Toango 16

Angala aota Yisamaele

1Ko Salai, waji owa Abalama, ntootelʼende bona, Lolo aki la bokwala owʼomoto bosi Ejipeto, oki la lina Angala. 2Ko Salai aosangela Abalama, “Bala, Yawe aonsuka wae mpoote bana; nkoonde yotswʼele bokwalʼokami owʼomoto; nkina njifoata bana lʼende.” Ko Abalama aolokoza bomwa wa Salai. 3Aki Abalama osilʼofetsa nda Kanana mbula jom, Salai waji owa Abalama, aokola Angala, bokwala okae owʼomoto, bosi Ejipeto, ko aololekya ele Abalama wae ayaleme waji. 4Ko Abalama aolotswʼele Angala, ko aofoswa jemi. Ko akiʼndʼenaka wae aofoswa jemi, aotengwela nkolo ekae Salai. 5Ko Salai aokela Abalama, “Kela bobeʼone bokelamʼelʼemi bokwʼele we! Ndekyaki bokwala okami owʼomoto nda ntolo eke, ko akiʼndʼenaka wae aofoswa jemi, aontengwelʼemi. Yawe atene likambo line ndatsʼemi la we!” 6Lolo Abalama aokela Salai, “Bala, bokwala oke ale nda mpifo eke, wʼokeelʼende elenge esima we bolotsi.” Nkako Salai aolonyokola, ko Angala aolota limʼelʼende. 7Ko ekima ea Yawe aolotana ntutama lʼetoko eʼasi ndʼete keleke, wae etoko ele nda mboka ea Sula. 8Ko aolokela, “Angala, bokwala owa Salai, oya lima nko? ko ocwa nko?” Ko aolamba, “Njolota limʼele nkolo ekami Salai.” 9Ko ekima ea Yawe aolokela, “Uta ele nkolo eke, ko yosaelʼende.” 10Ko ekima ea Yawe aosangelʼende wae, “Njifofuza banaʼake elaka nko bafoandemeya lʼofula wʼoanji bokiyo.” 11Ko ekima ea Yawe aolokela, “Bala, ole la jemi, wifoota bona owa jende; ko wifilʼende lina Yisamaele, ele Yawe aoloka bonyoko bonyokwa we. 12Ende ifoyalema bonto osongi la mpunda eʼokonda, wae likata likae lifosangwa osuka bantʼauma, ko bantʼauma bifosangola bakata wae bosukʼende; ko ifoswela la bioto bikae biuma.” 13Ko Angala aotanga lina ja Yawe otefelaki lʼende, “We Nzakomba ondena”; elʼende aokela, “Kamba njolena Nzakomba nsosolo, ko nkongʼobika ndʼafeka bʼenelo ekami?” 14La ncinʼeko etoko eko eotangema Bela-lai-loi, ko ele ndatsa Kadesa la Belede.

15Ko Angala aootela Abalama bona owa jende. Ko Abalama aotanga bona okae oki Angala ootelʼende Yisamaele. 16Abalama aki la mbula ntuku mwambi lʼotoa aki Angala ootelaka Yisamaele.

Currently Selected:

Toango 16: LOL87

Highlight

Copy