Luka 19
19
Yesu ku Zakayo
1Man emondo i Yeriko ebekadhu akadha. 2Man nen, ng’atu ma nyinge Zakayo nuti; en e jadit mi weg ajok, elony de. 3Man eyenyo enen Yesu ya en e ng’a; ento ecopo ngo ni njuru dhanu, kum etwil. 4Man etelo yo ku ng’wec, eidho malu wi ulemo kara enene: kum ebikadhu i yo maeno. 5Ka Yesu wok kakeca, eng’ayu wang’e malu, man ewacu ire kumae, Zakayo, lor piny pio; kum tinuni akobedo i ot peri be. 6Man etimo pio, eloro piny, ejole de ku mutoro. 7Ka gineno maeni, kagi ceke ging’ur, giwacu kumae, Emondo nibedo ku ng’atu ma jadubo. 8Zakayo cungo, man ewacu ni Rwoth kumae, Nen, Rwoth, ng’et piny para kucel amio ni jucan; man tek avugo ng’atu moko ku riu, adwoko wang’e wang’ ang’wen. 9E Yesu wacu ire kumae, Tinuni both ubino ba ot maeni, kum en bende en e wod Ibrahim. 10#Mt 18:11Kum Wod dhanu bino niyenyo nilaru de ju m’urwinyo.
Lembabola pi Nyol Mola Apar
11E ka giwinjo gin maeni, emedo eyero de ku lembabola, kum eni ceng’ni Yerusalem, man kum giwacu nyo nia ker pa Mungu binyuthre pio. 12Ka kumeno ewacu kumae, Jadit acel ucidho i ng’om ma bor, nigamu ker ire gire, kan edwogo. 13E elwong’o jumiru pare apar, emio igi nyol mola apar, man ewacu igi kumae, Wulok maeni cil m’abino. 14Ento dhanu pare gidage, gioro kwenda i toke, m’uwacu kumae, Wayenyo ngo nia ng’atu maeni bim wiwa. 15Man etimbre, kan edwogo kendo, ma nwang’u emaku ker, nia eng’olo ya julwong’ jumiru maeni i bang’e, m’emio igi sente, kara eng’ei piny ma giloko. 16Ma kwong’ane bino i bang’e, ewacu kumae, Rwoth, nyol mola peri tundo nyol mola apar mange. 17Man ewacu ire kumae, Itimo dre, in i jamiru ma ber: kum junwang’u ibedo mandha i lem ma nyathigi, ibed ku ng’ol wi adhura apar. 18E mir arionde bino, ewacu kumae, nyol mola peri, Rwoth, utundo nyol mola abic mange. 19Ewacu ire bende kumae, In bende ibed wi adhura abic. 20E mange bino, ewacu kumae, Rwoth, nen, nyol mola peri eni, m’akanu aboyo ku kitambala: 21kum alwori, kum in i ng’atu ma tek: iting’o gin m’iketho piny in ungo, ikayu de gin m’icoyo in ungo. 22Ewacu ire kumae, Abipoko lembe peri ku lembe m’uai i dhogi, in i jamiru ma rac. Ing’eyo nia an a dhanu ma tek, m’ating’o gin m’aketho piny an ungo, akayu de gin m’acoyo an ungo; 23ka kumeno itero sente para i kakanpiny ungo nedi, man i bino para alwong’e ku kulokane de? 24E ewacu ni ju m’ucungo ceng’ni kumae, Wugam nyol mola woko kud i bang’e, wumi ni won nyol mola apar. 25Giwacu ire kumae, Rwoth, ebedo ku nyol mola apar. 26#Mt 13:12; Mk 4:25; Lk 8:18Awacu iwu kumae, nia ku ba dhanu ceke m’ubedo ko jubimio ire; ento ng’atu m’ubedo ko ngo re, e ma jubimaye cil ku gin m’ebedo ko. 27#Mt 25:14-30Ento jukwoja eni, ma giyio ngo nia abim wigi, wukelgi keni, wuneggi de i wang’a.
Mondo pa Yesu i Yerusalem ku Yung
(Mt 21:1-11; Mk 11:1-11; Yoh 12:12-19)
28E kan edaru yero kumeni, etelo yo, m’eidho ko malu Yerusalem.
29Man etimbre, kan edhingo ceng’ni Bethfage ku Bethania, ba got ma julwong’o Zeituni, eoro julubne ario, 30ewacu kumae, Wucidh, i yo mu i pacu ma yor i weng’wu; ka wumondo i ie wubinwang’u nyathi kana m’ubedo ang’aba, ma fodi ng’atu moko mbe m’ubedo i wie: wugonye, wukele. 31Man tek ng’atu moko penjowu kumae, Wugonye nedi? wuwac kumae, Cande ni kum Rwoth. 32E ju ma juorogi gicidho, man ginwang’u lembe bedo calu eyero igi. 33E ka gibegonyo nyathi kana, wegi wacu igi kumae, Wugonyo nyathi kana nedi? 34Giwacu kumae, Cande ni i kum Rwoth. 35Man gikele ba Yesu: gipedho bongu migi de ng’ei nyathi kana, man giketho Yesu i wie. 36E kan ecidho, gipedho bongu migi i yo. 37Man kan edhingo, ka ma lung’ mi got Zeituni, udul julubne ceke anyong’a maku negogi man gipaku Mungu ku dwal ma tek kum tic mi tego ceke ma gineno; 38#Zab 118:26giwacu kumae, Mugisa ni Ubimo m’ubino i nying’ Rwoth: kwiocwiny i polo, dwong’ de i ka ma malu ngbir. 39E Jufarisayo moko ma kind udul dhanu giwacu ire kumae, Japonji, juk julubni. 40Man eloko lembe ewacu kumae, Awacu iwu nia, tek joni giling’ kidi bikok akoka.
41E kan edhingo ceng’ni, eneno adhura eywak de i kume, 42ewacu kumae, E, tinuni tek nwang’u ing’eyo gin ma mi kwiocwiny peri! ento kawono gimungri i weng’i. 43Kum ceng’ biwok i kumi, ka jukwoji bidhuro ng’om i theri, man gibitieki kingli, man gibikuri kun ku kun ceke, 44man gibiredhi i ng’om, ku nyithindho peri ma ni ii; man gibiweko kidi acel de ngo wi wagi ii; kum ing’eyo ngo nindo mi lieu peri.
Yesu Riemo Ju M’ucido Hekalu
(Mt 21:12-17; Mk 11:15-19; Yoh 2:13-22)
45Emondo i hekalu, man emaku riemo ju m’ubeloko kuloka, 46#Isa 56:7; Yer 7:11ewacu igi kumae, Egore kumae, Man ot para bibedo odrwo: ento wudwoke ni kagonjo mi weg ayeki.
47 #
Lk 21:37
Man eponjo ceng’ ku ceng’ i hekalu. Ento julam ma dongo ku jugorik de ku judongo mi dhanu giyenyo ginyothe: 48e ginwang’u ngo gin ma gicopo timo: kum dhanu ceke gidikri i kume, niwinje.
Currently Selected:
Luka 19: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.
