John 7
7
Jesus Nye no Nuanom
1Iyi ekyir no, Jesus kekyinkyiin Galilii, nna ɔmmpɛ dɛ okekyinkyin Judea, osiandɛ Jewfo no rohwehwɛ no eku no. 2#Lev 23.34; Deut 16.13 Nna Jewfo no asesebɔ afahyɛ no abɛn. 3Na no nuanom no see no dɛ, Fi ha kɔ Judea ama w’esuafo no so aahwɛ wo ndwuma a ereyɛ yi. 4Na obi nnyɛ biribi wɔ nsumaa mu, na ɔnnhwehwɛ dɛ nankasa dze, wobohu no bagua mu. Sɛ eyɛ yinom a, yi woho kyerɛ wiadze. 5(Na no nuanom mpo anngye no enndzi.) 6Jesus see hɔn dɛ, Emi dze, me ber nnyae nndurii, na hom dze, hom mber wɔ hɔ daa. 7Wiadze nntum nntan hom, na emi dze, ɔtan me, osiandɛ megye no ho dase dɛ no ndwuma muo. 8Hom nkɔ afahyɛ no ase; emi dze, minnyae nnkɔr afahyɛ yi ase, osiandɛ me ber nnyae nndurii. 9Na ɔsee hɔn dɛm no ɔtsenaa Galilii.
Jesus wɔ Asesebɔ Afahyɛ no ase
10Na no nuanom kɔree no ekyir no, no so kɔr afahyɛ no ase, nnyɛ guado, na mbom wɔ nsumaa mu. 11Na Jewfo no hwehwɛɛ no afahyɛ no ase, na wɔsee dɛ, Ɔwɔ hen? 12Na huhuhuhu pii baa nyimpadodow no mu wɔ no ho: binom se, Ɔyɛ nyimpa pa; binom se, Dabi, na ɔdaadaa nkorɔfo no. 13Naaso, Jewfo no ho hu ntsi, obi anngye enyim annka no ho asɛm.
14Na odur afahyɛ no finimfin no, Jesus kɔr asɔrfi no mu kɛkyerɛkyerɛe. 15Na ɔyɛɛ Jewfo no nwanwa na wɔsee dɛ, Ɔyɛ dɛn na onnsuaa nwoma, naaso onyim yi? 16Na Jesus buaa hɔn dɛ, Me nkyerɛkyerɛ nnyɛ medze, na nyia ɔsomaa me no dze a. 17Sɛ obi pɛ dɛ ɔyɛ ne pɛ a, obohu nkyerɛkyerɛ no dɛ ofi Nyankopɔn anaadɛ ofi mankasa me tsirmu na meka. 18Nyia ɔbɔ nankasa ne tsirmu kasa no hwehwɛ nankasa n’enyimnyam; na nyia ɔhwehwɛ nyia ɔsomaa no no n’enyimnyam no, ɔno na ɔyɛ nokwafo, na dza ɔnntsen nnyi no mu. 19Ana nnyɛ Moses na ɔmaa hom mbra no? Naaso hom mu obiara nndzi mbra no do. Ɔyɛ dɛn na hom rohwehwɛ me eku me yi? 20Nyimpadodow no buaa dɛ, Ewɔ abɔnsam: woana na ɔrohwehwɛ wo eku wo? 21Jesus buaa hɔn dɛ, Edwuma kor pɛ na meyɛe na ɔyɛ hom nyina nwanwa yi. 22#Lev 12.3; Gye 17.10 Dɛm ntsi na Moses ama hom twatsiatwa (nnyɛ dɛ ofi Moses, na ofi egyanom no) naaso ahomgyeda hom twa nyimpa twatsia. 23#Joh 5.9 Sɛ nyimpa nya twatsiatwa ahomgyeda ama wɔaannto Moses mbra a, hom bo efuw me dɛ mama nyimpa no ho nyina ayɛ no dzen ahomgyeda anaa? 24Mma hom mmbu atsɛn dɛ mbrɛ hom hu no enyiwa do, mbom hom mbu atsɛn tsenenee.
Ana Mesaia no Nye Oyi a
25Na Jerusalɛmfo no mu binom see dɛ, Ana nnyɛ oyi nye nyia wɔrohwehwɛ no eku no no? 26Na hwɛ, ɔrekasa pefee naaso wɔnnse no hwee. Gyama mpanyimfo no ehu ampa dɛ oyi nye Kraest no anaa? 27Naaso, oyi dze, yenyim mbrɛ ofi, na Kraest no dze, sɛ ɔba a, obi runnhu mbrɛ ofi. 28Na Jesus rekyerɛkyerɛ wɔ asɔrfi no mu no, ɔtseaa mu na ɔsee dɛ, Hom nyim me, na eso hom nnyim mbrɛ mifi; na mankasa mannhyɛ moho mebae, na nyia ɔsomaa me no nye nokwafo a hom nnyim no. 29Emi dze, minyim no, osiandɛ mifi no hɔ, na ɔno na ɔsomaa me. 30Na wɔhwehwɛɛ dɛ wɔkyer no, naaso obi ammfa ne nsa ennsuo no mu, osiandɛ no dɔn nnyae nndurii. 31Na nyimpadodow no mu pii gyee no dzii na wɔsee dɛ, Ana Kraest no, sɛ ɔba a, ɔbɛyɛ nsɛnkyerɛdze pii akyɛn dza oyi ayɛ yi?
Wɔsoma dɛ Wɔnkɛkyer Jesus
32Farisiifo no tsee dɛ nyimpadodow no ruhwinhwin dɛm wɔ no ho, na asɔfompanyin no nye Farisiifo no somaa asomfo dɛ wɔnkɛkyer no. 33Na Jesus see dɛ, Aber kakrabaabi na mowɔ hom nkyɛn, na morokɔ nyia ɔsomaa me no nkyɛn. 34Hom bɔhwehwɛ me na hom nnkohu me, na mbrɛ mowɔ no hom runntum hɔ ba. 35Na Jewfo no kaa kyerɛɛ hɔnho dɛ, Hen na ɔrobɔkɔ na yennkohu no? Ɔbɔkɔ hɔn a wɔapetse Griikfo mu no mu akɛkyerɛkyerɛ Griikfo no anaa? 36Asɛm bɛn na ɔreka yi dɛ, Hom bɔhwehwɛ me na hom nnkohu me, na mbrɛ mowɔ hom runntum hɔ ba yi?
Nkwa Esutsen
37 #
Lev 23.36
Na da a odzi ekyir no a ɔyɛ afahyɛ no ne dapɔn no Jesus gyinae tseaa mu dɛ, Sɛ nsukɔm dze obi a, wɔmma ɔmbra me nkyɛn mbɔnom. 38#Eze 47.1; Zek 14.8 Nyia ɔgye me dzi no, dɛ mbrɛ kyerɛwsɛm no aka no, nkwa esutsen befi ne yamu apem. 39Na iyi dze, ɔkae wɔ Sunsum a hɔn a wɔgyee no dzii no woribenya no ho, nna Sunsum no nnyae mmbae, osiandɛ wonnyae nnhyɛɛ Jesus enyimnyam. 40Ntsi nyimpadodow no mu binom tsee nsɛm yi no, wɔkaa dɛ, Nkɔnhyɛnyi no nye yi ampa. 41Binom kaa dɛ, Kraest no nye yi; na binom so kaa dɛ, Ana Kraest no befi Galilii aba? 42#2 Sam 7.12; Mika 5.2 Ana kyerɛwsɛm no annka dɛ, David asefo mu, nye Bɛtlɛhɛm kurow a David tsenaa mu no mu, na Kraest no befi aba? 43Na mpaapaamu baa nyimpadodow no mu, 44na hɔn mu binom pɛɛ dɛ wɔkyer no, naaso obiara ammfa ne nsa ennsuo no mu.
Jewfo Etumdzifo no Anngye no Enndzi
45Na asomfo no baa asɔfompanyin no nye Farisiifo no nkyɛn, na wobisaa hɔn dɛ, Ebɛnadze ntsi na hom ammfa no ammba? 46Asomfo no buaa dɛ, Nyimpa bi nnkasaa dɛm da, dɛ dɛm nyimpa yi. 47Na Farisiifo no buaa hɔn dɛ, Ana hom so wɔadaadaa hom? 48Ana mpanyimfo anaadɛ Farisiifo bi gyee no dzii? 49Na nyimpadodow a wonnyim mbra no, wɔapaa hɔn. 50#Joh 3.1, 2 Nikodemɔs a nkan no ɔbaa ne nkyɛn a ɔyɛ hɔn mu baako no kaa kyerɛɛ hɔn dɛ, 51Ana hɛn mbra so nndzii kan nntsiee nyimpa, na onnhun dza ɔayɛ a, obu no atsɛn? 52Wobuaa no dɛ, Ana wo so ifi Galilii? Hwehwɛ mu hwɛ, na hu dɛ nkɔnhyɛnyi mmpuei wɔ Galilii mu da.
53[Na hɔn nyina kokɔr hɔn efiefi.
Currently Selected:
John 7: MFANBRP
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
