John 4

Jesus na Samarianyi Ɔbaa no

1Afei Jesus#4.1 Tsetse akyerɛwfo no binom ka dɛ: Ewuradze. hun dɛ Farisiifo no atse dɛ ɔno Jesus rinya esuafo pii na orunuma nyimpa sen John no 2(naaso Jesus nankasa ennuma na n’esuafo a), 3ofii Judea na osii mu kɔr Galilii bio. 4Nna otwar dɛ ɔfa Samaria. 5#Gye 33.19; Jos 24.32 Na afei okodur Samaria kurow bi a wɔfrɛ no Sikaar a ɔbɛn asaase a Jakob dze kyɛɛ ne ba Josef no ho; 6nna Jakob bura so wɔ hɔ. Nna Jesus aberɛ wɔ n’akwantu mu ntsi, ɔtsenaa bura no do dɛmara; bɛyɛ ewiaber duebien no.

7Na ɔbaa bi a ofi Samaria bae bɔtoow nsu. Jesus see no dɛ, Ma me bi monnom. 8(Nna n’esuafo no kɔ kurow mu rokɔtɔ edziban.) 9#Ezra 4.1-5; Neh 4.1, 2 Na Samarianyi ɔbaa no see no dɛ, Ɔyɛ dɛn na ɔwo a eyɛ Jewnyi ibisa emi a meyɛ Samarianyi ɔbaa hɔ nsu anom? (Ɔkaa dɛm osiandɛ nna Jewfo nye Samariafo nnka.)#4.9 Tsetse akyerɛwfo no binom mmfa iyi nnka ho. 10Jesus buae see no dɛ, Sɛ inyim Nyankopɔn akyɛdze no, nye nyia ɔse wo dɛ, Ma me bi monnom yi a, nkyɛ ibebisa no ma ɔaama wo nkwa nsu. 11Ɔbaa no see no dɛ, Owura, Innyi adze a edze rotow, na bura no mu so dɔ; hen koraa na ibenya nkwa nsu no? 12Ana ɔwo eso kyɛn hɛn egya Jakob a ɔkyɛɛ hɛn bura yi, na nankasa nye ne mba nye no mbowa noom bi? 13Jesus buae see no dɛ, Obiara a ɔbɔnom nsu yi bi no, nsukɔm bɛdze no bio. 14Na nyia ɔbɔnom nsu a mebɛma no no, nsukɔm nnkɛdze no da, na nsu a mebɛma no no bɛyɛ no mu nsubura a opuw nsu kɔ onnyiewiei nkwa mu. 15Ɔbaa no see no dɛ, Ma me dɛm nsu yi ɛ, amma nsukɔm anndze me ma mammba ammbɔtow nsu yi bi.

16Jesus see no dɛ, Kɔ kɛfrɛ wo kun na bra ha. 17Ɔbaa no buae see no dɛ, Minnyi kun. Jesus see no dɛ, Aka no yie dɛ, Minnyi kun: 18na nye mbanyin beenum atsena; na nyia enye no wɔ hɔ sesei yi mpo, ɔnnyɛ wo kun bi a; iyi dze, aka no nokwar ankasa. 19Ɔbaa no see no dɛ, Mo wura, muhu dɛ eyɛ nkɔnhyɛnyi. 20Hɛn egyanom sɔree wɔ bepɔw yi do, na hom dze, hom se dɛ Jerusalɛm nye bea a ɔsɛ dɛ nyimpa sɔr wɔ hɔ. 21Jesus see no dɛ, Ɔbaa, gye me dzi dɛ dɔn no reba a nnyɛ bepɔw yi do, eso nnyɛ Jerusalɛm na hom bɔsɔr Egya no. 22Hom sɔr dza hom nnyim; hɛn dze, yɛsɔr dza yenyim, osiandɛ nkwagye fi Jewfo mu. 23Na dɔn no reba, na oenya edu, dɛ hɔn a wɔsɔr nokwar mu no bɔsɔr Egya no wɔ sunsum nye nokwar mu: na iyinom dɛm na Egya no rohwehwɛ dɛ hɔn a wɔsɔr no no yɛ. 24Nyankopɔn yɛ sunsum, na hɔn a wɔsɔr no no, ɔsɛ dɛ wɔsɔr no wɔ sunsum nye nokwar mu. 25Ɔbaa no see no dɛ, Minyim dɛ Messia no (a wɔfrɛ no Kraest no) reba; na ɔnodze, sɛ ɔba a, ɔbɛpaa mu aka adze nyina akyerɛ hɛn. 26Jesus buaa no dɛ, Emi a menye wo rekasa yi, emi nye ɔno.

27Na ha yi na n’esuafo no bae; na ɔyɛɛ hɔn ahobow dɛ ɔnye ɔbaa no rekasa, naaso obi emmbisa no dɛ, Erohwehwɛ ebɛnadze, anaa, Ɔyɛ dɛn na enye no rekasa yi? 28Na ɔbaa no gyaa n’ehina no hɔ na osii mu kɔr kurow no mu, na ɔsee kuromba no dɛ, 29Hom mbra mbɔhwɛ nyimpa bi a ɔaka dza mayɛ nyina akyerɛ me. Ana nnyɛ oyi nye Kraest no bi a? 30Nna nyimpa fii kurow no mu dɛ wɔreba ne nkyɛn. 31Na ne ntamu no, n’esuafo no see no dɛ, Rabae, dzidzi. 32Na obuaa hɔn dɛ, Mowɔ edziban midzi a hom nnyim. 33Dɛm ntsi n’esuafo no sesee hɔnho dɛ, Ana obi abrɛ no biribi ma oedzi? 34Jesus see hɔn dɛ, M’edziban nye dɛ meyɛ nyia ɔsomaa me no pɛ na muwie n’edwuma. 35Ana hom nnka dɛ aka abosoom anan na twaber edu? Hwɛ! Mese hom dɛ, Hom mma hom enyi do nhwɛ nhaban no, dɛ oenya ahoa dze kyerɛ dɛ edu twaber. 36Na nyia otwa no gye akatua na ɔboaboa aba no ano kɔ onnyiewiei nkwa mu, na nyia oduae nye nyia otwae nyina aabɔ mu edzi dɛw. 37Na iyi mu asɛm no yɛ nokwar dɛ obi dua na obi twa. 38Mosomaa hom dɛ hom nkotwa dza hom nnyɛɛ ho edwuma; binom aberɛ hɔnho ayɛ, na hom dze, hom ebedzi hɔn edwuma mu aba.

39Na Samariafo a wɔwɔ kurow yi mu dodowara gyee no dzii wɔ dase a ɔbaa no dzii dɛ, Ɔaka dza mayɛ nyina akyerɛ me no ntsi. 40Dɛm ntsi Samariafo baa ne nkyɛn no, wɔserɛɛ no dɛ ɔnye hɔn ntsena. Na ɔtsenaa hɔ nda ebien. 41Na nyimpa dodow a ɔkyɛn nkan no gyee no dzii wɔ n’asɛm ntsi, 42na wɔsee ɔbaa no dɛ, Afei nnyɛ w’asɛm ntsi na yɛgye dzi, na hɛnankasa so yɛatse na yenyim dɛ oyi nye wiadze Agyenkwa no.

Jesus Sa Ɔpanyin bi ne ba Yar

43Na nda ebien twaa mu no, ofii hɔ sii mu kɔr Galilii. 44#Mat 13.57; Mar 6.4; Luk 4.24 Na Jesus noara gyee dase dɛ nkɔnhyɛnyi nnyi enyidzi wɔ nankasa no kurow mu. 45#Joh 2.23 Na odur Galilii no, Galiliifo gyee no too mu, osiandɛ wohun dza ɔyɛe wɔ Jerusalɛm wɔ afahyɛ no ase nyina; osiandɛ hɔn so kɔr afahyɛ no ase bi.

46 # Joh 2.1-11 Na Jesus baa Kaana a ɔwɔ Galilii mbrɛ ɔdaan nsu wenyin no bio. Na ahenkowaa panyin bi wɔ hɔ a ne ba yar wɔ Karpernaum. 47Na ɔtsee dɛ Jesus fi Judea aba Galilii no, ɔkɔr ne nkyɛn kɛserɛɛ no dɛ ɔmbra mbɛsa ne ba no yarba, na ɔreyɛ ewu. 48Na Jesus see no dɛ, Sɛ hom ennhu nsɛnkyerɛdze nye anwanwadze a, hom nnkɛgye edzi da. 49Ɔpanyin no see no dɛ, Mo wura, Sian bra ansaana me ba no ewu. 50Jesus kaa kyerɛɛ no dɛ, Kɔ, wo ba no atse apɔw. Na nyimpa no gyee asɛm a Jesus kaa kyerɛɛ no no dzii, na ɔkɔree. 51Na ɔresan akɔ no, no nkowaa behyiaa no kaa dɛ ne ba no atse apɔw. 52Na obisaa hɔn dɔn kor a no ho hyɛɛ ase yɛɛ no dzen; na wɔsee no dɛ, Ndeda ewiaber dɔnkor no mu na papu no gyaae. 53Na egya no hun dɛ dɔn no ara a Jesus see no dɛ, Wo ba no atse apɔw no mu a, na ɔgyee dzii, ɔno nye ne fifo nyina. 54Iyi so nye asɛnkyerɛdze a otsia ebien a Jesus fi Judea baa Galilii no ɔyɛe.

Currently Selected:

John 4: MFANBRPC

Highlight

Copy