Thangambere 48

Yakobo Mio Mugisa wi Efraim ku Manase

1Man etimbre yo ng’ei gin maeni, nia ng’atu acel uwacu ni Yusuf kumae, Nen, kum wuru lith: man egamu wote ario gikugi, Manase gikud Efraim. 2Man ng’atu acel uyero ni Yakobo, man ewacu kumae, Nen Yusuf ma wodi bino i beng’i: e Israel utegre gire, man ebedo wi kavuto. 3#Tha 28:13, 14Man Yakobo wacu ni Yusuf kumae, Mungu ma Jategokpo nyuthre ira i Luz i ng’om Kanan, man emio mugisa ira, 4man ewacu ira kumae, Nen, abiketho inyai, man abimedi, man abikethi ni udul kodhidhanu, man abimio ng’om maeni ni kodhini yo ng’ei ni piny mi nja. 5Man kawono woti ario, ma junyolo iri i ng’om Misiri ma fodi abino i beng’i ngo i Misiri, gi para; Efraim giku Manase, cil calu Ruben ku Simeon, gibibedo para. 6Man kodhi peri, m’ibinyolo yo ng’eigi, bibedo peri; gibilwongri tok nying utumeggi i aba migi. 7#Tha 35:16-19Man an, kinde m’aai Padan, Rahel utho i vuta i ng’om Kanan i yo, ma fodi woth ulwar i wang’wa ma jutundo ko Efrath: man ayike keca i yo ma jutundo ko Efrath (ma en e Beth-lehem).

8E Israel uneno wot Yusuf, man ewacu kumae, Maeni ng’agi? 9Man Yusuf uwacu ni won kumae, Gi wota, ma Mungu mio ira keni. Man ewacu kumae, Akwei, kelgi i bang’a, man abimio mugisa igi. 10Nwang’u wang’ Israel udoko via via kum tio, ketho nia ecopo neno ngo. E ekelogi ceng’ni i bang’e; man ecwio limbgi, egwakugi de. 11Man Israel uwacu ni Yusuf kumae, Ia pido ngo nia abineno weng’i: man, nen, Mungu yio anen kodhini bende. 12Man Yusuf uwodhogi woko ku kum conge; man erum arieba cwinye. 13Man Yusuf ugamugi gin ario, Efraim yo ku cinge ma yor acwic yo ku cing Israel ma yor acam, man Manase i cinge ma yor acam yo ku cing Israel ma yor acwic, e ekelogi ceng’ni i bang’e. 14Man Israel urieyo cinge ma yor acwic, man ekethe i wi Efraim, ma en e cogo, man cinge ma yor acam i wi Manase, etharu cinge athara; kum Manase en e ma kayu. 15Man emio mugisa ni Yusuf ewacu kumae, Mungu ma kwara ma Ibrahim kud Isak giwotho i wang’e, Mungu ro’umio ira cemo i bedo para ceke cil i ceng’ maeni, 16malaika m’uwara ni gin ma rac ceke, umi mugisa ni awia; man wek nyinga bed i wigi, man nying’ kwara ma Ibrahim kud Isak; man wek ginyai ni udul i die ng’om. 17Man ka Yusuf uneno nia won uketho cinge ma yor acwic i wi Efraim, eton i ie: man eting’o cing won malu, kara ekabe ku wi Efraim edwoke wi Manase. 18E Yusuf uwacu ni won kumae, Kumeno ngo, vwa; kum maeni en e ma kayu; keth cingi ma yor acwic i wie. 19E won ukwero, man ewacu kumae, Ang’eyo, woda, ang’eyo; en bende ebidoko ni thek dhanu, man en bende ebibedo dwong’: ento umin ma nok bibedo dwong’ ma sage, man kodhine bidoko ni udul mi thek. 20#Ebr 11:21Man emio mugisa igi i ceng’ maeca, ewacu kumae, Israel bimio mugisa ni kumi, ebiwacu kumae, Mungu dwoki calu Efraim man calu Manase: man eketho Efraim i wang’ Manase. 21Man Israel uwacu ni Yusuf kumae, Nen, atho: ento Mungu bibedo kudu, man ebidwokowu kendo i ng’om pa kwaruwu. 22Man ke amio iri makapiny acel ma sagu utumeru, m’akabu kud i cing’ Juamori ku palamularu para man kud atum para.

Currently Selected:

Thangambere 48: AB1970

Highlight

Copy