Luke 13

Nu Woho Ɔno Ibowu

1Na aber no ara mu binom wɔ hɔ a wɔkaa Galiliifo a Pilate dze hɔn bɔgyaa foraa hɔn afɔrbɔdze mu no ho asɛm kyerɛɛ no. 2Na obuaa hɔn dɛ, Ana hom susu dɛ Galiliifo yi osiandɛ wohun dɛm amandze ntsi, wɔyɛ ndzebɔnyɛfo kyɛn Galiliifo nyina? 3Mese hom dɛ, Dabida: na mbom gyedɛ hom nu homho, ɔno hom nyina bɛhyew dɛmara. 4Anaaso hom susu dɛ nyimpa duawɔtwe a Siloam abantsentsen hwee hɔn do kum hɔn no, wɔyɛ ndzebɔnyɛfo kyɛn hɔn a wɔtse Jerusalɛm nyina? 5Mese hom dɛ, Dabida: na mbom gyedɛ hom nu homho, ɔno hom nyina bɔkɔ ɔsɛɛ mu dɛmara.

Adɔmbadua a Ɔnnsow Aba no

6Na obuu bɛ yi so: Obi wɔ adɔmbadua a wɔtsɛɛw no wɔ no wenyin ture mu, na ɔbae bɔhwehwɛɛ aba wɔ do, naaso oennya bi. 7Na ɔsee turehwɛfo no dɛ, Hwɛ, mfe ebiasa nye yi a maba mabɔhwehwɛ adɔmbadua yi do aba, na mennya bi: twa no kyen; ɔyɛ dɛn na ɔkantan asaase no do so? 8Na obuae see no dɛ, Mo wura, ma onsi hɔ afe yi so nkodu dɛ mubofuntum ho, na medze sumina egu ase: 9na sɛ a ɔsow aba a, oye; na sɛ ɔannsow so a, ɔno eetwa no akyen.

Jesus Sa Ɔbaa Bubuafo Yarba Ahomgyeda

10Nna ɔrekyerɛkyerɛ wɔ nhyiamudan bi mu ahomgyeda. 11Na hwɛ, ɔbaa bi wɔ hɔ a ɔwɔ ahoɔmberɛw sunsum mfe duawɔtwe, na no mu apon, ma onntum nntsen no mu koraa. 12Na Jesus hun no no, ɔfrɛɛ no see no dɛ, Ɔbaa, wɔasan wo efi w’ahoɔmberɛw mu. 13Na ɔdze ne nsa too no do, na ntsɛmara ɔtsenee, na ɔhyɛɛ Nyankopɔn enyimnyam. 14#Eks 20.9, 10; Deut 5.13, 14 Na ɔyɛɛ nhyiamudan mu panyin no ebufuw dɛ Jesus asa yarba wɔ ahomgyeda mu no, ɔsee nyimpadodow no dɛ, Nda esia wɔ hɔ a ɔsɛ dɛ wɔdze yɛ edwuma: no mu na hom mbra ma wɔnsa hom yarba, na nnyɛ ahomgyeda no mu a. 15Na Ewuradze buae see no dɛ, Ndabrabafo, ana hom mu biara nnsan ne nantwi, anaa n’asoasopɔnkɔ mmfi ban mu mmfa no nnkɔ esunomee ahomgyeda? 16Na ɔnnsɛ dɛ ɔbaa yi a ɔyɛ Abraham babaa a Satan akyekyer no, mfe araa duawɔtwe yi, wɔsan no fi nkyekyeree yi mu ahomgyeda anaa? 17Na ɔkaa dɛm no, hɔn a wɔkasaa tsiaa no no nyina enyi toe, na nyimpadodow no nyina dzii dɛw wɔ enyimnyam ndzɛmba a ɔyɛe no nyina ho.

Sinape Aba Nye Mbɔrkaw ho Bɛ

(Matthew 13.31-33; Mark 4.30-32)

18Na ɔsee dɛ, Nyankopɔn ahenman no tse dɛ ebɛnadze, na ebɛnadze koraa na medze mobɔto ho? 19Ɔtse dɛ sinape abafua a nyimpa fae kɔtoo no ture mu; na onyinii yɛɛ dua kɛse, na wimu nnoma bɛgyegyee n’abaw do. 20Na ɔkaa bio dɛ, Ebɛnadze na medze Nyankopɔn ahenman no mobɔto ho? 21Ɔtse dɛ mbɔrkaw a ɔbaa fae sumaa mbɔr korbaa ebiasa mu dze kesii dɛ ne nyina kawee.

Abow Tseabaa no

(Matthew 7.13, 14, 21-23)

22Na okoduaduaa nkurow nye nkuroba mu kyerɛkyerɛe, a ɔnam do rokɔ Jerusalɛm. 23Na obi see no dɛ, Ewuradze, ana kumaabi na wɔbɛgye hɔn nkwa? Na ɔsee hɔn dɛ, 24Hom mper nhɛn abow tseabaa no mu; na mese hom dɛ, Dodowara bɔhwehwɛ mu ahɛn na wonnkotum. 25Prɛko ara ofiwura no bɔsoɛr, na ɔatow abow no mu no, na hom bɛhyɛ ase egyina ekyir, na hom abɔ abow no mu ase dɛ, Ewuradze, Ewuradze, bue hɛn ae, na obobua ase hom dɛ, Minnyim mbrɛ hom fi; 26ɔno na hom bɛhyɛ ase aka dɛ, Yeedzidzi, yɛanom wɔ w’enyim, na akyerɛkyerɛ wɔ hɛn abrɔn mu pɛn; 27#Dwom 6.8 na ɔbɛka dɛ, Mese hom dɛ, minnyim mbrɛ hom fir: hom mfi mo do, hom emumuyɛfo nyina. 28#Mat 22.13; 25.30 #Mat 8.11, 12 Hɔ na osu nye asetwɛr bɛba, dɛ hom bohu Abraham nye Isaak nye Jakob, nye nkɔnhyɛfo no nyinara wɔ Nyankopɔn ahenman mu, na homankasa dze, wɔatam hom efi mu. 29Na wofi boka nye anee nye pomu nye habanmu bɛba abɛtsena ase wɔ Nyankopɔn ahenman mu. 30#Mat 19.30; 20.16; Mar 10.31 Na hwɛ, ekyidzifo bi wɔ hɔ a wobedzi kan, na edzikamfo bi wɔ hɔ a wobedzi ekyir.

Jesus Twa Jerusalɛm ho Kwadwom

(Matthew 23.37-39)

31Na dɔn kor no ara Farisiifo bi bae bɛsee no dɛ, Fi ha kɔ, na Herod repɛ wo eku wo. 32Na ɔsee hɔn dɛ, Hom nkɔ nkɛse ɔsɔ no dɛ, Hwɛ murutu mbɔnsam na masa yarba ndɛ nye ɔkyena, na da otsia ebiasa no mewie 33Naaso ɔsɛ me dɛ mutu kwan ndɛ nye ɔkyena, nye da ɔtoa do no: osiandɛ ɔnnkɛyɛ dɛ nkɔnhyɛnyi bɔtɔr beebiara gyedɛ Jerusalɛm. 34Ao! Jerusalɛm, Jerusalɛm, ɔwo a iku nkɔnhyɛfo no, na isiw hɔn a wɔasoma hɔn wo nkyɛn abo, mpɛn ahen na mepɛɛ dɛ moboaboa wo mba ano, dɛ mbrɛ akokɔ baatan boaboa ne mba ano wɔ ne ntsaban ase, na hom ammpɛ! 35#Dwom 118.26 Hwɛ, woegyaa wo fie ofi pan ama hom. Na mese hom dɛ, Hom runnhu me gyedɛ da a ɔbɛba dɛ hom bɛse dɛ, Nhyira nye nyia ɔnam Ewuradze ne dzin mu reba no.

Currently Selected:

Luke 13: MFANBRPC

Highlight

Copy