Gyenesis 27

Jakob Wia Esau Ne Nhyira

1Na ɔbaa dɛ aber a Isaak yɛɛ akɔdaa, na n’enyi do yɛɛ no kusukusu, na onnhu adze yie no, ɔsomaa frɛɛ ne ba panyin Esau, na ɔsee no dɛ, Me ba: na ɔgyee no do dɛ, Egya Emi nye yi. 2Na ɔsee dɛ, Afei hwɛ, mayɛ akɔdaa, minnyim mo wu da. 3Dɛm ntsi afei, meserɛ wo, fa w’ahayɛdze, w’egyen kotoku nye w’egyen, na kɔ hamu kɛfa hanam brɛ me; 4na yɛ me edziban a ɔyɛ huam, dɛ mbrɛ mepɛ, na fa brɛ me, ma mindzi; na me kra nhyira wo ana mewu. 5Na aber a Isaak rekasa kyerɛ ne ba Esau no, Rebeka tsee. Na Esau kɔr hamu dɛ orukoku abowa, na ɔdze aba no. 6Rebeka kaa kyerɛɛ ne ba Jakob dɛ, Hwɛ, metsee dɛ w’egya reka kyerɛ wo nua Esau dɛ, 7Kɛfa hanam brɛ me, na yɛ me edziban a ɔyɛ huam, ma mindzi, na minhyira wo wɔ EWURADZE enyim ansaana mewu. 8Dɛm ntsi afei, me ba, tsie me ndze dɛ mbrɛ merehyɛ wo yi ara. 9Kɔ mpɔnkyebuw no mu, na kɛkyer mpɔnkyemba a woye ebien wɔ hɔ brɛ me: na medze bɛyɛ edziban a ɔyɛ huam ama w’egya, dɛ mbrɛ ɔpɛ: 10na edze akɛma no, ama oedzi, na oeehyira wo ansaana oewu. 11Na Jakob see ne na Rebeka dɛ, Hwɛ, mo nua Esau no ho wɔ nhwi, na emi mo ho yɛ monomonom. 12Bi a m’egya bɛkeka mo ho ahwɛ, na mebɛyɛ n’enyi do dɛ ɔdaadaafo; na medze mpaa mebɛba mo do, na nnyɛ nhyira a. 13Na ne na see no dɛ, Wo mpaama mbra mo do, me ba: ɔwo tsie me ndze ara, na kɔ kɛfa hɔn brɛ me. 14Na ɔkɔree kɛfae, na ɔdze brɛɛ ne na: na ne na ɔdze yɛɛ edziban a ɔyɛ huam, dɛ mbrɛ n’egya pɛ. 15Na Rebeka faa ne ba panyin Esau ne ntar fɛɛfɛw a ɔwɔ ne nkyɛn wɔ fie no bi na ɔdze hyɛɛ ne ba kuma Jakob: 16na ɔdze mpɔnkyemba no hɔn nwoma duraduraa ne nsa ho nye no kɔn monomonom no ho: 17na ɔdze edziban a ɔyɛ huam no nye boodoo a woesiesie no dze hyɛɛ ne ba Jakob nsa. 18Na ɔbaa n’egya hɔ, na ɔfrɛɛ no dɛ, M’egya: na ɔsee dɛ, Emi nye yi. Woana nye wo, me ba? 19Na Jakob see n’egya dɛ, Emi nye w’abakan Esau; mayɛ dɛ mbrɛ ekyerɛɛ me no: soɛr meserɛ wo, tsena hɔ na dzi me hanam yi bi, ama wo kra eehyira me. 20Na Isaak bisaa ne ba no dɛ, ɔyɛ dɛn ma wo nsa kaa no ntsɛm dɛm, me ba? Na obuaa dɛ, Osiandɛ EWURADZE wo Nyankopɔn maa mihyiaa yie. 21Na Isaak see Jakob dɛ, Pin ha, meserɛ wo, ma menkeka wo monhwɛ, me ba, kyerɛ dɛ me ba Esau noara nye wo anaa. 22Na Jakob piin n’egya Isaak nkyɛn; na ɔkekaa no ho hwɛe, na ɔsee dɛ, Ndze no yɛ Jakob ne ndze, na nsa no na ɔyɛ Esau ne nsa. 23Na oennhu no, osiandɛ ne nsa ho wɔ nhwi, dɛ mbrɛ no nua Esau ne nsa ho tse: nna ohyiraa no. 24Na obisaa dɛ, Ana ɔwo nye me ba Esau ara? Na ɔsee dɛ, Emi nye no. 25Na ɔsee dɛ, Fa pin me nkyɛn, ma mindzi me ba ne hanam yi bi, ma me kra nhyira wo. Na ɔdze piin ne nkyɛn, ma odzii: na ɔdze nsa brɛɛ no, ma ɔnomee. 26Na n’egya Isaak see no dɛ, Afei pin ha, na bɛfew m’ano, me ba. 27#Heb 11.20 Na ɔtwee pinii feew n’ano: na Isaak ohuaa n’atar no huam, na ohyiraa no, na ɔsee dɛ,

Hwɛ, me ba ho hua

Tse dɛ haban a EWURADZE ehyira do no mu hua:

28Na Nyankopɔn mma wo sor bɔsu bi,

Nye asaase ne seradze bi,

Nye eburow nye nsa pii:

29 # Gye 12.3 Aman nsom wo,

Na amanaman nkotow wo:

Yɛ wo nuanom do wura,

Na wo na mba nkotow wo:

Ndom nka hɔn a wɔdom wo nyinara,

Na nhyira nka hɔn a wohyira wo nyinara.

Esau Bisa Nhyira

30Na ɔbaa dɛ, Isaak wiee Jakob nhyira no, na Jakob fii n’egya nkyɛn firii ara pɛ nna no nua Esau fi n’ahayɛ baa fie. 31Na ɔno so yɛɛ edziban a ɔyɛ huam, na ɔdze brɛɛ n’egya; na ɔsee n’egya dɛ, Wɔmma m’egya nsoɛr, na ondzi ne ba ne hanam yi bi, ma ne kra nhyira me 32Na n’egya Isaak bisaa no dɛ, Woana nye wo? Na ɔsee no dɛ, Mara wo ba, w’abakan Esau a. 33Na Isaak no ho popoo kɛsenara, na ɔsee dɛ, Woana mbɔ na ɔakɛfa hanam, na ɔdze abrɛ me, ma medzi ne nyinara bi ansaana ereba, na mehyira no yi? Ampa, mehyiraa no. 34Aber a Esau tsee n’egya ne nsɛm no, osuu su kɛse a ɔyɛ wen, na ɔsee n’egya dɛ, Hyira mo so, mo so bi, ao m’egya. 35Na ɔsee dɛ, Wo nua dze ndaadaa aba abɛgye wo nhyira kɔ. 36#Gye 25.29-34 Na Esau see dɛ, Ana ɔno wɔmmfrɛ no Jakob bi? Iyi ka ho a oedzi me emim mpɛn ebien: ɔagye me panyin; na, hwɛ, afei ɔagye me nhyira. Na obisaa dɛ, Ana enngyaa me nhyira biara? 37Na Isaak buae na ɔsee Esau dɛ. Hwɛ mayɛ no wo wura, na medze no nuanom nyinara mayɛ no nkowaa; na eburow nye nsa nna medze awowaw no: na ɔwo dze, ebɛnadze na menyɛ mma wo, me ba? 38#Heb 12.17 Na Esau bisaa n’egya dɛ, Aso nhyira kor pɛ na ewɔ, m’egya? Hyira mo so, mo so bi, ao m’egya. Na Esau maa ne ndze do na osui. 39#Heb 11.20 Na n’egya Isaak buae na ɔsee no dɛ,

Hwɛ, mbrɛ asaase a seradze nnyi no na ɔbɛyɛ wo tsenabea,

Na mbrɛ ɔsor ɔbɔsu yɛ hɔ na;

40 # Gye 36.8; 2 Ahe 8.20 Na edze w’afona bɛtsena ase, na ebɔsom wo nua;

Na ɔbɛba dɛ sɛ egye woho a,

ɔno ibeyi no kɔndua wɔ wo kɔn ho.

41Na Esau taan Jakob wɔ nhyira a n’egya dze hyiraa no ntsi: na Esau see n’akoma mu dɛ, Nda a wɔdze bosu m’egya no abɛn; afei muruboku mo nua Jakob. 42Na ne ba panyin Esua ne nsɛm no wɔkɛkaa kyerɛɛ Rebeka; na ɔsomae ma wɔkɛfrɛɛ ne ba kuma Jakob, na ɔsee no dɛ, Hwɛ, wo nua Esau kyekye no werɛ wɔ wo ho dɛ oruboku wo. 43Dɛm ntsi afei, me ba, tsie me ndze; na soɛr, guan kɔ mo nua Laban nkyɛn wɔ Haran; 44na kɛtsena ne nkyɛn nda kakra, kɛpem dɛ wo nua n’ebufuw befi no mu; 45na no werɛ befir dza edze ayɛ no no; na mobɔsoma ma wɔaabɛfa wo wɔ hɔ aba: bɛyɛ dɛn ntsi na mobɔhwer hom beenu nyina da kor?

46Na Rebeka see Isaak dɛ, Mo nkwa afon me, osian Het mbabaa ntsi: sɛ Jakob war yer wɔ Het mbabaa mu, dɛ woyinom a, wɔ asaase yi do mbabaa yi mu a, nna membrɛe ngui bi? Nna metse ase reyɛ dɛn?

Currently Selected:

Gyenesis 27: MFANBRP

Highlight

Copy