Yoane 5

Yesu aikya owʼotengu nda Yelusalema

1Ndʼafeka bʼaoyiʼako, elambo ea Ba-Yuda eoliela, ko Yesu aocwa Yelusalema.

2Ko ecima eki nda Yelusalema ntutama la wiso wa mpate etangema nda lofoso ja Lo-Ebele Betezata, eki la mbalasai itano. 3Etukuluku eʼanto ba nkangi baokalema eko; baweiʼaiso, betengu, belema, [baolendeza efukelo eʼasi. 4Nda bikeke bimo ekima ea loola akitelaki ndʼecima ko aofukya basi; ko osʼokitela nda joso, aki basi ofukaka, ende aikaki lima nkangi nko loswele ekiʼndʼokaka.] 5Bontʼomo aki eko, aki botengu mbula ntuku isato la mwambi. 6Aki Yesu enakʼende akaji, ko aolea wae atemaki lʼotengu bokae ejingi mongo, aolokela, Olanga ndʼoike? 7Owa botengu aoloamba, Nkolo, afukʼasi, mpa lʼonto onkiteza ndʼecima; lolo nkʼayʼemi, omo aokitela nda joso likami. 8Yesu aolokela, Emala, ambolʼitoko ike, ko kenda. 9Ko nkako bontʼoko aika, ko aolambolʼitoko ikande ko aokenda.

Mbilʼeko eki Sabata. 10Ba-Yuda baokela bontʼoko oikyamaki, Ene wae Sabata, afeji lʼesekyelo wae otombe itoko ike. 11Lolo aolaamba, Ende ombikyaki aontoma, Ambolʼitoko ike ko kenda. 12Baolouola, bakela, Bontʼoko okokelaki, Ambolʼitoko ike ko kenda, ende na? 13Lolo endʼoikyamaki ntea ende ondoikyaki, eki Yesu imanaka, eki etukuluku eʼanto eko. 14Ndʼafeka, Yesu aolotana nda Tempelo, ko aolokela, Bala, osilʼoika; Tokelake lenkina bobe, nyango elo emo elekola efokokwela. 15Bontʼoko aokenda, ko aosangela Ba-Yuda wete Yesu ondoikyaki. 16Ndʼewelʼene Ba-Yuda baonyokola Yesu, ekiʼndʼokelaka baoyiʼane nda Sabata. 17Lolo Yesu aolaamba, Fafa ekami ayokambe belemo elaka nkʼaeyoko, ko emi njokambe. 18Ndʼewelʼene Ba-Yuda baolasa la ndekola wae boomʼende ekiʼnde ntasekolʼesekyelo ea Sabata kika, lolonde la ndʼewelʼekiʼndʼotangaka Nzakomba ise ekae mongo, aoyaezʼende la Nzakomba fio.

Yesu asanga elenge ea mpifo ekae mongo

19Yesu aolaamba, akela, Nsosolo nsosolo nsangelʼinyo, Bona afokambeya bolemo limʼelʼende mongo, imola nko bolemo bondenʼende Ise akamba; ele baoyi nko loswele bakelakʼende, Bona akelakʼaoyiʼako o ngoko. 20Ele Ise okaka Bona eefe, ko aoloeneya baoyiʼauma bakelʼende, ko ifoeneya bele-mo belekola bene wae inyo lokamwa. 21Elenge eetolaka Ise bawei, ko akaakʼiyo loiko, nkʼelengʼeko Bona akaaka loiko elʼiyo balangʼende wae baate. 22Ise afotenele bontʼomoko likambo, lolo aolilʼona nda mpifo ea etenelo euma eʼakambo; 23ncina wae bantʼauma bamemya Bona, elengʼememyʼiyo Ise. Bonto otamemyaka Bona, atamemyaka Ise ondotomaki. 24Nsosolo, nsosolo, nsangelʼinyo endʼondokoza joi likami ko imezʼende ontomaki, aata loiko ja seko, ko afaoya ndʼetenelo eʼakambo, lolo aoleka limʼiwa ko aokita nda loiko.

25Nsosolo, nsosolo, nsangelʼinyo, ekeke eoya, ko eokitʼaeyoko, ee bawei oka lolaka ja Bona owa Nzakomba ko iyo bandoka bifoika mbaika. 26Elenge eatʼIse loiko elʼende mongo, o ngoko aokaya Bona wae aate loiko nkʼelʼende mongo. 27Koko aolokaya mpifo wae atene bakambo, ndʼewela wae ale Bona owʼonto. 28Talokamwake la joi line; ele ekeke eoya e iyʼauma bale ndʼeomba oka lolaka lokae, 29ko bifola iyʼakelaki baoyi bʼolotsi ndʼekunjwelo ea loiko, ko iyʼakelaki baoyiʼobe ndʼekunjwelo ea ekwelo ea likambo.

Temoins iuke ndʼeloko ea Yesu

30Emi mpokeleya joi limoko limʼelʼemi mongo; elengʼendokʼemi, njeza ngoko, ko ezelo ekami eolelama ci, efʼemʼase lokela wango bokami mongo, lolo wango bokande ontomaki. 31Nga nsanga nsango ndʼeloko ekami mongo, nsango ekami efa nsosolo; 32omo alʼeko oyosange ndʼeloko ekami, ko njea wae nsango esangʼende ndʼeloko ekami ele nsosolo. 33Inyo lotomaki yuola Yoane, ko ende aosanga nsango ndʼeloko ea nsosolo. 34Lolo nsango endambʼemi efa eʼanto; lolo emi ntefela baoyiʼane wae inyo loike. 35Yoane aki itswa ifetaka ko ingesaka, ko inyo limezaki wae losala-ngane fele nda fole ekae. 36Lolo nde la nsango emo esangema ndʼeloko ekami elekola eko ea Yoane, belemo beki Fafa onkaaka wae nsiza, o nko belemo bekambʼemi, beko beosanga ndʼeloko ekami wete Fafa antomaki. 37Koko Fafa ontomaki, ende mongo aosanga nsango ndʼeloko ekami; inyo ntalokaki lolaka lokae nye, ko ntalenaki elenge ea jonge likae, 38ko joi likae lifoyale ndʼetemaʼekinyo, nye, efʼinyʼimezʼende okiʼndʼoto-maka. 39Inyo loyengela bikotelo bia Nzakomba, ekanelʼinyo wae nda biko loata loiko ja seko; ko bikotelo biko biosanga nsango ndʼeloko ekami: 40ko lofolange wae loyʼelʼemi wae loate loiko. 41Mpambe imemya limʼelʼanto. 42Lolo njea inyo wae lofa lʼeefe ea Nzakomba ndʼetemaʼekinyo. 43Emʼone njoya nda lina ja Fafa ekami, ko inyo lofonjambe; ayakʼomo aoya nda lina likande mongo, lifambʼende. 44Inyʼamemyana ko lofase imemya iyaka limʼelʼende ole Nzakomba mongo, lokuseya jimeza ngamo? 45Talokanelake wae mbakʼinyo baoyi ele Fafa; omo alʼeko oyoakʼinyʼaoyi, nkʼende okiʼnyʼilaka betema, wae Mose. 46Nga limezaki Mose, siki lonjimezʼemi ekiʼndʼokotaka ndʼeloko ekami. 47Lolo nkina lofimeza bikotelo bikae, lifimeza baoyiʼakami ngamo?

Currently Selected:

Yoane 5: LOL87

Highlight

Copy