Luke 17

Fintsiduato na Bɔn

(Matthew 18.6, 7, 21, 22; Mark 9.42)

1Na ɔkaa kyerɛɛ n’esuafo no dɛ, Ɔyɛ dɛn ara a fintsidua bɛba: na nyia ɔnam no do bɛba no ndue! 2Oye ma no dɛ wɔdze ewuyambo sɛn no kɔn mu, na wɔdze no kɔto po mu, kyɛn dɛ ɔbɔto nkakraba yi mu baako fintsidua. 3#Mat 18.15 Hom nhwɛ homho yie: sɛ wo nua fom wo a, ka n’enyim; na sɛ onu noho a, fa kyɛ no. 4Na sɛ ɔfom wo mpɛn esuon da kor, na sɛ ɔsan ba wo hɔ mpɛn esuon da kor se dɛ, Menu moho a, fa kyɛ no.

Gyedzi Ho Asɛm

5Na asomafo no see Ewuradze dɛ, To hɛn gyedzi mu. 6Na Ewuradze see dɛ, Sɛ hom wɔ gyedzi a ɔtse dɛ sinape abafua a ne kɛse tse dɛ wusa aba a, #17.6 SINAPE: Iyi yɛ Griik kasa a ogyina hɔ ma Mustard. Ɔyɛ aba ketseketse bi naaso onyin yɛ dua kɛsenara. nkyɛ hom bɛse ankye dua yi dɛ, Wo ndwow ase ntutu, na kɛtsɛw po mu, na nkyɛ obetsie hom.

Akowaa N’asɛdze

7 Na hom mu woana na ɔwɔ akowaa a ofuntum daadze, anaa ɔhwɛ nguantsen, na sɛ ofi hamu ba fie a, ɔbɛse no dɛ, Bra ntsɛm bɛtsena edzidzi; 8na mbom ɔrennse no dɛ, Siesie dza mibedzi na bɔ woho do bɔsom me, na mindzidzi na monnom ana, na ekyirii wo so edzidzi na anom? 9Ana ɔbɛda akowaa no ase dɛ ɔayɛ dza wɔhyɛɛ no no? 10Dɛmara na hom so sɛ hom wie dza wɔahyɛ hom nyina yɛ a, hom nse dɛ, Yɛyɛ nkowaa a mfaso nnyi hɛn ho: yɛayɛ dza ɔsɛ dɛ yɛyɛ.

Jesus Saan Akwatafo Du ho

11Na ɔbaa dɛ ɔrokɔ Jerusalɛm no, okotwaa mu wɔ Samaria nye Galilii ntoaado. 12Na ɔrekɛhɛn kurow bi mu no, mbarimba du a wɔyɛ akwatafo hyiaa no a wogyinagyinaa ekyir; 13na wɔmaa hɔn ndze do see dɛ, Yewura Jesus, hu hɛn mbɔbɔr. 14#Lev 14.1-32 Na ohun hɔn no, ɔsee hɔn dɛ, Hom nkɔ mfa hom ho nkɛkyerɛ asɔfo no. Na ɔbaa dɛ wɔrokɔ no, hɔn ho sanee. 15Na hɔn mu baako hun dɛ no ho asan no, ɔsaan n’ekyir dze ndze kɛse hyɛɛ Nyankopɔn enyimnyam, 16na ɔdze n’enyim butuuw famu wɔ n’ananadze daa no ase: nna ɔno yɛ Samarianyi. 17Na Jesus bisaa dɛ, Ana nnyɛ du na hɔn ho sanee? Na baakron no dze wɔwɔ hen? 18Woennhu obiara a ɔsanee dze enyimnyam brɛɛ Nyankopɔn, dɛ ɔhɔho yi nko? 19Na ɔsee no dɛ, Soɛr kɔ: wo gyedzi agye wo.

Nyankopɔn N’ahendzi no ne Mbae

20Na Farisiifo no bisaa no dɛ aber bɛn na Nyankopɔn ahenman no bɛba no, obuaa hɔn dɛ, Nyankopɔn ahenman no mmba dɛ enyi tuae, 21na eso wɔrennse dɛ, Hwɛ ha, anaa, Hwɛ hɔ: na hwɛ, Nyankopɔn ahenman no wɔ hom mu.

22Na ɔsee n’esuafo no dɛ, Nda bi bɛba a hom bɛpɛ nyimpa Ba ne nda no mu kor ahwɛ, na hom nnkohu. 23Na wɔbɛka kyerɛ hom dɛ, Hwɛ ha, anaa, Hwɛ hɔ no a, mma hom nnkɔ, eso mma hom nndzi hɔn ekyir. 24Na dɛ mbrɛ enyinam tsew nyinam fi sor hyerɛn kɔ ase beebi no, dɛmara na nyimpa Ba no bɛyɛ wɔ ne da no mu. 25Na otwar dɛ obohu amandze pii, na ɔsantsen yi apow no ana. 26Na dɛ mbrɛ ɔyɛe wɔ Noa nda no mu no, mbrɛ ɔbɛyɛ wɔ nyimpa Ba no ne nda mu ara nye no. 27Na wodzidzii, wɔnomee, wɔwaree, wɔmaa awar dze kodur da a Noa kɔr hɛn adaka no mu, na nsuyirii no bae bɛsɛɛ hɔn nyina. 28Dɛmara na ɔyɛe wɔ Lot nda no mu: wodzidzii, wɔnomee, wɔtɔe, wɔtɔnee, woduae, wɔtowee; 29na da ara a Lot fiir Sodom firii no, nna ogya nye sɔɔfee fi sor tɔree bɛsɛɛ hɔn nyina; 30dɛmara so na ɔbɛyɛ wɔ da a wobeyi nyimpa Ba no edzi no. 31#Mat 24.17, 18; Mar 13.15, 16 Da no, nyia ɔwɔ dan etsifi na n’adze wɔ dan mu no, mma onnsian mmbɛfa; na nyia ɔwɔ haban mu no so, mma ɔnnsan n’ekyir. 32#Gye 19.26 Hom nkaa Lot ne yer no. 33#Mat 10.39; 16.25; Mar 8.35; Luk 9.24; Joh 12.25 Obiara a ɔbɔhwehwɛ dɛ ɔgye no nkwa ayɛ nedze no, ɔbɛyew no; na obiara a ɔbɛyew no nkwa no, ɔbɛgye no. 34Mese hom dɛ, Anadwe no mbarimba beenu bɛda mpa kor do, na wɔbɛfa baako na woegya baako. 35Mbaa beenu bɔbɔ mu ayam ewu, na wɔbɛfa baako na woegya baako. 36[Mbarimba beenu bɔwɔ haban mu, wɔbɛfa baako na woegya baako.]#17.36 Akyerɛwfo no binom mmfa nkyekyɛmu 36 no mmba hɔn dze mu. 37Na wobuaa no dɛ, Hen a, Ewuradze? Na ɔsee hɔn dɛ, Mbrɛ fun wɔ no, hɔ na mpɛtɛ bɔboaboa hɔn ano.

Currently Selected:

Luke 17: MFANBRP

Highlight

Copy