John 13

Jesus Hohor N’esuafo no Anan ho

1Na ansaana apaho afahyɛ no rubodu no, Jesus nyim dɛ no dɔn edu dɛ oribefi wiadze yi mu akɔ Egya nkyɛn no, ɔdɔɔ nankasa nedze a wɔwɔ wiadze no, ɔdɔɔ hɔn kesii ewiei. 2Na woridzidzi no, na abɔnsam enya dze ahyɛ Judas Iskariot, Simon ne ba no, n’akoma mu dɛ onkeyi no mma, 3na Jesus nyim dɛ Egya no dze ndzɛmba nyina ahyɛ ne nsa, na dɛ ofi Nyankopɔn nkyɛn bae, na ɔrokɔ Nyankopɔn nkyɛn no, 4ɔsoɛree fiir edzidzi na oyii ne ntar guu nkyɛn, na ɔfaa entuho bɔɔ n’asen do. 5Na afei ohuee nsu guu guarsɛn mu, na ɔhyɛɛ ase hohoor n’esuafo no anan ho, na ɔdze entuho no a ɔbɔ n’asen no pepae. 6Na obodur Simon Peter do. Na Peter see no dɛ, Ewuradze, ɔwo rohohor emi m’anan ho? 7Jesus buaa no dɛ, Dza mereyɛ yi, sesei dze enntse ase, na daakye na ibohu. 8Peter see no dɛ, Ennkɔhohor m’anan ho da! Jesus buaa no dɛ, Sɛ mannhohor wo ho a, innyi m’afa. 9Simon Peter see no dɛ, Ewuradze, nnyɛ m’anan nko, na me nsa nye me tsir ho so. 10Jesus see no dɛ, Nyia oeguar no nnhia eguar bio, gyedɛ n’anan ho hohor, na no ho nyina efir. Na hom ho efir, na mbom nnyɛ hom nyina. 11Nna onyim nyia oribeyi no ama: dɛm ntsi na ɔsee dɛ, Nnyɛ hom nyina na hom ho efir no.

12 # Luk 22.27 Na owiee hɔn anan ho hohor, na ɔfaa n’atar na ɔtweer hɔ bio no, ɔsee hɔn dɛ, Hom ehu dza mayɛ hom yi? 13Hom frɛ me Kyerɛkyerɛfo nye Ewuradze, na hom ka no yie, osiandɛ meyɛ dɛm so. 14Na sɛ emi, Kyerɛkyerɛfo nye Ewuradze, mahohor hom anan ho a, hom so ɔsɛ dɛ hom hohor hom anan ho nkorkor. 15Na mama hom mfatoho, ama hom so aayɛ dɛ mbrɛ mayɛ hom yi. 16Mese hom nokwar mu dɛ, akowaa nnkyɛn no wura, eso ɔsomafo nnkyɛn nyia ɔsomaa no no. 17Sɛ hom nyim yinom na hom dzi do a, nhyira aka hom. 18Mennka no wɔ hom nyina ho: minyim hɔn a mapa hɔn; na dɛ kyerɛw no bɛba mu dɛ, Nyia ɔnye me dzidzi no na ɔama n’anantsir do etsia me no. 19Afei mereka akyerɛ hom ansaana aba mu, na sɛ ɔba mu a, hom aagye edzi dɛ emi nye no. 20#Mat 10.40; Mar 9.37; Luk 9.48; 10.16 Mese hom nokwar mu dɛ, Nyia ɔgye obiara a mosoma no no, ɔgye me; na nyia ɔgye me no, ɔgye nyia ɔsomaa me no.

Jesus Ka Dɛ Wobeyi No Ama

(Matthew 26.20-25; Mark 14.17-21; Luke 22.21-23)

21Jesus kaa dɛm no, no sunsum ho guaan no, na ɔgyee dase dɛ, Mereka no nokwar mu akyerɛ hom dɛ, Hom mu baako beyi me ama. 22Esuafo no hwehwɛɛ hɔn enyim nkorkor, naaso woennhu nyimpa kor a ɔrekyerɛ. 23Nna esuafo no mu baako a Jesus dɔɔ no no twer no bo mu. 24Dɛm ntsi Simon Peter too ne nsa dɛ ombisa nyia ɔreka no ho asɛm no. 25Na ɔpae tweer Jesus no bo mu no obisaa no dɛ, Ewuradze, woana a? 26Jesus buaa dɛ, Ɔno nye nyia medze trɔma bɔbɔ mu ama no no. Na ɔdze trɔma no bɔɔ mu no, ɔdze maa Judas Iskariot, Simon ne ba no. 27Na trɔma no ekyir no, nna Satan kɛhɛɛn no mu. Na Jesus see no dɛ, Dza ereyɛ no, yɛ no ntsɛm. 28Na hɔn a wɔtsetse pon no ho mu biara ennhu dza osian ntsi ma ɔsee no dɛm. 29Na binom dween dɛ Judas kitsa kotoku no ntsi na Jesus see no dɛ, Kɔtotɔ dza ohia hɛn sie afahyɛ no, anaadɛ ɔmfa biribi mma ehiafo. 30Na ɔno dze, ɔgyee trɔma no, ntsɛmara na opuei; nna ɔyɛ anafua.

Mbra Fofor no

31Na opuei no, Jesus see dɛ, Afei wɔahyɛ nyimpa Ba no enyimnyam, na wɔahyɛ Nyankopɔn enyimnyam wɔ no mu. 32Na Nyankopɔn so bɛhyɛ no enyimnyam wɔ nankasa no mu, na ɔbɛhyɛ no enyimnyam ntsɛm. 33Mbofra nkakramba, aka kakrabaabi na menye hom wɔ hɔ: hom bɔhwehwɛ me, na dɛ mbrɛ mesee Jewfo no dɛ, Mbrɛ morokɔ no, hom runntum hɔ ba no, dɛmara na mese hom so sesei. 34Mbrasɛm fofor na medze ma hom, dɛ hom ndodɔ homho nkorkor: dɛ mbrɛ madɔ hom no, hom so ndodɔ homho dɛmara. 35Ɔnam iyi do na nyimpa nyina bohu dɛ hom yɛ m’esuafo, sɛ hom wɔ ɔdɔ ma homho nkorkor a.

Jesus Ka dɛ Peter Bɛpa no

(Matthew 26.31-35; Mark 14.27-31; Luke 22.31-34)

36Simon Peter see no dɛ, Ewuradze, erokɔ hen? Jesus buaa dɛ, Mbrɛ morokɔ no irunntum mo do ka sesei, na ekyir no dze, ebɛka mo do. 37Peter see no dɛ, Ewuradze, ebɛnadze ntsi na murunntum wo do ka sesei: medze mo nkwa bɔto hɔ ama wo. 38Jesus bisaa no dɛ, Edze wo nkwa bɔto hɔ ama me? Meka no wɔ nokwar mu kyerɛ wo dɛ, Akokɔ rommbɔn mpo na apa me mprɛnsa.

Currently Selected:

John 13: MFANBRPC

Highlight

Copy