Gyenesis 30

1Na Rahel hun dɛ ɔnnwo ba mma Jakob no, Rahel n’enyi beer no nua no; na ɔsee Jakob dɛ, Ma me mba, ɔno mubowu. 2Na Jakob no bo fuuw Rahel: na ɔsee dɛ, Ana midzi Nyankopɔn a ɔakam wo yamu mba no ananmu? 3Rahel see dɛ, Hwɛ, m’abaawa Bilha nye yi, nye no nda; ama ɔaawo egu me serɛ do, na mo so menam no do meenya mba. 4Na ɔdze n’abaawa Bilha maa no awar: na Jakob kɔr ne nkyɛn. 5Na Bilha nyinsenii, na ɔwoo babanyin maa Jakob. 6Na Rahel see dɛ, Nyankopɔn edzi m’asɛm ama me, na eso oetsie me ndze, na ɔama me babanyin: dɛm ntsi ɔfrɛɛ ne dzin Dan a asekyerɛ nye: ɔsɛndzifo. 7Na Rahel n’abaawa Bilha nyinseen bio, na ɔwoo babanyin a otsia ebien maa Jakob. 8Na Rahel see dɛ, Menye m’akyerɛbaa edzi aper a no mu yɛ dzen, na medzi nyim: na ɔfrɛɛ ne dzin Naftali a asekyerɛ nye, M’akodzi. 9Na aber a Leah hun dɛ n’awoo mu atwe oegyaa awoo no, ɔfaa n’abaawa Zilpa, na ɔdze no maa Jakob awar. 10Na Leah n’abaawa Zilpa woo babanyin maa Jakob. 11Na Leah see dɛ, Siar aba, na ɔfrɛɛ ne dzin Gad a asekyerɛ nye, Yiedzi. 12Na Leah n’abaawa Zilpa woo babanyin a otsia ebien maa Jakob. 13Na Leah see dɛ, Ahomkanyi nye me, na mbabaa bɛfrɛ me ɔhomkanyi: na ɔfrɛɛ ne dzin Aser a asekyerɛ nye Nhyira. 14Na ewifua twaber mu no, Reuben kɔr hamu kohun mandreke,#30.14 MANDRAKE: Ɔyɛ eduaba bi a ɔma awoo na ɔsan so yɛ ɔdɔ eduaba. na ɔdze brɛɛ ne na Leah. Nna Rahel see Leah dɛ, Meserɛ wo, ma me wo ba ne mandreke yi bi. 15Na ɔsee no dɛ, Ana ɔyɛ asɛm ba dɛ egye mo kun, na me ba ne mandreke yi so erebɛgye? Na Rahel see dɛ, Nna ma ɔnye wo nda anafua yi osian wo ba ne mandreke no ntsi. 16Na Jakob fi hamu ewimbir reba no, Leah puei kehyiaa no kwan, na ɔsee dɛ, Bra me nkyɛn, na ampaara medze me ba ne mandreke abɔ wo paa. Na ɔnye no daa anafua no. 17Na Nyankopɔn tsiee Leah, na onyinsenii, na ɔwoo babanyin a otsia enum maa Jakob. 18Na Leah see dɛ, Nyankopɔn dze m’apaabɔdze ama me, osiandɛ medze m’abaawa memaa mo kun awar: na ɔfrɛɛ ne dzin Isakar; ase nye, Akatua nye yi. 19Na Leah nyinseen bio, na ɔwoo babanyin a otsia esia maa Jakob. 20Na Leah see dɛ, Nyankopɔn ama me akyɛdze a oye; afei na mo kun nye me bɛtsena, osiandɛ mawo mbabanyin beesia ama no; na ɔfrɛɛ ne dzin Zebulun; ase nye, Atseyie. 21Na n’ekyir no ɔwoo babaa, na ɔfrɛɛ ne dzin Dina. 22Na Nyankopɔn kaa Rahel, na otsiee no, na obuee n’awoo kwan. 23Na onyinsenii, na ɔwoo babanyin: na ɔsee dɛ, Nyankopɔn eyi m’ahorohoraa: 24na ɔfrɛɛ ne dzin Josef, see dɛ, EWURADZE mma me ɔba kor so nka ho.

Jakob N’ahonya

25Na ɔbaa dɛ aber a Rahel woo Josef no, nna Jakob see Laban dɛ, Gya me kwan ma monkɔ mbrɛ mifi na me man mu. 26Fa me yernom nye me mba a hɔn ntsi masom wo no ma me, na ma monkɔ: na ɔwoara nyim mo som a medze masom wo. 27Na Laban see no dɛ, Sɛ afei menya w’enyim enyimnyam a, tsintsim: na mehu dɛ ɔwo ntsi na EWURADZE ehyira me. 28Na ɔsee dɛ, Kyerɛ me w’akatua, na medze bɛma. 29Na ɔsee no dɛ, ɔwoara nyim beebi mbrɛ mesi na masom wo, na mbrɛ wo mbowakuw esi na wɔayɛ wɔ me nsamu. 30Na mebae no, nna kumaabi na ewɔ, nna ɔadɔr ɔayɛ pii yi; na EWURADZE ehyira wo wɔ beebiara a mefae: na afei aber bɛn na mobɔhwɛ mara me fie so? 31Na ɔsee dɛ, Ebɛnadze na memfa memma wo? Na Jakob see dɛ, Mma mma me hwee: sɛ ebɛyɛ iyi ama me a, ɔno mebɛnyɛn wo nguan bio, na mahwɛ hɔn. 32Ndɛ mebɛfa wo nguan nyinara mu, na meyiyi nguan a hɔn ho yɛ woranworan nye ntokowa ntokowa nyinara, na nguan etuntum a wɔwɔ nguantsen no mu nyinara, nye mpɔnkye no dza hɔn ho yɛ ntokowa ntokowa nye woranworan no efi mu: na hɔn a wɔtse dɛm no na ɔnyɛ m’apaabɔdze. 33Ama daakye eba m’apaabɔdze a ɔda w’enyim yi do a, me ndzeyɛtsenenee eebua ama me; mpɔnkye no mu dza hɔn ho nnyɛ woranworan nye ntokowa ntokowa no, na nguantsen no hɔn mu dza wɔnnyɛ etuntum no nyinara, ɔno na sɛ wohu wɔ mo hɔ a, wombu no adzewiadze. 34Na Laban see dɛ, Hwɛ, ka mo nko a nkyɛ dza aka no ara ɔbɛyɛ dɛmara. 35Na da no ara Jakob yiyii mpɔnkyenyin a hɔn ho yɛ nsensanee nsensanee nye ntokowa ntokowa no; nye mpɔnkyeber a hɔn ho yɛ woranworan nye ntokowa ntokowa no nyinara, dza fufuw wɔ hɔn ho no nyinara, nye nguantsen no hɔn mu etuntum no nyinara, na ɔdze hɔn hyɛɛ ne mbabanyin nsa; 36na ɔmaa ndaansa kwan daa ɔnoara nye Jakob ntamu: na Jakob nyɛɛn Laban no nguan nkaa no. 37Na Jakob faa sɛsɛ dua nye almɔnd dua nye odwon dua mbaa momon; na oyiyii ho nsema efufuw, na ɔmaa mbaa no ho efufuw no puepuei. 38Na ɔdze mbaa no a oyiyii ho no guu nguan no hɔn tsentsen do wɔ nsuka a ɔwɔ mu mbrɛ nguan no ba hɔ bɔnom nsu no mu; na wɔba bɔnom nsu a nna wɔfow hɔnho. 39Na nguan no nyinsenyinsenii wɔ mbaa no enyim, na nguan no wowoo nsensanee nsensanee, woranworan, nye ntokowa ntokowa. 40Na Jakob paa nguambaa no na ɔmaa nguan no hɔn enyim kɔr Laban nguan no mu nsensanee nsensanee nye etuntum no nyinara hɔn do; na ɔyɛɛ narankasa no nguankuw wɔ nkyɛn, na ɔammfa ammfora Laban no nguan no mu. 41Na ɔbaa dɛ, aber biara sɛ nguan a hɔn ho yɛ dzen no wonyinsenyinsen a, nna Jakob dze mbaa no ekogu nguan no hɔn enyim wɔ nsuka no mu, ama woeenyinsenyinsen mbaa no do; 42na sɛ nguan no yɛ mberɛw dze a, ɔno ɔmmfa nngu mu: dɛm ntsi hɔn a wɔyɛ mberɛw no nye Laban dze, na hɔn a hɔn ho yɛ dzen no nye Jakob dze. 43Na Jakob yɛɛ kɛsenara, na onyaa nguan pii, nye mfonabaa nye nkowaa, nye efumpɔnkɔ nye nsoasopɔnkɔ.

Currently Selected:

Gyenesis 30: MFANBRPC

Highlight

Copy