Luka 14
14
Yesu Keyo Kum Won Tho mir Ayidha
1Man etimbre, kan emondo i ot pa ng’atu acel ma kind jubim mi Jufarisayo i ceng’ sabatu nicamu kwen, nia gibekenge. 2Man nen, ng’atu moko nuti i wang’e ma won tho mir ayidha mi pwe. 3E Yesu loko lembe ewacu ni jueuthecik ku Jufarisayo, ewacu kumae, Cik uyio jukei kum i ceng’ sabatu, kadi ngo? 4Ento giling’. Man egame, ekeyo kume, eweko ecidho. 5#Mt 12:11E ewacu igi kumae, Ng’a m’i kindwu ma ka dhiang’ pare kadi kana podho i vur, ma k’ewodhe ngo ndhu ndhu nica i ceng’ sabatu? 6E gicopo loko lembe ngo kum gin maeni.
Lembabola ni Welo ma Julwong’o
7Man eyero lembabola ni ju ma julwong’ogi kan eneno maram gifoyo ko kom m’usagu wagi; ewacu igi kumae, 8#Lem 25:6, 7Ka ng’atu moko lwong’i ni cemo mir ambadha, kud ijany wi kom ma sagu wagi; poinyo elwong’o ng’atu moko ma dwong’ ma segi, 9e ng’atu m’ulwong’i ku ng’atuno de bibino biwacu iri kumae, Yikri ni ng’atuni; e kan ibimaku dok i ka ma nweng’ ku lewic. 10Ento ka julwong’i, koicibed ka ma nweng’; kara ka ng’atu m’ulwong’i bino, ewac iri kumae, Jarimo, cidh i ka ma krr: kan ibibedo ku yung i wang’ dhanu ceke ma wubedo kugi dhu cam. 11#Mt 23:12; Lk 18:14Kum ku ba dhanu nzu m’utingre gire jubijwige: man ng’atu m’ujwigre gire jubiyunge.
12Man ewacu ni ng’atu m’ulwong’e de kumae, Kan itimo cam mi dieceng’ kadi mir uthieno, kud ilwong’ jurimbi, kadi utumeru, kadi wat peri, kadi judhugola peri ma julonyo; gin bende gimaru lwong’i ka wang’ maeni, e wang’e bicule iri. 13Ento kan itimo agba, lwong’ jucan, ku weg abala mi bot, ku weg abala mi tielo ku ju ma abinga: 14e mugisa bikwenyi: kum gin moko mbe kugi ma gicul kawang’e: kum ebicule iri i cer mi weg bedopwe.
Lembabola pir Agba ma Dit
15Ka ng’atu acel m’i kind ju m’ubedo dhu cam karacelo kude winjo gin maeno, ewacu ire kumae, Mugisa ni ng’atu ma bicamu kwen i ker pa Mungu. 16Ento ewacu ire kumae, Ng’atu moko timo cemo ma dit mir uthieno; man elwong’o dhanu dupa: 17i kinde mi cemo mir uthieno eoro jamiru pare niwacu ni ju ma julwong’ogi kumae, Wubin; kum gin ceke bedo ayika kawono. 18Kagi ceke ku pidoic acel gimaku yenyo lembe m’ugony lembe m’i wigi. Ma kwong’ane wacu ire kumae, Ang’iewo podho, akoeinene be; akweii gony lembe m’i wia. 19Mange wacu kumae, Ang’iewo koni dhiang’ ma ku mberembere abic, man acimulogi; akweii gony lembe m’i wia. 20Ng’atu mange wacu kumae, Agamu dhaku, ka kumeno acopo bino ngo. 21Jamiru bino, eyero gin maeni ni rwoth pare. E ng’ecwiny ulund umaku won ot, man ewacu ni jamiru pare kumae, Ci pio i gengi kud i yo ma i adhura de, ikel i ie kakeni jucan, ku weg abala mi bot, ku ju ma abinga, man weg abala mi tielo. 22Jamiru wacu kumae, Rwoth, gin m’ing’olo timbre, kabedo re dong’. 23Rwoth uwacu ni jamiru kumae, Ci woko i gengi ku dhugang’ de, man idhulgi gibin gimondi, kara ot para pong’. 24Kum awacu iri, nia jumaco maeno ma julwong’o moko mbe ma bibilo cemo para mir uthieno.
Nilubo Yesu En e Kwerigijo
25Nie udul dhanu dupa gicidho gikugi; man elokre, ewacu igi kumae, 26#Mt 10:37Tek ng’atu moko bino i bang’a, ma k’edagu won mire ngo, ku min mire, ku cege, ku nyithindhe, ku utumin, ku nyimin de, eyo, ku kwo pare bende, ecopo bedo jalubna ngo. 27#Mt 10:38; 16:24; Mk 8:34; Lk 9:23Ng’atu ma tek kuyeyo yen m’athara pare ngo, elubo ko ng’eya, ecopo bedo jalubna ngo. 28Kum ng’a m’i kindwu, m’uyenyo egom ot ma wiu, ma k’elar ebed piny ungo ekwan wel piny, tek ebedo ku m’ecopo dare ko? 29Marmoko, kan edaru ketho kathere, man ecopo dare ngo, dhanu ceke m’uneno gimaku caye, 30giwacu kumae, Ng’atuni maku gomo, man daru loye. 31Kadi ubimo ma kani, ma kan ecirombo kud ubimo wagi i lwiny, ma k’ebilar bedo piny ungo epor lembe tek ebicopo ku dhanu rubanga apar nirombo ku ng’atu m’ubino i bang’e ku dhanu rubanga pier ario? 32Kadi tek ecopo ngo, e eoro kwenda ka fodi wadi ni bor, man epenjo lembe mi kwiocwiny. 33Ka kumeno ng’atu ma tek ni i kindwu m’ukuno gin ceke m’ebedo ko ngo, ecopo bedo jalubna ngo.
Kadu ma Midone Rwinyo
(Mt 5:13; Mk 9:50)
34Ka kumeno kadu bedo mit: ento tek kadu midone rwinyo, jubidwoko midone kud ang’o? 35Eromo ngo ni ng’om kadi ni kaweyo de: jubaye woko. Ng’atu m’ubedo ku ithe m’ewinjo ko, wek ewinji.
Currently Selected:
Luka 14: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.
