2 Bamakabe 12
12
Yudase udi usombuela bena Yuda ba mu Yope ne ba mu Yamniya
1Bena Yuda ne Lisiyase bamane kutua ndondu, Lisiyase kupingana kudi mukalenga. Bena Yuda pabu kutungunuka ne didima madimi abu. 2Kadi munkatshi mua banene balombodi ba tshitupa tshia buloba atshi, muvua Timote ne Apolonyuse, muana wa Ngeneyuse, Iyeronime ne Demofone,#12.2 Timote uvua utangila misoku idi dishiya dia musulu wa Yardene (tangila 1 Mak 5.6; 2 Mak 10.24). — Katuena bamanye balombodi bakuabu basatu to. pamue ne Nikanore, mfumu wa bena mvita benyi ba mu Shipre. Bonsu aba kabavua banyisha bua bena Yuda bapete dikisha, basomba mu bupole.
3Bantu ba mu Yope#12.3 Yope: ke Yafa wa mpindiewu uvua bangabanga tshisabu tshinene. kuenzabu bualu bupite bubi bua lukinu. Bavua balomba bena Yuda bavua base muabu bua kubuelabu nabu pamue ne bakaji babu ne bana, mu matu avuabu balongolola. Bavua babashima bamba ne: munkatshi muetu kamuena kalu. 4Kadi bu muvua bena mu tshimenga bonsu basuika diyi, ke bena Yuda bu muvuabu kabayi bamanye bualu, kuanyisha bualu abu, bua kuleja bena mu tshimenga muvuabu bajinga bupole. Kadi bafika munkatshi mua mayi, bena Yope kuela bena Yuda bonsu bavua mu buatu mu mayi — bantu bavua batua ku nkama ibidi.
5Yudase umvua bualu bubi buvuabu benzela bena Yuda nende, kumanyishaye bena mvita bende malu a kuenzabu. 6Bamane kusengelela Mvidi Mukulu mukoshi wa nsambu pa yoyi, kuyabu batangila kudi bavua bashipa bana babu. Kuoshabu bintu bionsu bivua muaba awu butuku, kuosha matu, kushipa ne bantu bavua baye kusokoma momu. 7Kadi bu muvuabu bakanga biibi bia tshimenga, Yudase kumuka muikale ne meji a kupingana dituku dikuabu bua kunyanga tshimenga tshia bena Yope tshijima.
8Kumanyishabu kabidi Yudase muvua bena Yamniya#12.8 Yamniya: tangila 1 Mak 5.58 ne diumvuija. bajinga mua kuenzela bena Yuda bavua basomba munkatshi muabu bia momumue ne muvua bena Yope benza. 9Yudase kubunda bena Yamniya pabu butuku, kuosha bintu bivua muaba uvua tshisabu ne matu onsu. Bena Yerushalayime bakamona kapia aku kuabu, mutantshi bu wa kilometre 45.
Yudase udi ukuata tshimenga tshia Kaspine
(1 Mak 5.9-54)
10Pashishe, Yudase ne tshiluilu tshiende bavua bashiya tshimenga tshia Yamniya, baya kubunda Timote. Bakavua mutantshi wa kilometre ibidi ne tshimenga, bua kuya kulondakaja Timote, ke kubabundabu kudi bena mvita ba bena Arabe#12.10 bena Arabe: (badi bababikila ne: bendakanyi mu kan. 11) ke ba Nabate: tangila 1 Mak 5.25 ne diumvuija. bu binunu bitanu, ne babandi ba pa tubalu nkama itanu. 11Kusanganabu mvita mikole. Kadi ku diambuluisha dia Mvidi Mukulu, bena mvita ba Yudase kutshimuna ba bena Arabe, bendakanyi ba mu tshipela abu. Kulombabu Yudase bua bumvuangane nabu. Bavua balaya Yudase bua kumupa bimuna ne kumukuatshila midimu mikuabu. 12Yudase umvua ne badi mua kumukuathila midimu ya bungi, kumyuangana nabu. Pashishe kushiyanganabu, bena Arabe kupingana ku ntenta yabu. 13Yudase kubunda kabidi tshimenga tshia Kaspine tshiyuabu bakolesha ne bimana. Bavua basombamu kudi bantu ba mu matunga mashilangane.#12.13 Kaspine: tangila 1 Mak 5.26 ne diumvuija. 14Bena mu tshimenga bavua badiamba bua bukole bua bimana bia tshimenga tshiabu, ne bua bungi bua bintu bia didia bivuabu nabi, munda mua tshimenga. Ke kusekabu bena mvita ba Yudase, babapenda kabidi bipendu bibi, basendeka ne Mvidi Mukulu mene. 15Nanku Yudase ne bena mvita bende, kuelabu mbila kudi Maweja-Nangila munene wa buloba, wakabuela Yeriko mu tshikondu tshia Yoshuwa, kayi ne bintu bia kubumbula nabi biibi,#12.15 Yeriko: tangila Yosh 6. nansha mashinyi a mvita. Ke Yudase ne bena diende kubandabu pa bimana bia tshimenga ne tshiji tshikole. 16Ne diambuluisha dia Mvidi Mukulu, kukuatabu tshimenga. Kushipabu bantu bapite bungi. Dijiba dia mayi divua muaba awu, dikale ne buondoke bua metre nkama isatu makumi muanda mutekete, divua dimueneka diuwule tente ne mashi avua mapuekelamu.
Yudase udi utshimuna mu Karnayime
(1 Mak 5.37-44)
17Yudase ne bena mvita bende bamane kumuka mutantshi bu wa kilometre lukama ne makumi anayi ne tshimenga tshia Kaspine, kufikabu mu Karakse, muaba uwa bena Yuda bawabu babikila ne: bena ditunga dia Tobiye.#12.17 Karakse: muaba mukole wa Timote mu buloba bua Amane, luseke ludi diba dipatukila lua musulu wa Yardene, muaba udibu basombe kudi mulombodi wa tshitupa tshia buloba etshi. — Tobiye: tangila diumvuija mu 1 Mak 5.13. 18Kabavua basangana Timote to, bualu ukavua mumane kumuka muaba awu kayi muenza bualu. Uvua mushiye muaba umue, tshisumbu tshia bena mvita. 19Kadi Dositeye ne Sosipatere, balombodi banene ba tshiluilu tshia Makabe, kuyamu, kubutula bantu bonsu bawa Timote mushiye mu nzubu wa bena mvita, bawa bapite pa binunu dikumi. 20Kuvua Yudase eku, kukosololaye bena mvita bende mu bisumbu. Kutekaye bantu ku mutu kuabi, kuasa dilondakaja Timote. Kadi Timote uwa ne bantu binunu lukama ne makumi abidi bia bena ku makasa ne binunu bibidi ne nkama itanu bia babandi ba pa tubalu.
21Timote umanya bualu bua difika dia Yudase, kutumaye bakaji ne bana ne bintu biabu mu Karnayime. Musoku awu uwa muaba mukole, uvuabu kabayi mua kukuata lukasa. Njila ya kuyamu ivua mibulakane,#12.21 Njila mibulakane: njila eyi ivua miondola kudi minkoloji ya mayi ivua ipitshila pabuipi ne muaba ewu. bantu kabayi mua kupitshilamu bimpe to. 22Ke tshisumbu tshia bena mvita tshia Yudase tshia kumpala kumueneka.#12.22 tshisumbu tshia bena mvita tshia Yudase tshia kumpala kumueneka: badi mua kuandamuna kabidi ne: tshisumbu tshia mvita tshiwa Yudase ulombola kudianza kufika kumpala. Bena mvita ba Timote kukuatshika bowa. Mvidi Mukulu mukua lumona, kubamuenekela, kubueja buowa mu mitshima yabu. Kunyemabu ku nseke yonsu, aba baya eku, aba baya kuaka. Kutapanganabu bobu nkayabu. Miela yabu kubatua kabidi. 23Yudase kubalondakaja muende muonsu, kubashipa ku muele, bantu bu binunu makumi asatu. 24Bena mvita ba Dositeye ne ba Sosipatere kukuatabu Timote. Kubalombaye bua bamulekele aye. Uwa wamba ne: tuakuatshi bana benu ba bungi, nuenu bangenzela bibi, nenku nebabashipe pabu. 25Yeye mumane kubalaya mua kulekela bana babu amu bimpe, bobu kumulekela bua kupandisha bana babu abu.
26Pashishe, Yudase kuya mu Karnayime, muaba udi nwidie mukaji Atargatise,#12.26 muaba…Atargatise: (nansha Astarte) tangila 1 Mak 5.43 ne diumvuija. kushipeshamu bantu balume binunu makumi abidi ne bitanu.
Yudase udi upingana mu Yerushalayime, mumane kutshimuna
(1 Mak 5.45-54)
27Yudase mumane kutshimuna baluishi, kuyaye ne tshiluilu tshiende bua kuluisha tshimenga tshia Efrone, tshivuabu basombe kudi bantu ba misoku misanga.#12.27 Mu mikanda mikuabu ya kale mbafunde ne: muaba uvua Lisiyase musombe ne bantu. Bansongalume ba dikanda kuelabu mualu kumpala kua bimana bia tshimenga, kuluanganabu ne disuminyina. Mu Efrone amu, bavua balama bintu bivule: mashinyi a kuluangana nawu ne bintu bia kuela baluishi. 28Kadi bena Yuda bamane kutendelela Maweja-Nangila, udi ntangalaja baluishi nduu, kukuatabu tshimenga. Kushipabu bantu bu binunu makumi abidi ne bitanu bavua munda mua tshimenga.
29Bumuka amu, kuyabu kuluisha Shitopolise,#12.29 Skitopolise nansha Bete-Sheyane: tangila diumvuija mu 1 Mak 5.52. tshimenga tshivua mutantshi bu wa kilometre lukama ne makumi abidi ne tshimenga tshia Yerushalayime. 30Bena Yuda bavua basomba mu tshimenga, bavua bamanyisha Yudase malu mimpe avua bena Skitopolise babenzela, ne muvuabu babakidila bimpe diba divuabu mu dikenga. 31Ke Yudase ne bavuaye nabu kuela bena Skitopolise tuasakidila, kubakolesha ku muoyi bua bashale amu bumvuangana ne bena Yuda matuku adi kumpala. Yudase ne bena diende kufikabu mu Yerushalayime bualu matuku a tshibilu tshia Dinowa akavua pabuipi.
Yudase udi utshimuna bena mvita ba Ngorjiyase
32Tshibilu tshia Dinowa tshimana kupita, Yudase ne tshiluilu tshiende kuluisha Ngorjiyase, mulombodi wa buloba bua bena Edome.#12.32 Edome: tangila 10.14 ne diumvuija. 33Ngorjiyase kuya bua kubaluisha ne bena mvita ba ku makasa binunu bisatu ne babandi ba pa tubalu nkama inayi. 34Kuluanganabu mvita ayi. Bena Yuda bakafua ba bungi. 35Muntu mukuabu diende Dositeye uvua muena mvita wa mukitshi, mubandi wa pa nyama wa kabalu, wa mu tshisumbu tshia bena mvita ba mu ditunga dia Bakenore. Kukuataye Ngorjiyase, muntu mubi ewu mu bilamba, kumupulumuna ne lungenyi lua kumukuata ne muoyi. Kadi muena mvita kampanda wa bena Trase,#12.35 Dositeye: muena Yuda mulombodi wa bena nwita uvua mukuate Timote (tangila kan. 24). — tshisumbu tshia bena Bakenore: mu mikanda mikuabu ya kale mbasakidile ne: muena Tobiye (tangila diumvuija mu 12.17) — Trase: buloba budi pankatshi pa Masedoniya ne Mayi manene a luepu; bena Seleyuside bavua bangata benyi ku mudimu wa bena nwita. kudielaye kudi Dositeye, kumukosa diboku. Nanku Ngorjiyase kunyema kuya ku luseke lua Mareka.
36Kadi bu muvua bena nwita ba Azarya bamane kuluangana mukungulu mule, kupungilabu bikole. Yudase kusengelela Maweja-Nangila bua ikale ku tshiabu, alombole mvita yabu. 37Yudase wakela lubila lua nwita mu muakulu wa batatuende,#12.37 muakulu wa batatuende: tangila 7.8 ne diumvuija. wimba ne musambu, ubanga mvita. Ke bantu ba Ngorjiyase kunyema nduu.
Yudase udi ulambula mulambu bua bafue
38Bamane kuluangana, Yudase mumane kusangisha tshiluilu tshiende, kutshifilaye mu tshimenga tshia Adulame. Bafikilemu mu dituku dia muladilu wa dituku dia Dikisha. Nanku kudilongololabu bu muvua tshibidilu tshiabu.#12.38 Adulame: tangila 1 Sam 22.1 ne diumvuija. — bu muvua tshibidilu: tangila Dib 19.11-12. Pashishe, kuenzabu tshibilu tshia dituku dia Dikisha pa muaba awu.
39Dituku divua dilonda dia Dikisha, Yudase ne bena mvita bende, kabawa mua kuindila bua kusangisha bitalu bia bafue babu bashipe mu mvita. Kuyabu kubijika mu nkita ya bankambua babu. 40Kadi kusanganabu mu bilamba bia yonsu uvua mufue, mpingu ya nwidie ya mu Yamniya#12.40 Yamniya: tangila 1 Mak 5.58 ne diumvuija. — mikenji ya Mvidi Mukulu mikandike: tangila Diel 7.25-26. ivua mikenji ya Mvidi Mukulu mikandike bena Yuda bua kabangatshi. Bonsu kujadika kafuila ka basalayi abu. 41Ke bonsu kutumbisha Maweja-Nangila, mukoshi wa nsambu pa yoyi, udi usokolola bidi bisokome. 42Kutendelelabu, balomba bua Mvidi Mukulu abalekele tshilema atshi. Kadi tshilobu tshiabu, Yudase kubela bena mvita bua badilame ku bubi buonsu, bualu nkayabu bavua badimuenena tshiwa tshienzekela bawa benza bibi.
43Kusangishaye lupetu ku muntu ku muntu, lua nkanu mitoke ya mushinga mukole bu binunu bibidi. Kulutumaye mu Yerushalayime bua kulambulabu mulambu wa pa mibi ya bafue. Bavua benza bualu buimpe bua kutumbisha, baleja ne: bavua bitaba dibiika dia bafue. 44Bulelela, bu yeye kayi muitabe ne: bena mvita bafue aba nebabiike, kusankidila bua bafue kuvua mua kuikala bualu bua patupu, bua dibula dia lungenyi. 45Kadi Yudase uwa muitabe, mujadike ne: Mvidi Mukulu neasankishe bamulamatshi bende. Ke meji mimpe, makanyine muntu wa Mvidi Mukulu avuaye nawu. Ke pawaye wenzeja mulambu ewu mu dina dia bafue, bua babalekele bibawu biabu. Mibi yabu ijimine.
Currently Selected:
2 Bamakabe 12: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996