buebe ne bukitu, wewe kupatula bantu bebe mu ditunga dia Ejipitu, wewe kuenza bishima bia mishindu yonsu ne malu a dikema. Wewe kudileja muebe muudi too ne mutudi tukumona ne lelu. Mpindiewu, 12tuetu tudi bavuluke mutuvua benze bibi, bakutombokela. Tuvua bele mikenji yebe yonsu nyima. 13Kadi kutufikidi munda nansha, bualu tudi amu bantu bakese bashale mu matunga a bende audi mututangalajile. 14Maweja-Nangila muteleje patudi tukutendelela, nkulomba, mukebele luse, kudi bantu badi batutuuta mu bupika. 15Nanku, bantu ba mu buloba bujima nebamanye ne: wewe udi Maweja-Nangila Mvidi Mukulu wetu. Tuetu, tshisamba tshia Izrayele, amu wewe ke udi mutusungule munkatshi mua bisamba bikuabu.#2.15 Fuanyikija ne Diel 7.6; Mis 135.4. 16Maweja-Nangila, mulu muudi mu nzubu webe wa tshijila, ututangile, utuvuluke, muteleje, utumvuile luse, 17utabale, utumone, tudi bamanye ne: bantu badi mu kandondu ka bafue, badi bamane kukula muoyi#2.17 Fuanyikija ne Yesh 38.18; Mis 6.6. kabena mua kukutumbisha, kabena mua kumanyisha bantu muudi muakane. 18Kadi muntu udi uvua kukutumbisha, umanyisha bantu muudi muakane, ke muntu udi ukenga bikole, muikale ne nzala, udi amu mutekete mubidi, kabidi mukobama, katshiyi ujadika bidiye umona.
19“Maweja-Nangila Mvidi Mukulu wetu, nenku patudi tuvua kukusengelela bua utufuile luse, katuena batekemene bua midimu mimpe ivua bankambua betu ne bakalenga betu bakuate nansha. 20Bualu uvua mutufikile munda bikole, anu bu muuvua mumane kumanyisha bambi bebe, bena mudimu bebe ne: 21Maweja-Nangila udi wamba ne: ‘Dipuekeshayi, nukuatshile mukalenga wa bena Babilone mudimu. Nanku nenushale mu ditunga dimvua mupeshe bankambua benu.#2.21 Fuanyikija ne Yirm 27.11-12. 22Kadi bu mundi nnuambila emu, nuenu babenge mua kutumikila diyi dia mukalenga wa bena Babilone, 23nenkandike mu bimenga bia Yuda ne bia Yerushalayime, mitoyi ya tshianga mu bibilu, ne tshianga tshia mu disanka dionsu ne misambu ya batshidi babuelelaku mu dibaka. Ditunga dijima nedishale amu tshipela, kadiyi ne bantu.#2.23 Tangila Yirm 7.34.’
24“Kadi katuena bitabe diyi diebe. Katuena batumikile diyi dia mukalenga wa bena Babilone. Uvua mukumbaje miaku iuvua muambe bua kututumina makenga auvua mumane kuambila bambi bebe bena mudimu ne: mifuba ya bakalenga betu ne ya bankambua betu, nebayijule mu nkita idibu bayijike. 25Bankambua betu ne bakalenga betu mbafuile amu mu makenga mabi a nenku: ku tshiyole tshia nzala, ku muele wa mvita ne ku bupika. Bitalu biabu mbijula mu nkita, bianyika pa munya ne mashika a butuku.#2.25 Tangila Yirm 8.1-2; 36.30 ne diumvuija. 26Kadi bua nzubu udibu bantendelela, bantu mbamone muudi mumunyange bua bubi buvua bena Izrayele ne bena Yuda benze.
27“Kadi, Maweja-Nangila Mvidi Mukulu wetu, uvua mutuenzele bionsu abi ne lutulu, mutuleje kabidi luse luebe lunene. 28Bilondeshile biuvua mumane kumanyisha muntu webe, muena mudimu webe Moshe, tshikondu tshiuvua mumutumine diyi bua kufundaye mikenji yebe, bena Izrayele bonsu batangila. Uvua muambe ne: 29‘Panudi kanuyi nuteleja bindi ngamba, nansha nuenu nutanta bu munudi mpindiewu, nenushale anu bakesemu matunga andi nnutangalaja. 30Ndi mumanye ne: kanuakungitaba to, bualu nudi bantu badi bantombokela. Kadi nuenu bamane kubuela mu bupika, nenushishe kuela meji makane. 31Nanku nenuvuluke ne: Meme ke Maweja-Nangila Mvidi Mukulu wenu. Pashishe nennupe muoyi ne matshi bidi biumvua malu bialama. 32Nenutumbishe mu ditunga dia bupika didibu baya nenu. Nenuvulukemu dina dianyi. 33Nenumone kudi njila uvua bankambua benu balonde mubafikishe patuabu bantombokela meme Maweja-Nangila. Nenku, nenubenge buntomboji buenu kabidi ne buenzayi buenu.
34“Nanku nennupingaje mu ditunga dimvua mulaye bankambua benu aba: Abrahame, Izake ne Yakobe. Ditunga edi nedishale dienu. Pa mutu pa meme kunubutula, nennutantshishe bikole. 35Nentue nenu ndondu kashidi, bua meme kuikala Mvidi Mukulu wenu ne nuenu kuikala bantu banyi. Tshiena mua kunupatula kabidi nuenu bantu banyi bena Izrayele mu ditunga dindi mumane kunupa nansha.#2.35 Tun. 28-35: fuanyikija ne Lev 26.40-45; Diel 30.1-6.’
Currently Selected:
Baruke 2: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996