John 11

Lazarus no Wu

1 # Luk 10.38, 39 Nna ɔyarfo bi wɔ hɔ a wɔfrɛ no Lazarus a ofi Bɛtani, Mary nye no nuabaa Martha hɔn kurow mu. 2#Joh 12.3 Mary a ɔdze ngohuam seraa Ewuradze na ɔdze ne tsinhwi pepaa n’anan ho no na no nuabanyin Lazarus yaree no. 3Dɛm ntsi ne nkyerɛbaa no somae baa Jesus hɔ bɛsee no dɛ, Ewuradze, hwɛ, nyia edɔ no no yar. 4Na Jesus tsee no ɔsee dɛ, Yarba yi nnyɛ wuyarba, na Nyankopɔn enyimnyam ntsi a, ama wɔnam do aahyɛ Nyankopɔn Ba no enyimnyam. 5Nna Jesus dɔ Martha nye no nuabaa nye Lazarus, 6naaso ber a ɔtsee dɛ ɔyar no ɔtsenaa mbrɛ ɔwɔ no ara ndaenu. 7Nna n’ekyir no, ɔsee n’esuafo no dɛ, Hom mma yɛnkɔ Judea bio. 8Esuafo no see no dɛ, Rabae, ɔnnkyɛree biara na Jewfo no hwehwɛɛ wo dɛ wobesiw wo abo, na erokɔ hɔ bio yi? 9Jesus buaa dɛ, Ana nnyɛ ndɔnhwer duebien na ɔwɔ adzekyee mu? Sɛ obi nam ewia a, ommfintsiw, osiandɛ ohu wiadze yi kan no. 10Na sɛ obi nam anadwe a, ofintsiw, osiandɛ kan nnyi no mu. 11Ɔkaa yinom ekyir no, ɔsee hɔn dɛ, Hɛn nyɛnko Lazarus ada, na morokɔ mekenyan no. 12Na esuafo no see no dɛ, Ewuradze, sɛ ɔada dze a, nna obenya nkwa. 13Na Jesus dze, ɔkaa no wɔ no wu ho, na hɔn dze, wosusuu dɛ eregye w’ahom wɔ nda mu ho asɛm na ɔreka. 14Nna Jesus kaa kyerɛɛ hɔn pefee dɛ, Lazarus ewu; 15na ɔyɛ me dɛw wɔ hom ntsi dɛ minnyi hɔ, ama hom aagye edzi: naaso hom mma yɛnkɔ ne nkyɛn. 16Na Tomas a wɔfrɛ no Ata no see ne mfɛfo esuafo no dɛ, Hom mma hɛn so yɛnye no nkɔ na yɛnye no eewu.

Jesus, Wunyan nye Nkwa no

17Na Jesus bae no obohun dɛ Lazarus edzi ndaanan wɔ nda no mu dada. 18Eso nna Bɛtani bɛn Jerusalɛm ho bɛyɛ akwansin ebien.#11.18 Griik ka dɛ akwansimba duenum. 19Nna Jewfo pii aba Martha nye Mary nkyɛn dɛ wɔrebɛma hɔn hyɛ dzen wɔ hɔn nua no ntsi. 20Martha tsee dɛ Jesus reba no, ɔkɔree kehyiaa no; na Mary dze, ɔkɔr do araa tsenaa fie hɔ. 21Na Martha see Jesus dɛ, Ewuradze, sɛ ewɔ ha a, nkyɛ mo nuabanyin ennwu. 22Na seseiara mpo, minyim dɛ biribiara a ibebisa Nyankopɔn no, Nyankopɔn dze bɛma wo. 23Jesus see no dɛ, Wo nuabanyin bɔsoɛr bio. 24Martha see no dɛ, Minyim dɛ da a odzi ekyir wunyan no mu, ɔbɔsoɛr. 25Jesus see no dɛ, Emi nye wunyan no nye nkwa no: nyia ɔgye me dzi no, owu mpo a, ɔbɛtsena ase, 26na obiara a ɔtse ase na ɔgye me dzi no, onnkowu da. Ana egye iyi dzi? 27Ɔsee no dɛ, Nyew, Ewuradze, magye edzi dɛ ɔwo nye Kraest no, Nyankopɔn Ba no a ɔreba wiadze no. 28Na ɔkaa dɛm no, osii mu kɔree kɛfrɛɛ no nuabaa Mary nsumaa mu dɛ, Kyerɛkyerɛfo no aba, na ɔfrɛ wo. 29Na ɔno so tsee no, ɔsoɛɛr ntsɛmara na ɔbaa ne nkyɛn. 30Nna Jesus nnyae mmbaa kurow no mu, na ɔwɔ mbrɛ Martha kehyiaa no hɔ no. 31Na Jewfo a wɔnye no wɔ fie rekyekye no werɛ no hun Mary dɛ ɔasoɛr ntsɛm epue no, wodzii n’ekyir, nna wosusu dɛ ɔrokɔ nda no do ekosu wɔ hɔ. 32Na Mary dze, odur mbrɛ Jesus wɔ no, na ohun no no, ɔhwee n’ananadze see dɛ, Ewuradze, sɛ ewɔ ha a, nkyɛ mo nuabanyin ennwu. 33Na Jesus hun dɛ orusu na Jewfo a wɔnye no bae no so rusu no, osii nkrum wɔ no sunsum mu na ɔyɛɛ no awerɛhow, 34na ɔsee dɛ, Hom dze no ato hen? Wɔsee no dɛ, Ewuradze, bra bɔhwɛ. 35Na Jesus sui. 36Nna Jewfo no see dɛ, Hwɛ mbrɛ osi dɔ no. 37Na hɔn mu binom see dɛ, Oyi a obuee onyifuranyi no enyiwa no, oenntum amma dɛ nkyɛ oyi so orunnwu anaa? 38Na Jesus sii nkrum wɔ no mu bio, na ɔbaa nda no do: ɔbodan a, nna ɔbo hin ano. 39Jesus see dɛ, Hom nyi ɔbo no. Nyia owui no nuabaa Martha see no dɛ, Ewuradze, sesei dze ɔasɛɛ, na oedzi ndaanan. 40Jesus see no dɛ, Ana mannse wo dɛ, sɛ egye dzi a, ibohu Nyankopɔn enyimnyam? 41Na woyii ɔbo no. Na Jesus maa n’enyiwa do na ɔsee dɛ, Egya, meda wo ase dɛ itsie me: 42na emi dze, minyim dada dɛ itsie me daa, na nyimpadodow a wogyinagyina ho yi ntsi na mesee dɛm, ama wɔaagye edzi dɛ ɔwo na esomaa me. 43Na ɔkaa dɛm no, ɔdze ndze kɛse tseaa mu dɛ, Lazarus, pue bra! 44Nyia owui no puei bae: nna nda mu atam kyekyer ne nan nye ne nsa, na duukuu kyekyer n’enyim: na Jesus see hɔn dɛ, Hom nsan no, na hom mma ɔnkɔ.

Wɔfa Jesus ho Apam

(Matthew 26.1-5; Mark 14.1, 2; Luke 22.1, 2)

45Na Jewfo no mu pii a wɔbaa Mary nkyɛn na wohun dza Jesus yɛe no, wɔgyee no dzii; 46na hɔn mu binom sii mu kɔr Farisiifo nkyɛn kɛkaa dza Jesus yɛe no kyerɛɛ hɔn.

47Na asɔfompanyin nye kyerɛwfo no maa wokehyiaa baguafo no, na wɔsee dɛ, Yɛreyɛ dɛn, na nyimpa yi reyɛ nsɛnkyerɛdze pii yi? 48Sɛ yegyaa no dɛm a, nyimpa nyina bɛgye no edzi, na Romefo afa hɛn bea nye hɛn man yi. 49Na hɔn mu baako bi, Kaiafas a odzi afe noara mu sɔfopanyin, see hɔn dɛ, Hom nnyim hwee, 50na eso hom nndwen dɛ oye ma hɛn dɛ nyimpa kor bowu ama ɔman no, na ɔman no nyina aannhyew a. 51Na iyi, nnyɛ nankasa na ɔkae, na odzi afe noara mu sɔfopanyin ntsi, ɔhyɛɛ nkɔm dɛ Jesus rubowu ama ɔman no, 52na nnyɛ ɔman no nko ntsi, na dɛ ɔrebɛka Nyankopɔn mba a wɔapetse nyina so abɔ mu ayɛ kor. 53Na ofitsi da no ara wɔfaa apam dɛ woboku no.

54Dɛm ntsi Jesus annantsew petee wɔ Jewfo no mu bio; na ofii hɔ kɔr asaase a ɔbɛn sar no ho no do, wɔ kurow a wɔfrɛ no Efraim mu, na ɔnye n’esuafo kɛtsenaa hɔ. 55Na Jewfo apaho no abɛn, na dodowara fiir asaase no do kɔr Jerusalɛm ansaana apaho no edu dɛ worukoguar hɔnho. 56Na wɔhwehwɛɛ Jesus, na wogyinaa asɔrfi no mu sesee hɔnho dɛ, Hom dwen dɛn? Ɔremmba afahyɛ yi ase anaa? 57Nna asɔfompanyin no nye Farisiifo no ahyɛ mbra dɛ, obi nyim mbrɛ ɔwɔ a, ɔnkɛkyerɛ ma wɔnkyer no.

Currently Selected:

John 11: MFANBRP

Highlight

Copy