Gyenesis 12
12
Nyankopɔn Frɛ Abram
1 #
Ndwu 7.2, 3; Heb 11.8 Afei EWURADZE see Abram dɛ, Fi wo man mu, na fi w’ebusua mu, na fi w’egya fie, kɔ asaase a mebɛkyerɛ wo no do: 2na mebɛyɛ wo ɔman kɛse, na mibehyira wo, na mama wo dzin ayɛ kɛse: na ayɛ nhyira: 3#Gal 3.8 na mibehyira hɔn a wohyira wo, na nyia ɔdom wo no mobɔdom no: na wo mu na wobehyira asaase ebusua ebusua nyinara. 4Nna Abram kɔr dɛ mbrɛ EWURADZE kasaa kyerɛɛ no no: na Lot nye no kɔree: na Abram fii Haran no nna oedzi mfe eduosuon enum. 5Na Abram faa ne yer Sarai, nye no nua ba Lot, na hɔn ahodze a wonyaa nyinara, na nyimpa a wonyaa no wɔ Haran no nyinara; na wosii mu dɛ wɔrokɔ Keenan asaase do; na Keenan asaase do na wɔbae. 6Na Abram twaa mu wɔ asaase no do kɔr beebi a wɔfrɛ hɔ Sekem, kɔr More esudur no ho. Na aber no nna Keenanfo wɔ asaase no do. 7#Ndwu 7.5; Gal 3.16 Na EWURADZE yii noho kyerɛɛ Abram, na ɔsee dɛ, W’asefo na medze asaase yi bɛma hɔn: na hɔ na Abram sii afɔrmbukyia maa EWURADZE a oyii noho kyerɛɛ no no. 8Na ofii hɔ kɔr bepɔw a ɔwɔ Bɛtɛl no boka no do, na hɔ na ɔbɔɔ n’asesee, a Bɛtɛl dzi n’anee, na Ai dzi no boka: na osii afɔrmbukyia maa EWURADZE wɔ hɔ na ɔsɔɔr EWURADZE dzin. 9Na Abram tuu kwan, dɛ ɔda ho ara rokɔ Pomu afamu.
Abram Wɔ Egypt
10Na ɔkɔm baa asaase no do: na Abram kɔr Egypt kɛtsenaa hɔ ahɔhotsena; osiandɛ ɔkɔm no yɛɛ dzen wɔ asaase no do. 11Na ɔbaa dɛ aka kakra ma ɔahɛn Egypt no, ɔsee ne yer Sarai dɛ, Minyim dɛ eyɛ ɔbaa a wo ho yɛ fɛw: 12na ɔbɛba dɛ sɛ Egyptfo no hu wo a, wɔbɛse dɛ, Ne yer nye yi: na woboku emi, na wɔagye ɔwo nkwa. 13#Gye 20.2; 26.7 Meserɛ wo, se dɛ, m’akyerɛbaa nye wo: ama osian ɔwo ntsi eesi yie ama me, na osian ɔwo ntsi me kra aatsena ase. 14Na ɔbaa dɛ aber a Abram baa Egypt no, Egyptfo no hun ɔbaa no dɛ no ho yɛ fɛw papa. 15Na Farao ne mbapɔmba no hun no, na wɔbɛkamfoo no kyerɛɛ Farao: na wɔbɛfaa ɔbaa no kɔr Farao fie. 16Na ɔyɛɛ Abram yie wɔ ne ntsi: na onyaa nguan, nye anantwi, nye nsoasopɔnkɔnyin, nye nkowaa, nye mfonabaa, nye nsoasopɔnkɔber, nye efumpɔnkɔ. 17Na osian Abram yer Sarai ntsi EWURADZE dze ɔyardɔm akɛse haaw Farao nye ne fi. 18Na Farao frɛɛ Abram, na ɔsee dɛ, Ebɛnadze na edze ayɛ me yi? Ɔyɛ dɛn ntsi na annka annkyerɛ me dɛ wo yer a? 19Ɔyɛ dɛn ntsi na esee dɛ, M’akyerɛbaa a ma dɛm ntsi mefaa no nkyɛ morowar no yi? Dɛm ntsi afei, hwɛ, wo yer nye no, fa no, na kɔ wo kwan. 20Na Farao hyɛɛ nkorɔfo ma wokegyaa ɔno, nye ne yer, nye dza ɔwɔ nyinara wɔ ɔkwan do.
Currently Selected:
Gyenesis 12: MFANBRP
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
