1 Bamakabe 1
1
Bukalenga bua Aleksandre munene
1Aleksandre munene muana wa mukalenga Filipe, kumukaye mu ditunga diende dia Masedoniya, bua kuluangana mvita. Kudiaye bumfumu bangabanga mu ditunga dijima dia bena Ngreke.#1.1 Daryaveshe udi mua kuikala Daryaveshe 111 uvuabu baluishe kudi Aleksandre ku Isose mu tshidimu tshia 334 bgbg ne Y.K. — ditunga dijima dia bena Ngreke: ke bena Ngreke, kabidi ne bena ku luseke lua Aziya Mukese ludibu base kudi bena Ngreke. Mumane kutshimuna Daryaveshe, mfumu wa bena Persa ne bena Madayi, Aleksandre kupingana pa mutu pende mu bukalenga. 2Kubangaye mvita mivule, kukuata bimenga bivua bikolesha ne bimana, kushipa bamfumu ba matunga avuaye mukuate. 3Kutungunukaye ne mvita too ne ku ndekelu kua matunga. Kupawulaye bintu bivule mu matunga a benyi. Buloba kutalala mu matuku a bukalenga buende. Muoyi kumulunduka, ditambisha kupita, kushalaye muena dikamakama. 4Kukungijaye tshiluilu tshikole, kutekesha bantu ba mu bitupa bionsu bia ditunga diende, ba mu matunga makuabu ne bamfumu bawu mene. Kubambilaye bua bamulambule milambu.
5Pashishe disama kumutekesha. Ku-diumvuaye ne lufu. 6Kubikidishaye baneme bavuaye nabu patshivuaye muana. Kubabanyinaye bukalenga buende bangabanga ne lufu luende.
7Aleksandre wakalala mvula dikumi ne ibidi mu bukalenga, kufuaye. 8Aleksandre ufua, baneme abu kuangata bukalenga, muntu muabu muntu muabu.#1.8 Aleksandre ufua, balombodi ba bena mvita bende kuabanyanganabu bukalenga buende. 9Bonsu kuasa tshifulu tshia bumfumu, kushala bapinganangana bobu ne ndelu yabu bidimu bivule. Kuvudi-jabu makenga mapite pa buloba.
Bena Yuda badi bangata ngikadilu ya bena Ngreke
(2 Mak 4.7-17)
10Munkatshi muabu kupatukamu muntu mukuabu, diende Antiyokuse Epifane, muana wa mfumu Antiyokuse. Bamane kumupatula ku bupika ku bena Rome, kudiaye bumfumu mu bukalenga bua bena Arame, mu tshidimu tshia 138.#1.10 Antiyokuse: ke Antiyokuse III. 11Mu matuku awu bamue bena Yuda bashipianganyi, bavua balobesha bantu, babambila ne: “Tumvuangane ne matunga makuabu. Bualu dipangakana dietu nabu edi ke didi dituvudijila makenga.” 12Bena Izrayele kuanyisha muabambidibu amu. 13Bamue bantu kuyabu kudi mukalenga, kupetabu dianyisha dia kulonda bibidilu bia mu matunga a bende. 14Kuasabu tshipalu#1.14 Muaba uvuabu benzela manaya, bavua banaya amu butaka. tshia manaya mu Yerushalayime bu muvuabu benza mu bimenga bivua bilonda bibidilu bia matunga makuabu. 15Bavua badienzeja bua bikale bu badi kabayi bateka panshi,#1.15 Tangila 1 Kor 7.18 ne diumvuija. balekela ndondu wa tshijila pa kudisanga ne benyi. Kabidi bavua benza manga malu mabi mapite.
Mukalenga Antiyokuse udi uluisha bena Ejipitu
16Pakamona mukalenga Antiyokuse ne: bukalenga buanyi budi bukole, ujingile mua kutshimuna bena mu Ejipitu, bua ikale mukalenga mu matunga onsu abidi. 17Kubuelaye mu ditunga dia Ejipitu ne tshiluilu tshikole, matempu, nyama ya tupumbu, kabidi ne matu mavule manene. 18Kubundaye Ptolemeye, mukalenga wa ditunga dia Ejipitu. Awu kukuatshika bowa, kunyema. Bantu bende bavule kufua mu mvita ayi. 19Antiyokuse kukuata bimenga bia Ejipitu bivua bikolesha ne bimana. Antiyokuse kukalama nabi, kunyenga bionsu bivua mu bimenga. 20Kutshimunaye Ejipitu. Mu tshidimu tshia 143,#1.20 mu tshidimu tshia 143: ke mu muvu wa mashika mu 169 bgbg ne Y.K. kubandilaye bena Izrayele ne bena mu Yerushalayime tshianza panshi, kabidi ne tshiluilu tshikole.
Mukalenga Antiyokuse udi upawula bintu bia mu muaba wa tshijila
(2 Mak 5.11-21)
21Mukalenga kubuela mu muaba wa tshijila ne ditambisha, kupawula tshilambuilu tshia mpawungi, tshitekelu tshia miendu ne bionsu bivuaku, 22mesa a kulambuila mampa, mabungu a bintu bia muendundu bia milambu, makopu ne mbabula ya tshiamu tshia mpawungi, bilamba ne bifulu bia mushinga mukole.#1.22 Tangila 1 Bak 7.48-49. Bilengejilu bia mpawungi bivua ku tshimana tshia kumpala kua nzubu wa Mvidi Mukulu, wakabilamuna bionsu. 23Kuangataye kabidi ne nkanu mitoke ya mushinga mukole, mpawungi ne bintu bikuabu bia mushinga mukole ne bionsu biakasanganaye bivua bantu basokoke momu amu. 24Mumane kuangata bintu bionsu nanku, ke kupinganaye kuende, mumane kushipa bantu bavule, kabidi muakule miaku ya diditambisha mipite bubi.
25Bantu kudilangana mu ditunga dijima, bua Izrayele.
26Bamfumu ne bakulu kudila bujindajinda.
Nsongalume ne nsongakaji kuteketa mubidi.
Bakaji kualuluka mibidi, kuvuandulukayi.
27Utshidi uselelaku kuasa madilu.
Kabidi mukajende munda mua nzubu wende, kuasa muadi.
28Buloba kuzakala pa kumona dikenga dia bena Izrayele.
Bantu bonsu kukuatshika bundu.
Badi bakolesha tshimenga tshia Yerushalayime
(2 Mak 5.24-26)
29Bidimu bibidi bimane kupita, mukalenga kutuma mulombodi wa bena mvita mu bimenga bia bena Yuda. Mulombodi awu kufika mu Yerushalayime ne tshiluilu tshikole. 30Kuambilaye bantu malu a ditalala, kadi uvua wakula ne budimu. Bantu bonsu kumuitaba. Pashishe kubundaye mvita mu tshimenga, bantu kabayi bamanye. Kunyangaye tshimenga bikole. Kubutuishaye bantu bavule ba bena Izrayele. 31Kupawulaye bintu bia mu tshimenga, kuosha tshimenga, kushimbula nzubu ne bimana bia tshimenga. 32Bena mvita kukuata bakaji ne bana ku bupika. Kuangatabu kabidi ne bimuna.
33Pashishe kuasululabu tshimenga tshia Davide tshikale ne bimana bitumbuke kabidi bikole. Kuasabu ne tuleya tukole. 34Kutekamu musumba wa bena Yuda bashipianganyi bavua bitaba malu abu ne meyi abu. 35Kukungijilamu bia lufu ne biakudia kaba kamue, kutekapu bintu bionsu bivuabu bibe mu Yerushalayime. Tshimenga tshikole etshi kushalatshi njiwu ya mulunguluku bua bena Izrayele.
36Nzubu wa Mvidi Mukulu kushala mu njiwu.
Misangu yonsu bavua benza malu a kuluisha bena Izrayele,
37bashipa bantu badi kabayi bualu ku tshilambuilu,
banyanga muaba wa tshijila.
38Bavua babambidika bena Izrayele bua kunyema.
Tshimenga kushala tshia benyi,
kushala tshia benyi kudi bana batshi balela,
bavuabu benzeja ku bukole bua kumukamu.
39Muaba wa tshijila kushala mutupu bu tshipela.
Bibilu kuandamuka madilu,
bavua bapepeja matuku a Dikisha,
badiombola nzubu wa lumu.
40Kadiwu kavua kapita ne lumu luvua mu tshimenga,
kumpala bavua batumbisha tshimenga,
mpindiewu bakadi batshipepeja.
Mukalenga Antiyokuse udi ukandika bena Yuda mua kutendelela Mvidi Mukulu
(2 Mak 6.1-11)
41Mukalenga Antiyokuse kutuma diyi bua bantu bonsu ba mu bukalenga buende benze tshintu tshimue. Muntu yonsu alekele bibidilu biabu. 42Bantu bonsu ba mu matunga makuabu kuitaba diyi dia mukalenga adi. 43Kadi bena Izrayele ba bungi kuanyisha ditendelela divua mukalenga muambe, kulambula nwidie milambu, kupetula dituku dia Dikisha. 44Mukalenga kutuma bantu ne mikanda mu Yerushalayime ne mu bimenga bionsu bia Yuda, welela bantu diyi bua balonde bibidilu bidi kabiyi bia ditunga, 45balekele kulambula milambu mikuabu ya mu muaba wa tshijila ne milambu ya kuosha, ya bukula ne ya muendundu mene, bapetule matuku a Dikisha ne a bibilu, 46banyange muaba wa tshijila kabidi ne bintu bijidila, 47bashile nwidie bilambuilu, miaba ya tshijila, mu nzubu balambule ngulube ne nyama ya mikiya,#1.47 ngulube: tangila Lev 11.7-8, ngulube uvua nyama uvua ne mikiya, kabavua bamudia nansha bamulambula to. 48balekele kuteka bana panshi, benze malu mabi mishindu mishilangane bu bantu badi ne mikiya, 49bua bamone mua kupua meyi a Mvidi Mukulu muoyi, bandamune bibidilu biabu. 50Muntu yonsu wabenga kuenza mudi mukalenga muambe awu, tshiende amu lufu. 51Ke miaku ivua mukalenga mufundile bantu bonsu ba mu bukalenga buende. Kutekaye banene ba mu bukalenga buende badi mua kuenda batangila bantu, bakeba mua kumanya ne: mu bimenga bionsu bena Yuda badi balambula nwidie milambu. 52Bena Yuda bavule bavua balekela kulonda meyi a Moshe, bitaba ku diyi dia banene ba mu mbulamatadi abu. Kuenzabu malu mabi mapite mu ditunga. 53Ngikadilu wabu uvua musake bena Izrayele bitabi ba diyi mua kuyabu kusokoma miaba yonsu ivuabu mua kuya. 54Mu tshidimu tshia 145, mu dituku dia dikumi ne ditanu dia ngondu wa dikumi ne muibidi, mukalenga kuasa tshintu tshibi tshia “Kabutu”#1.54 Mu tshidimu tshia 145: ke ndekelu wa ngondu wa dikumi ne muibidi mu 167 bgbg ne Y.K. — tshintu tshibi tshia “Kabutu”: tshilambuilu tshia Zeyuse, nwidie wa bena Ngreke; fuanyikija ne Dan 9.27; 11.31; 12.11; Mat 24.15. pa tshilambuilu tshia milambu ya kuosha. Kuimanyikabu kabidi ne bilambuilu bia kutendelela nwidie mu bimenga bikuabu bia bena Yuda. 55Kuoshabu musenga wa kamonya ku mishiku ya mbelu ne mu misesu. 56Kupandabu mikanda ya Meyi ivuabu basangana, kuyela mu kapia. 57Pavua bamfumu ba mbulamatadi basangana mukanda wa ndondu kua muntu, nansha basangana muntu ulonda meyi awu, bamfumu batangidi aba bavua bamushipa bu muvua diyi dia Mukalenga diambe. 58Ku ngondu yonsu, bantu ba mukalenga bavua bakengesha muena Izrayele yonsu uvuabu bapeta ne tshilema pa diyi dia mukalenga. 59Mu matuku makumi abidi ne atanu a ngondu awu,#1.59 matuku makumi abidi ne atanu a ngondu: ke dituku divuabu benza ku ngondu yonsu tshibilu tshia diledibua dia mukalenga (tangila 2 Mak 6.7). bavua balambula nwidie milambu pa tshilambuilu tshia milambu ya kuosha. 60Bakaji bavua batekesha bana babu panshi, bavua babashipa bilondeshile muvua diyi dia mukalenga. 61Bavua balembeleja bana babu ba ku dibela abu mu nshingu yabu. Bavua bashipa kabidi bena diku diabu ne bantu bonsu bavua bateka bana abu panshi. 62Kadi bena Yuda ba bungi, bavua bakolesha muoyi, babenga mua kudia biakudia bia mikiya. 63Bavule bavua banyisha lufu pa mutu pa kudia nyama ya mikiya, kupepeja tshiovu tshia tshijila. 64Matuku awu, bu muvua Mvidi Mukulu ne tshiji tshikole, wakakengeshisha bena Izrayele bikole.
Currently Selected:
1 Bamakabe 1: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996