Eksodɔs 6

1Na EWURADZE see Moses dɛ, Afei na irubohu dza medze merebɛyɛ Farao: na nsa a ɔyɛ dzen do na ɔbɛma wɔakɔ, na nsa a ɔyɛ dzen do na ɔbɛpam hɔn efi n’asaase do.

Nyankopɔn Kasa Kyerɛ Moses

2 # Gye 17.1; 28.3; 35.11; Eks 3.13-15 Na Nyankopɔn kasaa kyerɛɛ Moses, na ɔsee no dɛ, Emi nye EWURADZE: 3na miyii moho mekyerɛɛ Abraham, Isaak, nye Jakob, dɛ Nyankopɔn Otumfo, na me dzin YHWH (EWURADZE) no dze mamma wɔammfa ennhu me. 4Na eso mama m’ahyɛmu a menye hɔn dzii no etsim, dɛ medze Keenan asaase a ɔyɛ hɔn ahɔhobea asaase no a wɔyɛ do ahɔho no mebɛma hɔn. 5Na nkyii so matse Israelmba a Egyptfo dzii hɔn nya no, hɔn apempen; na makaa m’ahyɛmu no. 6Dɛm ntsi se Israelmba dɛ, Emi nye Jehova, na mibeyi hom mefi Egyptfo ndzesoadze no ase, na meyi hom efi hɔn nkowaasom no mu, na medze abasa a wɔatsɛw mu, nye ntsɛmbu akɛse agye hom: 7na mafa hom ayɛ me man, na mayɛ hom Nyankopɔn: na hom ehu dɛ emi nye Jehova hom Nyankopɔn a oyii hom fii Egyptfo ndzesoadze ase no. 8Na medze hom bɔkɔ asaase a memaa me nsa do wɔ ho dɛ medze mebɛma Abraham, Isaak, nye Jakob no do, na medze bɛma hom dɛ egyapadze: emi nye Jehova. 9Na Moses kaa dɛm kyerɛɛ Israelmba no: na ahomtsew nye nkowaasom dzendzen ntsi woenntsie Moses.

10Na EWURADZE kaa kyerɛɛ Moses dɛ, 11Kɔ, kɛka kyerɛ Egypthen Farao, dɛ ɔmma Israelmba mfi asaase no do nkɔ. 12Na Moses kasae wɔ EWURADZE enyim see dɛ, Hwɛ, Israelmba enntsie me; na ɔbɛyɛ dɛn na Farao betsie emi a wonntwaa m’anofamfa twatsia yi? 13Na EWURADZE kasaa kyerɛɛ Moses nye Aaron, na ɔdze hyɛɛ hɔn nsa dɛ wɔnkɔ Israelmba, nye Egypthen Farao nkyɛn, nkeyi Israelmba no mfi Egypt asaase do.

Moses Na Aaron Hɔn Ebusua

14Iyinom nye hɔn egyanom efi mu etsitsir: Israel n’abakan Reuben ne mbabanyin; Hanok, Pallu, Hezron, nye Karmi: iyinom nye Reuben n’ebusuafo. 15Na Simeon ne mbabanyin; Jemuel, Jamin, Ohad, Jakin, Zohar, nye Saul, Keenannyi ɔbaa bi ne babanyin no: iyinom nye Simeon n’ebusuafo. 16#Nka 3.17-20; 26.57, 58; 1 Mbe 6.16-19 Na iyinom nye Levi ne mbabanyin no hɔn edzin dɛ mbrɛ hɔn mbusuasantsen tsetsee; Gerson, Kohat, nye Merari: na Levi no nkwaber mu mfe yɛ mfe ɔha eduasa esuon. 17Gerson ne mbabanyin nye Libni na Simei, dɛ mbrɛ hɔn ebusuafo tsetsee. 18Kohat ne mbabanyin; Amram, nye Izhar, Hebron, Uziel: na Kohat no nkwamber mu mfe yɛ mfe ɔha eduasa ebiasa. 19Merari ne mbabanyin nye Mahili nye Musi. Iyinom nye Levifo ebusuafo dɛ mbrɛ hɔn ebusuasantsen tsetsee. 20Na Amram faa n’egya akyerɛbaa Jokebed waar no; na ɔnye no woo Aaron nye Moses: na Amram no nkwaber mu mfe yɛ mfe ɔha eduasa esuon. 21Izhar ne mbabanyin nye Kora, Nefeg, nye Zikri. 22Uziel ne mbabanyin nye Misael, Elzafan, nye Sitri. 23Na Aaron faa Eliseba, Aminadab ne babaa no, Nahson n’akyerɛbaa no waar no; na ɔnye no woo Nadab, Abihu, Eleazar nye Itamar. 24Na Kora ne mbabanyin nye Assir, Elkana, na Abiasaf; iyinom nye Korafo ebusuafo. 25Na Aaron ne babanyin Eleazar faa Putiel ne mbabaa mu baako waar no; na ɔnye no woo Finehas. Iyinom nye Levifo egyanom efi mu etsitsir dɛ mbrɛ hɔn ebusuafo tsetsee. 26Iyinom nye Aaron nye Moses no a EWURADZE see hɔn dɛ, wonnyi Israelmba mfi Egypt asaase do dɛ mbrɛ hɔn dɔm tsetsee no. 27Moses na Aaron nye hɔn a wɔkasaa kyerɛɛ Egypthen Farao dɛ wobeyi Israelmba efi Egypt akɔ no.

EWURADZE N’asɛm Ba Moses Nye Aaron Hɔ

28Na ɔbaa dɛ da no a EWURADZE kasaa kyerɛɛ Moses wɔ Egypt asaase do no, 29EWURADZE kaa kyerɛɛ Moses dɛ, Emi nye EWURADZE: ka dza meka kyerɛ wo nyinara kyerɛ Egypthen Farao. 30Na Moses kae wɔ EWURADZE enyim dɛ, Hwɛ, emi wonntwaa m’anofamfa twatsia, na Farao bɛyɛ dɛn etsie me?

Currently Selected:

Eksodɔs 6: MFANBRPC

Highlight

Copy