Toango 6

Baoyi ba linyamo bʼanto bʼokili

1Aki banto oangaka lofula ndʼokili, ko bana bʼamato baotswaki elʼiyo, 2nkako bana ba Nzakomba baolena wae bana bʼamato bʼanto baki la lituka, ko limʼelʼiyo baokola bako bakʼiyʼosonaka wae bayale baaji bakiyo. 3Ko Yawe aokela, “Bolimo okami bofaoyalʼelʼonto seko, elʼende ale nko wunyu kika, lolo mbula ikae ifoyala bonkama la ntukʼife.” 4Ko banto bʼesakaana baki ndʼokili ndʼembilʼeko, ko la ndʼafeka, aki bana ba Nzakomba otswaka ele bana bʼamato ba banto, ko iyo baolaotela bana. Bane baki bantʼako ba mpamba baki kalakala, ko banto ba lokumo.

5Ko Yawe aolena wae bobe wʼonto bokaka ndʼokili, wae wengi bankanela bʼotema bokiyo baki nko bobe wengi bembile. 6Ko Yawe aoloka lokeseli ekiʼndʼemakʼonto ndʼokili, ko joi liko jolookya botema bolito mongo. 7Ko Yawe aokela, “Njifofofya banto limʼelongi eʼokili bokiʼmʼemaka, wae banto la nyama, la towawa tondakula, ko la tofulu tʼaliko, elʼemi njoka lokeseli ekiʼmʼaemaka.” 8Lolo Noa aotana boya ndʼaiso ba Yawe.

Noa

9Biotswelo bia Noa biko bine. Noa aki bonto owa liongi; aolelama kolongo ndʼekeke ekae; Noa aolesana la Nzakomba. 10Ko Noa aotaki bana bʼaende basato, wete Seme, la Ama la Yefete. 11Bokili bokela linyamo ndʼaiso ba Nzakomba, ko bokili bokama la lofundo. 12Ko Nzakomba aolenda bokili, ko bala bofitana: ele wengiʼonto aofita baoyiʼakande la linyamo ndʼokili.

13Ko Nzakomba aokela Noa, “Ekeke ea ncindeza eʼanto ndʼokili eokita; ele bokili bokama la lofundo lokiyo, ko bala, njifamelenganya, lʼiyo la bokili bolongo. 14Tonga basua lʼabaya ba ngofela; ko tonga bako la ntena, ko baka basua bako la bolaka ndʼetei la ndʼanza. 15Wifotonga basua bako ngone: basua bifoata botale wa coudées benkama besato, ko bonene wa coudées ntukʼitano, ko lisange ja coudées ntuku isato. 16Ko wifokela nsamba ea basua ko sizʼako nda coudée emoko ndʼaliko, ko wifila ekuke ndʼompanje wa basua. Ko wifotonga basua la bekili besato; wete bokili wʼase, la wʼete i la wʼaliko. 17Ele bala, emi mongo njifieza mpela eʼasi ndʼokili, wae efofya wunyu bouma bole la loe ja loiko bole ndʼase ba loola, ko wengi oyoike ndʼokili ifowa. 18Lolo njifolemba bokoloʼokami la we: ko wifotswa nda basua, we la bana bake bʼaende, la waji oke, la baaji ba bana bake. 19Ko lima wengi oyoike, wifotsweya bafʼafe ba wengi elenge, wae wafonge, ko baike, iyo la we; waotsweya jende lʼomoto. 20Lima tofulu ngole bilenge bikiyo, ko lima nyama ya mbongola nga bilenge bikiyo, ko lima nyama la towawa ta ndakula nga bilenge bikiyo, bafe ba wengi elenge bifotswa la we, wae wʼafonge ko baike. 21Ko kola toma touma ta ndala, ko toza ko fonga toko ele we; ko toko tifoyala toma ta ndala, la toke la tokiyo.” 22Noa akelaki nkʼelengʼeko; akelaki baoyiʼauma baki Nzakomba otomakʼende.

Currently Selected:

Toango 6: LOL87

Highlight

Copy