Luke 4

Jesus no Nsɔhwɛ

(Matthew 9.1-8; Mark 2.1-12)

1Jesus a nna Sunsum Krɔnkrɔn ahyɛ no ma no, sanee fii Jordan ho, na Sunsum no dze no duaduaa sar no do adaduanan, 2na abɔnsam sɔɔ no hwɛe. Na nda no mu no oenndzi hwee; na owiei no, ɔkɔm dzee no. 3Na abɔnsam see no dɛ, Sɛ eyɛ Nyankopɔn Ba a, hyɛ ɔbo yi ma ɔndan paanoo. 4#Deut 8.3 Na Jesus buae see no dɛ, Wɔakyerɛw dɛ, Nnyɛ paanoo nko bi na nyimpa nam do bɛtsena ase.

5Na ɔdze no kɔr beebi a ɔkrɔn kɛkyerɛɛ no wiadze ahenman nyina prɛko pɛr. 6Na abɔnsam see no dɛ, Ɔwo na medze tum yi nyina nye no mu enyimnyam bɛma wo: osiandɛ wɔdze ahyɛ me nsa, na obi a mepɛ no, medze mema no. 7Dɛm ntsi sɛ ebɔsɔr wɔ m’enyim a, ne nyina bɛyɛ wodze. 8#Deut 6.13 Na Jesus buae see no dɛ, Wɔakyerɛw dɛ, Sɔr Ewuradze wo Nyankopɔn, na no nko na som no. 9Na ɔdze no kɔr Jerusalɛm, dze no kesii asɔrfi ne bea sorɔnsorɔm no do, na ɔsee no dɛ, Sɛ eyɛ Nyankopɔn Ba a, tow woho fi ha kyen famu: 10#Dwom 91.11, 12 na wɔakyerɛw dɛ,

Ɔbɛhyɛ n’abɔfoe mbra wɔ wo ho,

dɛ wɔmbɔ wo ho ban, 11na,

Wɔbɔsoa wo hɔn nsamu,

Amma aammfa wo nan ammpem ɔbo da.

12 # Deut 6.16 Na Jesus buae see no dɛ, Wɔaka dɛ, Mma nnsɔ Ewuradze wo Nyankopɔn nnhwɛ.

13Na abɔnsam wiee no nsɔhwɛ nyina no, ogyaa no hɔ kakra.

Jesus Hyɛ N’edwuma ase wɔ Galilii

(Matthew 4.12-17; Mark 1.14, 15)

14Na Jesus nam Sunsum n’ahoɔdzen mu sanee baa Galilii, na ne nka tahyee nkurow a woetwa ehyia nyina mu. 15Na ɔkyerɛkyerɛɛ hɔn nhyiamudan no mu, na hɔn nyina hyɛɛ no enyimnyam.

Wɔpow Jesus wɔ Nazarɛt

(Matthew 13.53-58; Mark 6.1-6)

16Na ɔbaa Nazarɛt, mbrɛ wɔtsetsee no no, na dɛ mbrɛ ɔtɔ dɛ ɔyɛ no, ɔkɔr nhyiamudan no mu ahomgyeda no, na ɔsoɛree gyinaa dɛ ɔrebɛkenkan. 17Na wɔdze nkɔnhyɛnyi Isaia no nwoma no maa no, Na ɔtserɛɛw nwoma no mu, na ohun bea a wɔakyerɛw no hɔ dɛ,

18 # Isa 61.1, 2 Ewuradze no Sunsum wɔ mo do,

osiandɛ ɔasera me ngo dɛ membɛka nsɛmpa nkyerɛ ehiafo.

Ɔasoma me dɛ membɛpaa ɔgye mma ndɔmmumfo,

na mumbue enyifurafo enyi,

na membɛgye hɔn a wɔretseetsee hɔn no,

19 na membɛda afe a Ewuradze n’enyimpa bɛba no nkorɔfo do no edzi.

20Na ɔbobɔɔw nwoma no, na ɔdze maa ɔsomfo no, na ɔtsenaa ase; na hɔn a wɔwɔ nhyiamudan mu hɔ nyina, hɔn enyiwa tsiim no do. 21Na ɔhyɛɛ ase kaa kyerɛɛ hɔn dɛ, Ndɛ na kyerɛw yi aba mu wɔ hom asowa mu. 22Na hɔn nyina dzii no dase, na adom nsɛm a ofii n’anomu no yɛɛ hɔn nwanwa; na wɔsee dɛ, Ana nnyɛ Josef ba no nye yi? 23Na ɔsee hɔn dɛ, Ampaara, hom dze bɛ yi bobu me: Ɔsafo, sa woho yarba: biribiara a yɛatse dɛ wɔyɛe wɔ Karpernaum no, yɛ no wankasa wo kurow mu ha so. 24#Joh 4.44 Na ɔsee dɛ, Nokwar mese hom dɛ, Nkɔnhyɛnyi biara, wɔmmpɛ no noara no kurow mu. 25#1 Ahe 17.1 Na meka no nokwar kyerɛ hom dɛ, Elija n’aber do a wɔtoow ɔsor mu mfensa abosoom esia no na ɔkɔm kɛsenara sii asaase nyina do no, nna ekunafo pii wɔ Israel; 26#1 Ahe 17.8-16 naaso wɔannsoma Elija wɔ hɔn mu biara hɔ, gyedɛ Sidon kurow Zarefat mu, wɔ ɔbaa kunafo bi hɔ. 27#2 Ahe 5.1-14 Na nkɔnhyɛnyi Elisha n’aber do no, nna akwatafo pii wɔ Israel; na wɔamma hɔn mu biara ho annsan, gyedɛ Sirianyi Naaman. 28Na hɔn a wɔwɔ nhyiamudan no mu nyina, wɔtsee dɛm asɛm yi no, ebufuw hyɛɛ hɔn ma; 29na wɔsoɛree sunsuun no fii kurow no mu, dze no kɔr koko a hɔn kurow no si do no no kɔn do, dɛ wɔrokɔwɔ no akɔmfo. 30Na ɔno dze, ɔnam hɔn finimfin kɔree.

Nyimpa bi a Ɔwɔ Sunsum fi

(Mark 1.21-28)

31Na ɔkɔr Galilii kurow bi a wɔfrɛ no Karpernaum mu. Nna ɔrekyerɛkyerɛ hɔn fa ahomgyeda no ho; 32#Mat 7.28, 29 na ne nkyerɛkyerɛ yɛɛ hɔn ahobow, osiandɛ n’asɛm dze tum nam. 33Na nyimpa bi wɔ nhyiamudan no mu a ɔwɔ sunsum fi, na ɔdze ndze kɛse kaa mu dɛ 34Aa! Ebɛnadze na yɛnye wo wɔ yɛ, Jesus Nazarɛtnyi? Ana ebae dɛ erebɛsɛɛ hɛn? Minyim wo nyimpaban, Nyankopɔn no Hotseweenyi no. 35Na Jesus bɔɔ no ham see dɛ, Ka w’ano to mu, na fi no mu fi. Na abɔnsam no twaa no hwee hɔn finimfin no, nna ofii no mu firii, a ɔannyɛ no hwee. 36Na ɔyɛɛ hɔn nyina ahobow, na wɔkekaa kyerɛkyerɛɛ hɔnho dɛ, Ebɛn asɛm nye yi, dɛɔdze tum nye ahoɔdzen hyɛ esunsum fi ma wotu kɔ? 37Na no ho asɛm tahyee aman a woetwa ehyia hɔ no nkurow nyina mu.

Jesus Sa Nkorɔfo pii Yarba

(Matthew 8.14-17; Mark 1.29-34)

38Na ɔsoɛree fii nhyiamudan no mu baa Simon fie. Nna papu#4.38 PAPU: Dɛm yarba yi na ndɛ wɔka dɛ fiiba no. kɛse aka Simon n’asew, na wɔbɛkaa kyerɛɛ no. 39Na okegyinaa no do tseaa yarba no, ma ofii no do, na ɔsoɛɛr ntsɛmara soom hɔn.

40Na wi rokɔtɔ no, hɔn a wɔwɔ ayarfo a yarba horow rehaw hɔn nyina dze hɔn brɛɛ no, ma ɔdze ne nsa too hɔn nyina do nkorkor yɛɛ hɔn edur. 41Na mbɔnsam so fii dodowara mu firii, na wɔkaa mu kɛse see dɛ, Ɔwo nye Nyankopɔn Ba no. Na ɔbɔɔ hɔn ham, na ɔamma hɔn kwan dɛ wɔnkasa, osiandɛ wonyim dɛ ɔno nye Kraest no.

Jesus N’asɛnka Wɔ Judea

(Mark 1.35-39)

42Na adze kyee no, osii mu kɔr sar bi do, na nyimpadodow no hwehwɛɛ no, na wokodur ne nkyɛn no, wosiankaa no dɛ mma ommfi hɔn nkyɛn nnkɔ. 43Na ɔsee hɔn dɛ, Otwar dɛ meka Nyankopɔn ahenman ho nsɛmpa kyerɛ nkurow bi so, osiandɛ iyi ntsi na wɔsomaa me.

44Na ɔkɛkaa asɛm no wɔ Judea#4.44 JUDEA: Tsetse akyerɛwfo no binom ka dɛ Galilii. nhyiamudan mu.

Currently Selected:

Luke 4: MFANBRPC

Highlight

Copy