Gyenesis 38

Juda Na Tamar

1Na ɔbaa dɛ, aber no ara mu na Juda fii no nuanom nkyɛn kɔree, na ɔkɛtsenaa Adullamnyi bi a ne dzin dze Hira ne nkyɛn. 2Na Juda hun Keenannyi bi a ne dzin dze Sua ne babaa bi wɔ hɔ; na ɔwaar no, na ɔnye no dae. 3Na onyinsenii, na ɔwoo babanyin; na ɔfrɛɛ no Er. 4Na onyinseen bio, na ɔwoo babanyin; na ɔfrɛɛ no Onan. 5Na ɔwoo babanyin bio, na ɔfrɛɛ no Sela: na aber a ɔwoo no no nna ɔwɔ Kezib. 6Na Juda gyee yer maa n’abakan Er, na ne dzin dze Tamar. 7Na Juda n’abakan Er yɛɛ bɔn wɔ EWURADZE enyim; na EWURADZE kum no. 8Na Juda see Onan dɛ, Kɔ wo nua ne yer nkyɛn, na fa no kunabaa, na wo mba ma wo nua. 9Na Onan nyim dɛ mba no nnkɛyɛ nedze; na ɔbaa dɛ, aber biara a ɔkɔr no nua ne yer nkyɛn no, ɔmaa no ho nsu no guu famu, amma ɔaamma no nua mba. 10Na dza ɔyɛe no yɛ bɔn wɔ EWURADZE enyim: na okum no so. 11Nna Juda see n’asew Tamar dɛ, Tsena ekunayɛ mu wɔ w’egya fie kɛpem dɛ me ba Sela benyin: osuro dɛ, bɛyɛ na no so oewu dɛ no nuanom no. Na Tamar kɔree na ɔkɛtsenaa n’egya fie. 12Na ɔwɔ hɔ wɔ hɔ nna Juda ne yer a ɔyɛ Sua ne babaa no, owui. Na Juda no werɛ kyekyeree no, ɔkɔr no nguansusuafo nkyɛn wɔ Timna, ɔno nye ne nyɛnko Adullamnyi Hira. 13Na wɔkaa kyerɛɛ Tamar dɛ, Hwɛ, w’asew rokɔ Timna ekosusua no nguan ho nhwi. 14Na oyii no kuna ntar wɔ no ho, na ɔdze ne nkataenyim kataa n’enyim, na ɔkataa noho kɛtsenaa Enaim abotsenano, wɔ Timna kwan nkyɛn; osiandɛ ohun dɛ Sela enyin, naaso Juda ammfa no amma no awar. 15Na Juda hun no no, obuu no dɛ edwaman a, osiandɛ ɔakata n’enyim. 16Na ɔmanee kɔr ne nkyɛn wɔ kwan no ne nkyɛn, na ɔsee dɛ, Bra, meserɛ wo, ma membra wo nkyɛn: nna onnyim dɛ n’asew no a. Na Tamar bisaa no dɛ, Ebɛnadze na edze bɛma me, na enye me ada? 17Na ɔsee dɛ, Mebɛma wɔdze apɔnkyeba fi mbowa no mu abrɛ wo. Na obisaa no dɛ, Ebɛma me ahobadze bi ma ɔdze ekodu dɛ ebɛma wɔdze aba? 18Na Juda bisaa no dɛ, Ebɛn ahobadze na memfa mma wo? Na ɔsee dɛ, Wo nsɔwanokaba nye w’ahoma, nye wo poma a okitsa wo nsamu no. Na Juda dze maa no, na ɔnye no dae, na ɔnye no nyinsenii. 19Na Tamar soɛree kɔree, na oyii ne nkataenyim no wɔ no ho, na ɔfaa no kuna ntar hyɛe. 20Na Juda dze apɔnkyeba no maa ne nyɛnko Adullamnyi no, dɛ ɔmfa nkɛgye ahobadze no wɔ ɔbaa no nsa mu: naaso oennhu no. 21Nna obisaa no kuromfo no dɛ, edwaman a ɔtse Enaim kwan nkyɛn no wɔ hen? Na wɔsee dɛ, Edwaman biara mmbaa ha. 22Na ɔsanee baa Juda hɔ, na ɔbɛsee dɛ, Mennhu no; na eso ekuromfo no see dɛ, Edwaman biara mmbaa ha. 23Na Juda see dɛ, Ma ɔmfa, ɔno bohu na hɛn enyim egu ase: hwɛ, memaa wɔdze apɔnkyeba yi kɔree, na ennhu no. 24Na ɔbaa dɛ odzii bɛyɛ abosoom ebiasa n’ekyir no, wɔkaa kyerɛɛ Juda dɛ, W’asew Tamar abɔ edwaman, na hwɛ, ɔnam n’edwaman mu enyinsen so. Na Juda see dɛ, Hom nkɛfa no mbra ma wɔnhyew no. 25Na wɔkɛfaa no bae no, nna Tamar somae ma wɔkɛsee n’asew no dɛ, banyin a ndzɛmba yi yɛ nedze no, ɔno na menye no nyinsen: ntsi, Meserɛ wo, hwehwɛ nyia ndzɛmba yi yɛ nedze, nsɔwanokaba, nye ahoma, nye poma yi. 26Na Juda hun dɛ noara nedze a, na ɔsee dɛ, ɔtsen sen me; susuampa dɛ mammfa no amma me ba Sela ntsi. Na ɔnye no annda bio. 27Na ɔbaa no n’awoo durii no, na, hwɛ, nta na wɔwɔ ne yamu. 28Na ɔbaa dɛ aber a ɔrowo no, nna kor dze ne nsa puei; na awogyefo no faa ahoma memen dze kyekyeer ne nsa dɛ, Oyi na odzii kan puei. 29Na ɔbaa dɛ, ɔtwee ne nsa kɔdɔɔ mu, na, hwɛ, no nua puei; na ɔwogyefo no see dɛ, ɔyɛ dɛn ntsi na atsew mu aba yi? Dɛm ntsi wɔfrɛɛ ne dzin Perez. 30Na n’ekyir no na nyia ahoma memen kyekyer ne nsa no bae: na wɔfrɛɛ no Zera.

Currently Selected:

Gyenesis 38: MFANBRPC

Highlight

Copy