Thangambere 8
8
Kajik mi Pi M’ucoro Ng’om
1E Mungu poi kum Noa, man pi yedi ceke, man pi lim ceke ma gini kude i avurne: man Mungu timo yamu ukadh wi ng’om, e pige dwono; 2kulo bende mi nam ku wang’ polo de gicikri, man koth ucere kud i polo; 3e pi dok kud i ng’om thiri thiri: man yo ng’ei ceng’ dak acel ku pier abic pi dwono. 4Man avur ubedo wi gudi mir Ararat i dwi mir abirone, i ceng’ mir apar wi abirone mi dwije. 5E pi cikudwono thiri thiri maram dwi mir apaje wok ko: i dwi mir apaje, i ceng’ ma kwong’ane mi dwije wi gudi nen.
6Man etimbre ka ceng’ pier ang’wen uthum, nia Noa yabu wang’ avur m’etimo: 7man eoro ngoro woko, e ecidho kun ku kun, cil ma pi dwono ko kud i ng’om. 8Man eoro akuru woko kud i bang’e, kara enen tek pi dwono kud i wang’ ng’om; 9ento akurune nwang’u yom ungo mi tiende, man edok i bang’e i avur; kum pi ni i wang’ ng’om ngung’: man erieyo cinge, egame de, man ekele i bang’e i avur. 10Man ebedo kendo ceng’ abiro mange; man eoro akuru kendo ku i avurne; 11man akurune dwogo i bang’e uthieno; man, nen, ith ulam ma jujaku ni i dhoge: kum kumeno Noa ng’eyo nia pi dwono kud i ng’om. 12Man ebedo kendo ceng’ abiro mange, man eoro akurune; e edwogo kendo ngo i bang’e.
13Man etimbre i rundi dak abusiel kud acel, i dwi ma kwong’ane, i ceng’ ma kwong’ane mi dwije, pi dwono kot kud i ng’om: man Noa yabu wi avur, man eneno, man, nen, wang’ ng’om uthwo. 14Man i dwi mir arionde, i ceng’ pier ario wi abirone mi dwije, ng’om uthwo. 15E Mungu yero ni Noa, ewacu kumae, 16Ai woko kud i avur, in, ku cegi, man woti, ku mond woti wukugi. 17Wodh gin ceke ma kwo ma ni kudi kubang’e kubang’e, mi weg kum ceke, winyo, man lim, man gin ma lak i ng’om kubang’e kubang’e ma wotho ku wi ng’om; kara ginyol dit i ng’om, man ginyai, gimedri de wi ng’om. 18Man Noa wok woko, ku wote, man cege, man mond wote gikugi: 19yedi kubang’e kubang’e, gin ma lak kubang’e kubang’e, ku winyo kubang’e kubang’e, ku gin ceke ma tek wotho wi ng’om, calku wat migi, gicidho woko kud i avur.
20Man Noa guro pemblam ni Yehova, man egamu kum lim ma leng’ kubang’e kubang’e, man kum winyo ma leng’ kubang’e kubang’e, man ethiero lam m’awang’a wi pemblamne. 21Man Yehova ng’wio ng’wic mido ma ng’ar; man Yehova wacu i adundene kumae, Abilamu ng’om kendo ngo ni kum dhanu, kum lembapora mi pidoic mir adunde dhanu en e rac ugambre kum aradu pare; kadi abigoyo gin ceke ma kwo kubang’e kubang’e kendo ngo, calu atimo. 22Cil i nindo ceke ma ng’om nuti, kakodhi ku palacam, man nindo mi koyo ku lietho, man cwir ku oro, man dieceng’ ku diewor de bijik ungo.
Currently Selected:
Thangambere 8: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.
