Toango 14

Abalama auna la rois, ko alonga bako. Malekisedeke

1Ndʼembile beki Amulafela roi ea Sinala, la Alioka roi ea Elesala, Kedolulaomela roi ea Elama, la Tidala roi ea Ngolima, 2rois iko baouna etumba la Bela roi ea Sodomo, Bilasa roi ea Amola, Sinaba roi ea Adema, Semebele roi ea Seboima, ko la roi ea Bela, ele wete Soala: 3ele bane bauma baosanganya bauni bakiyo ndʼofoku wa Sidimi, wete bofoku wa lieke jʼokwa. 4Mpanga basizaka mbula jom lʼife nda mpifo ea Kedolulaomela, lolo nda mbula ea jom lʼisato baotona losaelʼende. 5Nda mbula ea jom lʼinei Kedolulaomela aoya la rois baki Pende ko baolonga Ba-Lefa nda Asetota-Kalunaema, Ba-Zuza nda Ama, Ba-Eme nda Sawe-Kiliyatayima, 6ko la Ba-Oli nda ngongo ekiyo ea Seila elaka nko Ele-Palana, etutsi lʼete keleke. 7Nkako baoluta, ko baokita nda Ene-Misapata, wete Kadesa; ko baolonga bokili bouma wa Ba-Amaleke ko la Ba-Amola bafetsaki nda Asesona Tamala. 8Ko roi ea Sodomo, roi ea Amola, roi ea Adema, roi ea Seboima, ko la roi ea Bela (wete Soala), baolola, ko baolumbʼetumba ndʼofoku wa Sidimi; 9wete baunaki la Kedolulaomela roi ea Elama, Tidala roi ea Ngolima, Amulafela roi ea Sinala, ko la Alioka roi ea Elesala, wete rois banei baunaki la rois batano. 10Bofoku wa Sidimi bokaka la bafoku ba bitume, ko aki rois ya Sodomo la Amola olotaka, bantʼamʼakiyo baokwelʼafoku bako; ko bankina balotaki nda ngongo. 11Nkako balongi baokanda toma touma ta Sodomo la Amola, wete baumba la toma ta ndala, ko baocwa mboka ekiyo. 12Baotomba Loto ngoko, bonʼowa bokune owa Abalama, ende ofetsaki nda Sodomo, ko la liaci likae, ko baokenda. 13Ko boloci omo aoyʼosangela Abalama, Bo-Ebele, ofetsaki nda ntoku ea beele bia Mamele Bo-Amola, eoto ea Esekole lʼea Anele: iyo balembaki bokolo la Abalama. 14Aki Abalama okaka wae eoto ekae aokandema, aolemaza banto bakande, iyʼaotswaki ndʼilombe ikae, banto benkamʼesato la jom la mwambi, ko aokima rois bako elaka nko aokita Dana. 15Ko aokafa baunyi bakae lʼasali bakae lʼotso, ko aokwela rois bako, ko aolalonga, ko aolakima elaka nko Oba nda nord ea Damaseke. 16Ko aoluteya toma tokandemaki touma, ko la Loto, eoto ekae lʼaumba bakae bauma, ko la hamato ko lʼanto bauma.

17Akiʼndʼutaka lima umbelo ea Kedolulaomela la rois bauma baki lʼende, roi ea Sodomo aoyʼokumana lʼende ndʼofoku wa Sawe (wete Bofoku wa Roi). 18Ko Malekisedeke, roi ea Salema, aoyela mampa la vina. Ende aki nkanga ea Nzakomba Oleki ndekola. 19Ko aolosakela bokako wa swa, aokela,

“Abalama asakeme bokako wa swa

la Nzakomba oleki ka,

Wemi owa mbola lʼowa bokili.

20Ko Nzakomba oleki ka asakeme lʼokako swa,

Wae ende olekyaki baini bake ndʼakata bake.”

Ko Abalama aoloka liondo limoko ja wengi baondo jom ja bofunzo. 21Ko roi ea Sodomo aokela Abalama, “Onkayʼemi banto, lolo we wambʼokole toma ta bofunzo.” 22Lolo Abalama aolamba roi ea Sodomo, “Njosimba nsimbi ele Nzakomba oleki ka, Wemi owa loola lʼokili, 23wae mpaokola la lofekwa, lʼokulu wa bikoto, nkina yomba ike nko loswele, nyango ofotefela, ‘Emi njoatela Abalama liaci ja baumba.’ 24Imola nko toma toki basali bakami oleka, ko liondo jʼanto bacwaki lʼemi, wae Asele ia Esekole la Mamele; iyo bambokole liondo likiyo.”

Currently Selected:

Toango 14: LOL87

Highlight

Copy