Eksodɔs 8

Ntwɛr

1Na EWURADZE kaa kyerɛɛ Moses dɛ, Kɔ Farao nkyɛn, na se no dɛ, Mbrɛ EWURADZE se nye yi, Ma me man nkɔ, na wɔnkɔsom me. 2Na sɛ ammpen ma wɔaannkɔ a, hwɛ, medze ntwɛr bofura wo ntoaado nyinara: 3na esutsen no bɔdɔ ntwɛr menyamenya, na wɔbɔfofow aba wo fie, nye w’adankyir, nye wo mpa do, nye wo nkowaa fie, nye wo man do, nye wo mfononoo mu, nye wo mbɔrnkutu mu: 4na ntwɛr no bɔfow aba ɔwo, nye wo mamfo, nye wo nkowaa nyinara do. 5Na EWURADZE see Moses dɛ, Se Aaron dɛ, Fa wo poma tsen wo nsa wɔ esutsen, nye nsubansuba, nye nsutaae do, na ma ntwɛr mbra Egypt asaase do. 6Na Aaron tseen ne nsa wɔ Egypt nsu do; na ntwɛr no fowee bae, na wobofuraa Egypt asaase do. 7Na akɔmfo no dze hɔn nkaber no yɛɛ dɛmara, na wɔmaa ntwɛr fowee baa Egypt asaase do. 8Nna Farao frɛɛ Moses nye Aaron, na ɔsee dɛ, Hom mpa EWURADZE kyɛw ma onyi ntwɛr no mfi emi, nye me man do; na mebɛma ɔman no akɔ, ma wɔaakɔbɔ afɔr ama EWURADZE. 9Na Moses see Farao dɛ, W’adaworom: ebɛn aber na mempa kyɛw memma ɔwo, nye wo nkowaa, nye wo man, ma wɔnsɛɛ ntwɛr no mfi ɔwo nye w’efi do, na wɔnka esutsen no nko mu? 10Na ɔsee dɛ, Ɔkyena a. Na ɔsee dɛ, Ɔnyɛ dɛ dza aka no ara: ama eehu dɛ obiara nnyi hɔ a ɔtse dɛ EWURADZE hɛn Nyankopɔn. 11Na ntwɛr no befi ɔwo, nye w’efi, nye wo nkowaa, nye wo man do; esutsen no mu nko na wɔbɛka. 12Na Moses nye Aaron fii Farao nkyɛn kɔree: na Moses sui frɛɛ EWURADZE wɔ ntwɛr no a ɔdze baa Farao do no ho. 13Na EWURADZE yɛɛ dɛ mbrɛ Moses kae no: na ntwɛr no wuwui wɔ efi mu, nye abangua do, nye haban mu. 14Na wɔboaboaa hɔn ano ekuwekuw: na asaase no do bɔnee. 15Na Farao hun dɛ ahotɔ aba mu no, opiriim n’akoma, na oenntsie hɔn: dɛ mbrɛ EWURADZE kae no.

Dwuw

16Na EWURADZE see Moses dɛ, Se Aaron dɛ, Tsen wo poma no, na fa bɔ asaase do huntuma, ma ɔndan dwuw wɔ Egypt asaase nyinara do. 17Na wɔyɛɛ dɛm; na Aaron dze no poma no tseen ne nsa, na ɔdze bɔɔ asaase do huntuma, ma dwuw fɔɔr nyimpa nye mbowa: asaase no do huntuma nyinara daan dwuw wɔ Egypt asaase nyinara do. 18Na akɔmfo no dze hɔn nkaber yɛɛ dɛmara dɛ wɔrema dwuw aba na woenntum: na dwuw no wɔ nyimpa nye mbowa ho. 19#Luk 11.20 Nna akɔmfo no see Farao dɛ, Nyankopɔn nsatseaba nye yi: na Farao n’akoma pirimii, na oenntsie hɔn; dɛ mbrɛ EWURADZE kae no.

Atsɛn

20Na EWURADZE see Moses dɛ, Soɛr anapaatu, na kegyina Farao enyim; hwɛ, ɔreba nsu no ho; na se no dɛ, Mbrɛ EWURADZE se nye yi, Ma me man nkɔ, ma wɔnkɔsom me. 21Na sɛ ennkɛma me man akɔ a, hwɛ, mebɛma atsɛn menyamenya aba ɔwo, nye wo nkowaa, nye wo man, nye w’efi do: na Egyptfo efiefi mu, na asaase a wɔtse do no so atsɛn menyamenya bɛyɛ no amaama. 22Na da no mubotwa Gosen asaase a me man tse do no egya, ma atsɛn menyamenya aannkɔ hɔ, ama eehu dɛ emi nye EWURADZE wɔ asaase finimfin. 23Na medze ɔhe mobɔto me man nye wo man ntamu: ɔkyena na asɛnkyerɛdze yi bɛba. 24Na EWURADZE yɛɛ dɛm; na atsɛn menyamenya a hɔn ano yɛ yaw baa Farao fi mu, nye no nkowaa efi mu: na osian atsɛn menyamenya no ntsi Egypt asaase no nyinara do sɛɛe. 25Na Farao frɛɛ Moses nye Aaron, na ɔsee dɛ, Hom nkɔ nkɔbɔ afɔr mma hom Nyankopɔn wɔ asaase no do. 26Na Moses dɛ, Ɔnnsɛ dɛ wɔyɛ no dɛm; osiandɛ Egyptfo ekyiwadze na yɛdze bɔbɔ afɔr ama EWURADZE hɛn Nyankopɔn no: hwɛ, ana yɛmfa Egyptfo ekyiwadze mbɔ afɔr wɔ hɔn enyiwa mu, na wonnkesiw hɛn abo bi a? 27Yebotu ndaansa kwan akɔ sar no do, na yɛakɔbɔ afɔr ama EWURADZE hɛn Nyankopɔn, dɛ mbrɛ ɔbɛhyɛ hɛn no. 28Na Farao see dɛ, mebɛma hom akɔ, ama hom aakɔbɔ afɔr ama EWURADZE hom Nyankopɔn no wɔ sar no do; na ekyir nko na hom nnkɔ: hom mpa kyɛw mma me. 29Na Moses see dɛ, Hwɛ, mirifi wo nkyɛn akɔ, na makɛpa EWURADZE kyɛw ma atsɛn menyamenya no eefi Farao, nye no nkowaa, nye ne man do ɔkyena: na abrasɛm nko na mma Farao nndzi bio, dɛ ɔnnkɛma ɔman no akɔ akɔbɔ afɔr ama EWURADZE. 30Na Moses fii Farao nkyɛn kɔree, na ɔkɛpaa EWURADZE kyɛw. 31Na EWURADZE yɛɛ dɛ mbrɛ Moses kae no; na oyii atsɛn menyamenya no fii Farao, nye no nkowaa, nye ne man do; kor mpo annka. 32Na Farao piriim n’akoma aber yi so, na ɔamma ɔman no annkɔ.

Currently Selected:

Eksodɔs 8: MFANBRPC

Highlight

Copy