Matayo 9

Yesu Keyo Kum Won Tho ma Nego Kum Nding’

(Mk 2:1-12; Lk 5:17-26)

1Man emondo i yei, ekadhu ko lokani, ebino de i adhura ma thugi ma dhe. 2Man nen, gikelo ng’atu ma won tho ma nego kum nding’ i bang’e, m’evuto wi kavuto: e Yesu m’uneno yioyic migi ewacu ni won tho ma nego kum nding’ kumae, Wodo, cwinyi bed tek: dubo peri wekre woko. 3Man nen, jugorcik moko giwacu kud i igi kumae, Ng’atuni yanyu Mungu. 4E Yesu m’ung’eyo pidoic migi ewacu kumae, Adundewu bepido gin ma rac nedi? 5Kum makani ma yot ma sagu, wacu kumae, Dubo peri wekre woko; kadi wacu kumae, Ai malu, iwothi? 6Ento kara wung’ei nia Wod dhanu bedo ku ng’ol wi ng’om m’eweko ko dubo woko (elund ewacu ni won tho ma nego kum nding’ kumae), Ai malu, ting’ kavuto peri, ici ba ot peri. 7Man eai malu, ecidho ba ot pare de. 8Ento kan udul dhanu gineno maeni, lworo makugi, e giyungo Mungu, ma mio ng’ol ma kumeni ni dhanu.

Lwong’o pa Matayo

(Mk 2:13-17; Lk 5:27-32)

9Man ka Yesu bekadhu ku kakeca, eneno ng’atu acel, ma nyinge Matayo, m’ubedo ka ma jujoko ie ajok: ewacu ire de kumae, Lub ng’eya. E eai malu, elubo ng’eye. 10#Lk 15:1, 2Etimbre de, kinde m’ebedo dhu cam i ot, nen, weg ajok ku judubo de dupa gibino gibedo piny giku Yesugi man julubne. 11E ka Jufarisayo gineno maeni, giwacu ni julubne kumae, Japonji mu ke gibecamu giku weg ajok ku judubo de nedi? 12Ento kan ewinjo maeni, ewacu kumae, Ju ma kumgi leng’ can jakeikum negogi ngo, ento ju ma kumgi lith re. 13#Mt 12:7; Hos 6:6Ento wucidh wung’ei ka thelembe nini, ayenyo kisa, lam re ngo: kum abino lwong’o weg bedopwe ngo, endre judubo.

Penji pi Kwiro Cam

(Mk 2:18-22; Lk 5:33-39)

14Julub Yohana gilund gibino i bang’e, giwacu kumae, Nedi waku Jufarisayo waweko cam wang’ udul, ento julubni giweko cam ungo? 15Yesu wacu igi kumae, Juwagi won ambadha can copo negogi, ma fodi ginuti giku won ambadhagi? ento ceng’ biwok, ka jubikabu won ambadha woko kud i bang’gi, ka gibilund weko cam. 16Ng’atu moko mbe de ma ketho kurembo bongu ma nyen wang’ kendi m’uti; kum maeno ma juketho ya eum wang’e, eyeco kendi, wang’e de doko rac ma sagu. 17Kadi dhanu de mbe ma piko pigulok ma nyen i usaupigulok m’uti: tek gipiko usaupigulok yec, man pigulok oi, usau de nyothre: ento gipiko pigulok ma nyasa i usaupigulok ma nyen, e gin ario gibedo bo.

Nyar Ubimo man Dhaku M’umulo Dhu Kendi pa Yesu

(Mk 5:21-43; Lk 8:40-56)

18E kinde m’eyero gin maeni igi, nen, jabim moko bino, erwo de i bang’e, ewacu kumae, Kawono nyara en e avu: ento ibin iketh cingi i kume, man ebibedo kwo. 19E Yesu ai malu, man elubo ng’eye, giku julubne. 20Man nen, dhaku, ma rimo pare cwir udoko rundi apar wi ario, ebino yor i ng’eye, emulo dhu kendi pare de: 21kum ewacu kumae yor i ie, Tek amulo kendi pare kende ci, e kuma bikei. 22Ento Yesu lokre enene de man ewacu kumae, Nyara, cwinyi bed tek; yioyic peri bodhi. E dhaku both ndhu ugambre i saa nica. 23E ka Yesu bino i ot pa jabim, eneno ju m’ukudho bilo, ku njuru dhanu m’ubeyakni, 24ewacu kumae, wudok cen: kum nyaku tho ngo, ento enindo aninda. E gidong’ ging’iere hai. 25Ento ka julalu njuru dhanu woko, emondo, emaku cinge; e nyaku ai malu. 26E lembene yik i ng’om maeno ceke.

Weg Abinga Ario Gineno Piny

27E ka Yesu ai ku kakeca, dhanu ario m’abinga gilubo ng’eye, gikok akoka, giwacu kumae, Bed ku kisa i kumwa, in i wod Daudi. 28E kan emondo i ot, dhanu m’abinga gibino i bang’e: e Yesu wacu igi kumae, Wuyio nia eni timbre ira? Giwacu ire kumae, Eyo, Rwoth. 29Elund emulo wang’gi, ewacu kumae, Dong’ etimbre iwu calku yioyic mu. 30E wang’gi yabre. Man Yesu ng’olo igi ma tek, ewacu kumae, Wunen ng’atu moko kud ung’ei maeni. 31Ento gicidho, girweyo pire mba mba i ng’om maeno ceke.

Ajuba Weco

32E kinde ma giwok woko, nen, jukelo ng’atu acel m’ajuba ma won pajogi de i bang’e. 33Ka juwodho pajogi woko, e ng’atu m’ajuba weco: e i udul dhanu wang’ lii, giwacu kumae, Fodi jukuneno gin ma kumeno ki ngo i Israel. 34#Mt 10:25; 12:24; Mk 3:22; Lk 11:15Ento Jufarisayo giwacu kumae, Ewodho pajogi ni kum jadit mi pajogi.

Ngisi Nego Yesu Kum Udul Dhanu

35 # Mt 4:23; Mk 1:39; Lk 4:44 Man Yesu cidho i adhura ceke ku ba pacu de ceke, ku ponjo i kacokri migi, ku yero lembanyong’a mi ker de, man ku keyo tho ceke ma kwonde tung’ tung’ m’unyang’ i kum ku tho mange ceke ma kwonde tung’ tung’. 36#Wel 27:17; 1 Ub 22:17; 2 Kei 18:16; Eze 34:5; Mk 6:34Ento kan eneno udul dhanu, ngisi nege i kumgi, kum givoc gilal de, calu rombe ma jakwac umbe kugi. 37#Lk 10:2Elund ewacu ni julubne kumae, Mwoka bedo dit andha ere jutic gilam. 38Ka kumeno wukwai Rwoth mi mwoka, ya eor jutic i mwoka pare.

Currently Selected:

Matayo 9: AB1970

Highlight

Copy