Malu Menza Diumvuija
Diumvuija
— Mukanda wa Malu Menza kudi Bapostolu ke mukanda muibidi uvua Luke mufunde. Mu mukanda wende wa kumpala wa Lumu lua Disanka, Luke uvua mulonde amu muvua Yezu mu bantu. Bituadija ku Dibanda dia Yezu mu diulu (1.1-11), Yezu udi ushala ne muoyi munkatshi mua balongi bende mushindu mukuabu. Kabena bamumona kabidi ne mesu abu a mubidi. Ke mudi mukanda wa Malu Menza kudi Bapostolu utuleja mbangilu wa Tshisumbu tshia bena ditaba: Yezu udi ushala munkatshi mua bantu badi bamuitaba, ku bukole bua Mueyelu wende, udi ubakankamika, ubasonsola mu midimu yabu yonsu.
Luke mmutulondele bualu ebu mushindu mulenga tshishiki. Tudi tubala mudi Tshisumbu tshia bena ditaba tshipatuka munkatshi mua bena Yuda (mudimu wa Petro), bu mu Yerushalayime, tshipatuka kabidi munkatshi mua bantu ba bisamba bikuabu, bu mu Antiyokiya, Korente nansha Filipe. Tudi tubalamu ngendu ya mupostolu Polu, ya kuasa miaba mishilangane Bisumbu bia bena ditaba. Mu mukanda ewu tudi tumona kabidi ntatu ivua Tshisumbu tshipiatshipia tshia bena ditaba nayi, ne mushindu udibu bajikije ntatu ayi ku bukole bua Mueyelu wa Mfumu Yezu.
Malu a bungi, adi Luke mufunde mu mukanda ewu, mmafumine ku malu avua Luke mufunde mu mabeji ku dituku ku dituku. Luke udi uleja patoke muvuaye mu luendu lua kumuka ku Trowase kuya ku Filipe (“TUETU kudilongolola bua kuya…” 16.10-40). Uvua kabidi mu luendu lua kuya ku Yerushalayime, kuvuabu bakuatshile Polu (20.5—21.18). Ku ndekelu uvua kabidi mu luendu lua kumuka ku Kezareya, kutua makasa ne ku Rome, kuvua Polu muindile bidimu bibidi bangabanga ne kufikaye ku tshilumbuluilu (27-28).
Mu mbangilu wa mukanda wende (1.8), Luke udi uleja dilondangana dia malu adiye mufunde:
— Muvua Tshisumbu tshia kumpala tshia bena ditaba tshibanga mu Yerushalayime, Yezu mumane kubanda mu diulu (1.1—8.3).
— Dilongesha dia Lumu lua Disanka mu ditunga dia bena Yuda (8.4—12.25).
— Dilongesha dia Lumu lua Disanka mu matunga makuabu a ku muelelu wa Mayi manene a pankatshi pa matunga, too ne ku Rome, tshimenga tshikulu tshia mukalenga wa bakalenga (13.1—28.31).
Ke muvuabu balongesha Lumu lua Disanka mu matunga onsu avua mamanyike tshikondu atshi. Tudi tubala mu tshikosu bivuabu balongesha mu mayuki ne malongesha a bapostolu adibu bafunde mu mukanda ewu. Badi batuambila ne: Yezu, Musungidi, utudi mmanyisha bantu bonsu, ne bena Yuda, ne badi kabayi bena Yuda, ke Yezu mene uvua wenda ne muoyi mu ditunga dia Palestine. Nanku Mueyelu udi amu ne mudimu wa kuvuluija balongi bende muvua Yezu, bivuaye wamba, bivuaye wenza.
Malu adibu bafunde mu mukanda wa Malu Menza kudi Bapostolu, adi avuluija bena ditaba ba bitshia bionsu mudimu munene udibu nawu: ke kumanyisha bantu bonsu, too ne ku ndekelu wa buloba, Lumu lua Disanka lua Yezu Kristu.
Currently Selected:
Malu Menza Diumvuija: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996