Thangambere 14
14
Abram Ularu Lot
1Man etimbre, i ceng’ pa Amrafel m’ubimo mi Cinar, man Ariok m’ubimo mi Elasar, man Kedorlaomer m’ubimo mir Elam, man Tidal m’ubimo mi Goim, 2nia giteng’o ali ku Bera m’ubimo mi Sodom, man ku Birca m’ubimo mi Gomora, ku Cinab m’ubimo mi Adma, man Cemeber m’ubimo mi Zeboim, man ubimo mi Bela (ma en e Zoar). 3Maeni ceke giribri karacelo i poga mi Sidim (ma en e Nam Kadu). 4Gitimo ni Kedorlaomer rundi apar wi ario, man i rundi apar wi adege gijai. 5Man i rundi apar wi ang’wende Kedorlaomer ubino, giku ju m’ubimo ma gini karacelo kude, man gigoyo Jurefai i Acteroth-kamaim, man Juzuzi i Ham, man Juemi i Cave-kiriathaim, 6man Juhori i got migi ma Seir, cil kum Elparan, ma ni ceng’ni yamba. 7Man gidwogo, gibino de ba En-micpat (ma en e Kadec), man gigoyo ng’om ceke mi Juamaleki, ku Juamori bende, m’ubedo i Hazazon-tamar. 8Man ubimo mi Sodom ucidho woko, kud ubimo mi Gomora, man ubimo mir Adma, man ubimo mi Zeboim, man ubimo mi Bela (ma en e Zoar); e githero lwiny i kumgi i poga mi Sidim; 9kum Kedorlaomer m’ubimo mir Elam, man Tidal m’ubimo mi Goim, man Amrafel m’ubimo mi Cinar, man Ariok m’ubimo mi Elasar; ubimo ang’wen gicokri wi ubimone abic. 10Nwang’u poga mi Sidim upong’ ku vuj ulobo; man ju m’ubimo mi Sodom ku Gomora giringo, man gipodho keca, man ju m’udong’ giringo ba got. 11Man giyaku piny ceke mi Sodom ku Gomora, ku cemo migi ceke, e gicidho i yo migi. 12Man gimaku Lot, ma wod umin Abram, m’ubedo i Sodom, ku piny pare, e gicidho.
13E ng’atu acel m’uboth ubino, man eyero ni Abram ma Jaebrania: nwang’u ebedo ceng’ni bongu mi Mamre, ma Jaamori, m’umin Eckol, man umin Aner; man maeni giribri kud Abramgi. 14Man kan Abram uwinjo nia juyaku umin, etelo wi dhanu pare ma juponjogi kud ali, ma junyolo i ot pare, dhanu dak adek kud apar wi abora, man elubo tokgi cil kum Dan. 15Man epoko dhanu pare i kumgi ku diewor, en ku jutic pare, man egoyogi, eriemogi de cil kum Hoba, ma en e yor acam ni Dameski. 16Man edwogo ku piny ceke, edwogo kud umin ma Lot bende, ku piny pare, ku mon bende, man dhanu.
Melkizedek Umio Mugisa ni Abram
17Man ubimo mi Sodom ucidho woko nirombo kude, yo ng’ei dwogo pare ku ba nek pa Kedorlaomer man ju m’ubimo ma gini kude, i poga mi Cave (ma en e Poga mir Ubimo). 18#Ebr 7:1-10Man Melkizedek ubimo mi Salem ukelo kwen ku pigulok: man en e jalam pa Mungu ma Malu Ngbir. 19Man emio mugisa ire, man ewacu kumae, Mugisa pa Mungu ma Malu Ngbir, ma jacwi polo ku ng’om, ukwany Abram: 20man mugisa ni Mungu ma Malu Ngbir, m’emio jukwoji i cingi. Man emio ire apaje mi gin ceke. 21Man ubimo mi Sodom uwacu ni Abram kumae, Mi ira dhanune, man igam piny iri giri. 22E Abram uwacu ni ubimo mi Sodom kumae, Ating’o cinga malu ni Yehova, Mungu ma Malu Ngbir, ma jacwi polo ku ng’om, 23nia abigamu thol kadi thondh wara de ngo kadi gin moko ma peri, imaru wacu kumae, Alonyo Abram: 24ndhu maeni kende ma awobi gicamu, man makapiny mi dhanu ma wacidho wakugi, ma gin Aner, ku Eckol, man Mamre; wek gigam makapiny migi.
Currently Selected:
Thangambere 14: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.
