1 Bamakabe 6
6
Mukalenga Antiyokuse IV udi usama, ufua
(2 Mak 1.11-17; 9; 10.9-11)
1Mukalenga Antiyokuse kupitshila mu Mezopotamiya. Kumvuaye batela lumu lua Elimayise,#6.1 Tangila 3.37 ne diumvuija. — Elimayise: ku dina edi, kabena bamanye tshimenga nansha tshimue to, mbamanye amu buloba budi butuangane ne bena Suse, tshimenga tshikulu tshia bena Persa (tangila Yudt 1.6). tshimengatshiamuditunga dia bena Persa. Bavua bamba ne: mu Elimayise mudi bubanji buvule, mudi nkanu mitoke ya mushinga mukole mivule ne mpawungi. 2Kabidi mu nzubu wa nwidie wabu mudi biuma tente, bia lufu bienza ne mpawungi, nkonka ne bia mvita bivuabu bashiye kudi Aleksandre wa Filipe, mukalenga wa bena Masedoniya, uvua mudianze kudia bumfumu mu bena Ngreke. 3Antiyokuse kuya mu tshimenga atshi. Kukebaye mua kutshikuata ne kupawula bintu bia mu tshimenga. Kadi bualu abu kabuvua bukumbane to, bualu bena mu tshimenga bakaya bamanye meji avuaye nawu. 4Bavua bamuluisha mvita, bamutshimuna. Ke kumukaye muaba awu ne tshiji tshikole, kupingana mu Babilone.
5Mu Persa bavuile kumumanyisha muvua bena Yuda batshimune biluilu bivuaye mubatumine. 6Lisiyase uvua muyemu ne bena mvita ba bukole bupite. Kadi bena Yuda kumutshimuna. Nenku bena Yuda bavua ne bukole bua bungi, bualu bavua banyenga bena tshiluilu bavuabu batangalaje, bintu bia lufu, biuma ne bintu bikuabu mu mvita. 7Bena Yuda bavua babumbula “tshintu tshibi tshia kabutu,” tshivua Antiyokuse muibake pa tshilambuilu tshia mu Yerushalayime. Kabidi bavua bamane kukolesha muaba wa tshijila ne bimana bile bu muvuabi bangabanga. Bavua bakolesha kabidi tshimenga tshiyuabu banyenga mukalenga tshia Bete-Sure ne bimana.#6.7 “tshintu tshibi tshia Kabutu”: tangila 1.54 ne diumvuija. — Bete-Sure: tangila diumvuija mu 4.29.
8Mukalenga umvua malu awu, kupetaye bowa ne luzakalu, kuyaye mu bulalu mupungile. Kupetaye disama dimutekesha, bualu tshivuaye mujinge ki ntshikumbane to. 9Kushalaye mu bulalu matuku mavule. Malu aa avua mamutekesha mu maboku. Kumanyaye ne: ndi ne bua kufua. 10Kubikidishaye “balunda ba Mukalenga#6.10 balunda ba Mukalenga: tangila diumvuija mu 2.18.” bonsu, ubambila ne:
— Tshiena ne tulu kuisu nansha tukese, dikenga ndimpite. 11Ke meme kudiambila mundamunda ne: Ndi ndiabakena nenku bua tshinyi? Kadi mvua musankishe bantu, bantu bavua bannanga, diba dintshivua mu bukalenga! 12Kadi mpindiewu meme kutuluka mianda mibi imvua muenzele bena Yerushalayime. Mvua muangate bintu bionsu bia mpawungi ne nkanu mitoke ya mushinga mukole bivuamu. Meme kutuma bantu bua kubutula bantu bonsu ba mu tshimenga, kapayi bualu. 13Ndi njadika ne: disama dindi nadi edi mbua bualu abu. Mona nkadi mfua muteketangana mu ditunga dia bende.
14Kubikidishaye Filipe, umue wa ku “balunda ba Mukalenga.” Kumupeshaye bulongolodi bua ditunga dijima. 15Kumupaye tshifulu tshiende tshia bukalenga, muntumpu ne tshitampi tshiende. Kumupaye ne mudimu wa kukuba muanende Antiyokuse,#6.15 Antiyokuse: Antiyokuse V. bua amone mua kuakanyina bukalenga. 16Mukalenga Antiyokuse kufua mu Persa mu 149.#6.16 Mu ngondu wa tshitema wa mu 164 bgbg ne Y.K. 17Liziyase umvua ne Antiyokuse wafu, kutekaye muana wa Antiyokuse, uvuaye mukoleshe ne mulongolole biangatshile ku buana buende, mu bukalenga, pa muaba wa tatuende. Kuinyikaye kabidi muana dina dia Epatore.#6.17 Lisiyase: tangila 3.22. — Epatore: dina edi didi diumvuija ne muana wa balume wa muntu muneme.
Yudase udi unyungulula tshimana tshia Yerushalayime ne nwita
18Tshikondu atshi baluishi batshivua mu tshimenga tshia Davide.#6.18 Tangila 1.33. Kujikilabu bena Izrayele mu nzubu wa Mvidi Mukulu. Kubenzelabu bibi mishindu yonsu, kabidi kukoleshabu benyi mu maboku. 19Yudase Makabe kushindika mua kubabutula. Kubikidishaye bantu bonsu bua kubela munkatshi ne nwita. 20Kukungilabu, bua kuluisha tshimenga atshi mu tshidimu tshia lukama ne makumi atanu.#6.20 tshidimu tshia 150: mu 163-162 bgbg ne Y.K. Kuenzabu bintu bua kukuata nzubu ne kubumbula bimana. 21Kadi bamue baluishi ba ku bavua munda mua nzubu kupatukamu, kubuelakana pamue ne bena Yuda bapange ditaba. 22Kuyabu kua mukalenga Antiyokuse Epatore, bamuamba ne:
— Udi muindile too ne ku diba kaayi bua kunyoka bena lukuna betu, ne bua kusombuela balunda betu? 23Tuetu tudi badisuike bua kuenzela tatuebe mudimu, bua kulonda meyi ende ne kuenza tshidiye musue. 24Pa kumona nanku, bana betu menemene bakadi bashala baluishi betu.#6.24 baluishi: mikanda mikuabu idi isakidita ne: bavua bela tshimenga munkatshi ne mvita. Mbashipe too ne bamue ba kutudi bavuabu bapete, biba kabidi bintu bietu. 25Ki mbatubunde amu tuetu kayetu to, mbabunde kabidi matunga atudi nawu mutumba. 26Lelu bakadi baluisha ne muaba mukolesha wa mu Yerushalayime bua bashalemu bamfumu. Mbakoleshe nzubu wa Mvidi Mukulu, kabidi ne tshimenga tshia Bete-Sure#6.26 Bete-Sure: tangila 4.29 ne diumvuija. ne bimana bile. 27Wewe kuyi mukebe mua kukosolola malu aa lukasa, nebenze makuabu mapite audi kuyi mua kukandika.
Mukalenga Antiyokuse V udi uluisha bena Yuda
(2 Mak 13.1-17)
28Mukalenga Antiyokuse mumane kumvua bionsu abi, kufikaye munda, kusangishaye “balunda ba Mukalenga” bonsu, balombodi ba mvita ba tshiluilu tshia ku makasa ne ba tshia babandi ba pa tubalu. 29Uvua mufute kabidi bena mvita ba mu matunga a benyi, kabidi ne ba mu bidila bia bena Ngreke, bua kumuambuluisha. 30Bena nwita bavua benda ku makasa bavua binunu lukama, babandi ba pa tubalu binunu makumi abidi, ne nyama ya tupumbu makumi asatu ne ibidi, ivuabu bibidije bua mvita. 31Antiyokuse ne bena mvita bende, bavua bapitshila ku Idumeya, bajinga tshimenga tshia Bete-Sure. Kusanganabu matuku mavule. Kuenzabu matempu a mvita.#6.31 Idumeya: tangila diumvuija mu 3.41. — matempu a mvita: tangila diumvuija mu 5.30. Kadi bantu abu kupatukabu, kuluangana ne bukitu, kutua bintu bia mvita kapia. 32Ke Yudase kumuka ku tshimenga tshia Yerushalayime, kuasa mitanda yende mu tshimenga tshia Bete-Zekarya,#6.32 Bete-Zekarya: mutantshi wa kilometre 9 ku mutu kua Bete-Sure, mutantshi wa kilometre 20 ne Yerushalayime. bitangilangane ne mitanda ya mukalenga. 33Mukalenga ujuka dinda dionsu, kutuma tshiluilu tshiende tshijima ku njila wa ku Bete-Zekarya. Bena nwita bende kudilongolola ku nwita, kuelabu mpungi. 34Kuangatabu mayi a tumuma tua nwinyo ne makuabu bu a tumuma tua mbelebela, kumusha nyama ya tupumbu bua kuyijula lonji lua nwita. 35Kuabanyabu nyama munkatshi mua bisumbu bia bena nwita.#6.35 bisumbu bia bena mvita: bakuata mafuma male, bababuikila kudi ngabu yabu, batuangana pamue, munkatshi mua nyama ya nzevu mituangane mbesa. Pabuipi ne nyama yonsu bavua bateka bantu tshinunu bavuala kazaku ka tshiamu, kabidi basa tshifulu tshia tshiamu tshikunze, batekamu kabidi babandi ba pa tubalu bapiluke nkama itanu. 36Babandi abu bavua bamanye muonsu muvua nyama, baya nende kabidi miaba yonsu ivuaye ne bua kuya. 37Pa nyama yonsu, mbenzelepu kaleya kakole ka mabaya kasuika ne mikaba. Kaleya aka kavua kajika bena mvita kudi baluishi. Mu kaleya kuonsu muvua baluanganyi ba pa nyama ya nzevu basatu ne muludiki umue. 38Mukalenga uvua muteke babandi ba pa nyama ya tubalu bavua bashala ku dia balume ne ku dia bakaji kua milongu ya baluanganyi ba ku makasa, bua kubambuluisha ne bua kuluisha Yudase.
39Pavua nkenke ya diba itua mu ngabu ya mpawungi ne ya tshiamu tshikunze, bukenke buvua bavua ku mikuna, ngabu itema bu tshimunyi tshia kapia. 40Tshiluilu tshia mukalenga kuya tshitupa kulu kua mukuna, tshinga kuinshi. Bavua benda mu milongu, kabayi batshina. 41Bonsu bavua ne dipampakana pa kumvua mikuma ya bia mvita bivua bipitakana, ne mikuma ya bantu pa kuenda. Bushuwa tshiluilu etshi tshivua tshinene ne tshikole kabidi.
42Yudase ne tshiende tshiluilu kuya bua kubanga mvita. Ke kushipabu bena mvita ba mukalenga diakamue nkama isambombu. 43Elazare, muinyika Awarane,#6.43 Elazare: muakuniende wa Yudase Makabe. kumona umue wa ku nyama mibuikila tshilamba tshia tshiamu, tshileja lumu lua mukalenga, mupite mikuabu yonsu ku bule. Kuelaye meji ne mukalenga mmubandepu. 44Ke kudielaye bua kupandisha tshisamba tshiabu, ne bua kupeta dina dia kadiyi dijimine. 45Ne dikima dionsu, kudituaye munkatshi mua bena tshiluilu mutangila kudi nyama. Elazare kushipa ku dia balume, kushipa ku dia bakaji. Baluishi bamone nanku, kuanji kumushila muaba ku nseke yende. 46Kudituaye muinshi mua tshiadi tshia nyama, kumututa bikole, kumushipa. Nyama kudiupuila panshi pambidi pa Elazare, kumushipa pende. 47Bena Yuda bamone muvua tshiluilu tshia mukalenga tshiluangana ne bukole buonsu, kutangalakanganabu.
Antiyokuse udi unyunguluka mukuna wa Siyone ne mvita
(2 Mak 13.18-23)
48Tshiluilu tshia mfumu kuya mu Yerushalayime bua kuluangana mvita ne bena Yuda. Mfumu uvua uluisha ditunga dia Yudeya, kabidi ne mukuna wa Siyone. 49Kumvuanganabu ne bena Yuda ba mu tshimenga tshia Bete-Sure. Bobu kumuka mu tshimenga, bualu kabatshivua nansha ne kantu ka kudia. Tshidimu atshi tshivua tshia Dikisha,#6.49 Tangila Lev 25.1-7. bantu kabayi badima. 50Mukalenga kukuata tshimenga tshia Bete-Sure, kutekamu tshisumbu tshia bena mvita bua kutshilama. 51Mukalenga kunyungulukila ne mvita matuku mulongu mukuna uvua ne nzubu wa Mvidi Mukulu. Kuasaye bintu bishilangane bia kuluangana nabi: matempu avua alama bena ndudi, bintu bia kushimbula nabi bimana, bia kuosha nabi nzubu, bia kuela nabi mabue, bia kuela nabi miketa ne bia kuela nabi nsoka. 52Bena Yuda kuenza pabu binga bia lufu bua bamone mua kubundangana ne tshiluilu tshia mukalenga. Kuluanganabu mutantshi mule. 53Kadi biakudia kujika mu mayeba a ku nzubu wa Mvidi Mukulu. Kushalamu mutupu. Bualu bivua tshidimu tshia muanda mutekete tshia Dikisha, kabidi bena Izrayele bavua kua bende, bapingana mu Yudeya, bakavua bajikija biakudia bivua bishale. 54Kushiyabu amu bantu bakese mu muaba wa tshijila. Bualu bua tshiyole, bakuabu kutangalaka muntu kuabu muntu kuabu.
Antiyokuse V udi wanyisha bua bena Yuda batendelele
(2 Mak 13.23-26; 11.22-26)
55-56Diba adi, Lisiyase kupeta lumu ne: Filipe udi utumina ku Persa ne ku Madayi pamue ne bena mvita bavua ne mukalenga. Kupetaye kabidi lumu ne: Filipe udi ukeba mua kulombola malu onsu a mu bukalenga. Antiyokuse IV kayi muanji kufua, uvua muteke Filipe bua kukolesha Antiyokuse muana#6.55-56 Lisiyase: tangila 3.32. ne kumulongesha malu a bukalenga. 57Pumvua Lisiyase bualu abu, kudilongolola lukasa bua kumuka. Kuambilaye mukalenga ne bamfumu ba tshiluilu ne bena tshiluilu bonsu ne:
— Tudi tuteketa ku dituku ku dituku. Biakudia bitudi nabi bidi bikepa ku kakese ku kakese. Muaba utudi banyungulukila udi muaba mukole. Kabidi kudi malu adi atangila bukalenga atudi ne bua kuakaja. 58Tukebayi diumvuangana ne bena Yuda, tukebayi nabu bupole, kabidi ne ditunga diabu dijima. 59Tubanyishayi bua balonde bikadilu biabu bitudi babenge. Bavua batomboke, bajule tshimvundu, bualu tuetu tuvua bakandike bibidilu biabu.
60Mukalenga ne banene bende kuanyisha dilomba adi. Lisiyase kutumina bena Yuda mukanda, ubamanyisha mmuabu bela meji amu. Bena Yuda kuanyisha pabu. 61Mukalenga ne banene bende bamane kujadika diakula diabu ne mutshipu, ke bena Yuda kushisha kupatuka mu muaba mukolesha wa bena mvita. 62Kadi mukalenga kubanda pa mukuna wa Siyone, umona muvuabu bakolesha muaba wa tshijila awu. Kupulaye mutshipu wende, kutumaye diyi bua banyangakaje bimana. 63Pashishe kuyaye ne lubilu luonsu, kupinganaye mu Antiyokiya, muvuaye musangane Filipe mumane kukuata tshimenga. Kumubundaye, kumunyenga tshimenga ku bukole.
Currently Selected:
1 Bamakabe 6: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996