Toango 9
9
Noa la bana bakande bʼaende
1Ko Nzakomba aosakela Noa la bana bakande bokako wa swa, ko aolakela, “Lootaka bana, lofulaka ko lofunzolaka ndʼokili. 2Ko bofoju la boangi bokinyo bifoyalʼele nyama iuma yʼokili, la ele tofulu touma tʼaliko, lʼako bauma bandakula ndʼamoci, la nse iuma ile nda lieke; bako bauma baokaema ndʼakata bakinyo. 3Wengi bayoike la bayokende bifoyalema toma tokinyo ta ndala; ko ngokiʼmʼokaakʼinyo njunda iuma, nkayʼinyo toma touma. 4Lolonde lofaola wunyu bole la loiko jʼoko, wete lʼalongo bʼoko. 5Ko njifumanya balongo bakinyo; njifita witako wʼako ele wengi nyama, ko ele bonto; ko njifumanya loiko jʼonto ele eoto ekande, nkʼelʼonto ole eoto ekae. 6Ende onduteza balongo bʼonto, balongo bakande bifutezama lʼonto; eki Nzakomba emakʼonto ndʼekoza ekae mongo. 7Ko inyo lofongʼoota, ko lofulaka; lofongʼokaka ndʼokili, ko lofula ndʼoko.”
8Nkako Nzakomba aokela Noa lʼana bakae baki lʼende, 9“Bala, ndembʼokolʼokami lʼinyo, ko lʼanʼakinyo ndʼafeka bakinyo; 10ko la wengi bayoike bale lʼinyo, wete la tofulu, la nyama ya mbongola ko la wengi nyama yʼokili ile lʼinyo, wete bakʼauma bandolaki lima basua. 11Ko ndembʼokolo bokami lʼinyo wae wunyu bouma bofaofitana lenkina la mpela nye; ko mpela efaiela lenkina nye wae eko emelenganya bokili.” 12Ko Nzakomba aokela, “Lone lole lotaza jʼokolo bolembʼemi lʼinyo la wengi bayoike bale lʼinyo, ko bokolo boko bolʼele biotswelo biuma. 13Njolila ngolo ekami nda litute, ko eko ifoyala lotaza ja bokolo bole ndatsʼemi lʼokili. 14Aʼemʼoyela batute ndʼaliko bʼokili, ngolo ifenya ndʼatute, 15nkako njifofwa bokolo bokami, bolembama ndatsʼemi lʼinyo la wengi bayoike; ko basi bafautʼokela mpela, wae bafite bayoike bauma. 16Andenya ngolo nda litute, njifolenda eko, ko njifofwa bokolo wa seko bole ndatsa Nzakomba la wengi bayoike ba bilenge biuma bale ndʼokili.” 17Ko Nzakomba aokela Noa, “Lone lole lotaza ja bokolo bokiʼmʼolembaka la bayoike bauma bale ndʼokili.”
18Bana ba Noa bandolaki lima basua baki Seme, Ama la Yefete. Ama aki ise ea Kanana. 19Bane basato wae bana bʼaende ba Noa; ko bokili bouma bofunzwa lʼanto limʼelʼiyo.
20Noa aangaki osala bamoci bʼokili; ko aolona lisala ja vina. 21Ko aomela basi ba vina, ko aolangwa lʼako; ko aokukwa nkʼotaka ndʼetei eʼilombe ikae ya bito. 22Ko Ama, ise ea Kanana, aolena botaka wʼise ekae, ko aocwʼosangela botomolo lʼokune ndʼanza. 23Ko Seme la Yefete baokola bonkoto, ko baolafyʼoko ndʼasoko bakiyʼafe ko baokenda la njututa, ko baokuka botaka wʼise ekiyo, bilongi bikiyo biokengwa, ko ntabena botaka wʼise ekiyo. 24Aki Noa oetswaka lima lilangwa likae, ko aolea joi liki bonaʼokae okeelakʼende, 25aokela,
“Kela Kanana ambeme la wambo wa tu;
Ende ifoyalema bokwala owʼakwala ele bioto bikande.”
26Ko Noa aokongʼotefela,
“Kela Seme asakeme lʼokako wa swa la Nzakomba ekami,
Ko kela Kanana ayaleme bokwala okae.
27Kela Nzakomba afuza Yefete,
Ko kela ayale nda tolombe ta bito ta Seme,
Ko kela Kanana ayaleme bokwala okae.”
28Ko ndʼafeka ba mpela Noa aoika mbula benkama besato la ntuku itano. 29Bembile beuma bia Noa beki mbula benkama ibwa la ntuku itano; ko ende aowa.
Currently Selected:
Toango 9: LOL87
Highlight
Share
Copy
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
