Thangambere 39

Yusuf giku Ci Potifar

1E Jutero Yusuf i Misiri: man Potifar, ma jego pa Farao, ma jadit mi jukur, ma Jamisiri, eng’iewe kud i cing’ Juicmael, m’ukele piny keca. 2#Tic 7:9E Yehova ni karacelo ku Yusuf; en e ng’atu ma won mierolembe; man eni i ot pa jadit pare ma Jamisiri. 3Man jadit pare neno nia Yehova ni kude, man nia Yehova ketho gin ceke m’etimo bedo miero i cinge. 4E Yusuf unwang’u bero i wang’e, e etimo ire: man edwoke ni jawiot pare, man gin ceke m’ebedo ko eketho i cinge. 5Man etimbre ugambre i nindo m’edwoke ni jawiot pare, man wi gin ceke m’ebedo ko, nia Yehova mio mugisa ni ot pa Jamisiri ni kum Yusuf; man mugisa pa Yehova ni wi gin ceke m’ebedo ko, i ot man i podho. 6Man eweko gin ceke m’ebedo ko i cing’ Yusuf; man eng’eyo ngo gin ma ni kude, ndhu kwen m’ecamu. Man Yusufne wang’e leng’, man kume de leng’.

7Man etimbre yo ng’ei gin maeni nia ci jadit pare loko wang’e kum Yusuf; man ewacu kumae, Vut kuda. 8Ento ekwero, man ewacu ni dhaku pa jadit pare kumae, Nen, jadit para ng’eyo ngo gin ma ni i ot i bang’a, man eketho gin ceke m’ebedo ko i cinga: 9en edwong’ ma sagu an ungo i ot maeni; kadok gin moko de ecero ngo ira ndhu in, kum in i dhaku pare: ka kumeno acopo timo dubo maeni ma dit nenedi, man adub ni Mungu? 10Man etimbre, kinde m’eweco ku Yusuf ceng’ ku ceng’, nia ewinjo dwande ngo, kara evut kude, kadi kara gibed kude. 11Man etimbre ceng’ni ku nindo maeni, nia ecidho i ot kara etim tic pare; man dhanu m’i ot moko mbe keca i ie. 12Man emake ku kendi pare, ewacu kumae, Vut kuda: man eweko kendi pare i cinge, e eringo, man ewok woko. 13Man etimbre kan eneno nia eweko kendi pare i cinge, man eringo woko, 14nia elwong’o dhanu m’i ot pare, man eweco i bang’gi, ewacu kumae, Nen, ekelo Jaebrania i bang’wa kara ucaiwa: emondo i bang’a kara evut kuda, man akok ku dwanda ma tek: 15e etimbre, kinde m’ewinjo nia ating’o dwanda man akok, nia eweko kendi pare i bang’a, man eringo, e ewok woko. 16Man eketho kendi pare i bang’e, maram jadit pare dwogo ko pacu. 17E eweco i bang’e calku lembe maeni, ewacu kumae, Jatic ma e Jaebrania, m’ikelo i bang’wa, emondo i bang’a, kara ecaya: 18man etimbre, kan ating’o dwanda malu man akok, nia eweko kendi pare i bang’a, man eringo woko. 19Man etimbre, kinde ma jadit pare winjo lembe pa dhaku pare, m’eyero ire, m’ewacu kumae, Jatic peri timo i bang’a kumeni; nia kwinyo pare opo. 20Man jadit pa Yusuf umake, man ekethe i otkol, i ka ma jukol p’ubimo gibedo atwia i ie: e ebedo keca i otkol. 21#Tic 7:9Ento Yehova ni karacelo ku Yusuf, man enyutho bero ire, emio ire bero de i wang’ jakur otkolne. 22Man jakur otkol umio jukol ceke ma ni i otkol i cing’ Yusuf; man gin ceke ma gitimo keca, en e jatimne. 23Jakur otkol uneno ba gin moko ki ngo ma ni the cinge, kum Yehova ni kude; man gin m’etimo, Yehova ketho ebedo miero.

Currently Selected:

Thangambere 39: AB1970

Highlight

Copy