ZEFANYA 3

O Yerusalem siyag aruhu ibag ane

1O pumbuk Yerusalem siyag aruhu! Siyag ane til noruk inap arimanowen onori siyahap eneptuk lit Allah ele ying turuk. 2Aben enele hiyag isarukmu holtuk eleg, ap ekeyen komo eneptukmu holoho embeseruk. Ninikni Allah ubam wenggel haruk lit alukema waharuk eleg. 3It onowesi arimano olomeneyen pak nul ulug hilak turukon hag toho wereg. Alem haltuk inap arimano meneyen suburu mag-mag narukon hag toho wereg. Sono nahukon ulug we tor angge oho umbat taruk eleg. 4Allah wene hiyag isarukon nabi arimanowen enele si uruk lit sibiling-sibiling ane eneg uruk. Allah ibam foroho inap imam arimanowen mun angge man angge Allahn tohon siyahap turuk. Allahn tuk teg ane fahet kong toho imbibahon fahet hiyag hisaruk lahe uruk angge famen it inindimuwen peruk ane eneg hiyag isaruk. 5Ari roho turuken Ninikni Allahn o Yerusalem embeselep angge famen it arimano sehelimu wereg lit unubam siyag ane tuk fug angge pikir ane eneg turuk. Misihim oho umbusuk fug angge likiya hupmu aben tuk teg ane fahet komo enepfahon ineyap turuk angge famen iren ininggali ha fug angge siyag ane eneg til-wil noruk.

6 Ninikni Allahn ele urukon tu, ”Anden o pumbuk suwon ekeyon-ekeyon elehap eneptuk lit elehet ineyon walinggoho ohowon halog toho siyaha feserikikteg inibam pin halog toho olunap tebesirikikmu ap enele teng urusama ap misig oho kebunggalma laruk eleg. 7Ari roho turuk latikik ane fahet nindimuwen wenggel haruk lit, ’Ketiya o Yerusalem inaben An nubahet enekol haruk lit Anden komo eneptikik ane hikit toho turuk lamuhup. Turuk lamuhup halug iren siyag ane turukon fahet Anden it inibam halog tubusuhuk perikik ane umbusuhuk,’ ulug wenggel harikik angge famen iren nin sebe roho siyag ane til-wil noruk latusa. 8Ari fahet An in aruhukteg ap o pumbuk suwon arimano unubam suwahal uhuk sambil ino horog tehen yet teg lamok ulug An Hinikni Allahn nele uruk lahi. Anden ap o pumbuk arimanowet onowesi suwonet palu enebuhukteg nolok peruk lahi ane unubam hilil isahuken kong toho emberikik. An nungge fahet enembol yig nutuk ulug nundama ahe indok ambulpul hag toho laharuken kinang atogman atogma harep pisako siyaha fusuhuk,” uruk.

Mun ane man ane fano aruhu ibag ane

9 Ninikni Allahn ele uruk lit, ”Ari obog toho teko lahumu Anden ap o pumbuk obog toho enembilik fanowap enebuhukmu tu Allah hag toho wereg ulug wel eneptukon ununuk uk fug angge An Hinikni Allah nunuk eneg uruk lit inindi misig toho An eneg wel naptuk lamuhup. 10An numalikisi pilili-palala isibagma ik fuma fil o Etiopia kinangma libahon arimanowen oho An nubahet nungge-nungge imbik waharuk lamuhup. 11O ino sambil hiren siyag ane anggolo turuk lit An nele ying naptuk latikip ane fahet hininggaliyap henebuhuk fug. Hininggaliyap henebuk fug angge Anden hit sehelimuwen ap enele hemet toho urukon arimano elehap enebuhukmu hit tom Anden tohon famen hininggareg palimuwap taruk lamuhup fug. 12We ap inine eleg lit inindi apma roho werehon o ino welamuhuben hiyag isahukmu Ninikni Allahn eneg mapmu nenesug ulug An nunuk uruk lit napma welamuhup. 13#Why 14:5An numalikisi Israel inap we tor angge onoluk welamuhubon arimanowen ap enele ying enebul ulug enele si uruk lit Anden nirim perukon turuk lamuhup fug. Wam domba hoholangge nalug kel taruk lit yinggig hag toho welamuhupmu ap misihen oho elel eneptuk laruhu fug,” uruk.

14Israel hinap nori, henehiyeg toho welamok! Yerusalem hinap, hinindiyet henebeyet henele hi roho yunggultuk lamek! 15Ninikni Allahn ap seliyon obog toho yanggal eneptuk lit alem angginon hunubam emberuk ane embeserisi. Hinikni suwon Allah hit sehelimu weregma nin fobik siyag amuhuk ulug henekol haruk lamuhup fug.

16O itano li aben enele uruk lit, ”Yerusalem hinap tom Sion fam welahebon nori, henekol ha fug! Hininggik wiyig toho welamuhup fug! 17Allah Hinikni ahako roho turuk ahun ino hit men wereg lit let heneptukmen eneg welaruhu. Indi henesug lit ele olok toho hunubam uruk laruhu fug. Hit hunubahet ahiyeg haruk lit ele hi roho yunggultuk laruhu.

18 Ninikni Allahn ele uruk lit, ”An numalikisi o winama wereg lit Allah wel turuk sambil o Yerusalem la fug teg lahe ulug inindi anggin toho werehon arimano Anden palu enebuhukteg suhuloho hondog eneplug waruhuk. Ari roho turuk lit alem angginon o Yerusalem fam werehon ino elehap tuhuk. 19O itano li Anden hit apmayap heneptuk latusa inap arimano siyahap enebuhukteg ap o kema-kema pilili-palala isibahon andog toho hondog eneplug waruhuk. Waharuk lit ap unuyug siyahon oho inibam wamuhuben let enebuhuk. Ari roho turuk lit it ininggali roho wereg ane hebeluhukmu ap o pumbuk obog tohowen it wel eneptuk lit ununuk suwap eneptuk lamuhup. 20O itano li Anden hit honori o kema-kema hik-hak isibahon arimano oho palu enebuhukteg hondog heneplug hinibam waruhuk. Hiren An yet nasugmu hit siyag toho welahep ane hebeluhuk. Hebeluhukmu ap o pumbuk kinang atogman atogma werehon arimanowen hit wel heneptuk lit hununuk suwap henebuhup,” ulug Ninikni Allahn ele uruk.

Currently Selected:

ZEFANYA 3: YLI

Highlight

Copy