ZAKHARIA 2
2
Hele o wituk inaben wirim turukon fulu roho yet hibag ane
1Anden fulu roho yet harukmen ap hele o wituk inaben wirim turukon inggikmu senegma yet hihi. 2Yet hihireg anden, ”Kema laruk lahen?” ulug kapal hihimu aren hiyag nutuk lit, ”An o Yerusalem laminteg o pumbuk ino hebeloho wiri fuhup ulug yat toho wirim tuhubon men horog toho wirim tuhubon men wirim hamin,” ulug hiyag nerehek. 3Hiyag nutukmu itano malaikat mun ane man ane seleg toho hiyag nutukon ino an nirahamen we tot hikip toho lahama malaikat eke ambeg waha. 4Wahama malaikat hikip toho lahawon inowen hiyag utuk lit, ”Folo-folo lamihinteg ap kabiniyon hele inggikmu senehon ino hiyag utuk lit, ’Abet wamet anggolo amuhupteg o Yerusalem ino keleg uhup tohon ulug elehet o pumbuk huk toho kilabehon wahup fug. 5Wahup fugmu Ninikni Allah indok ambulpul turuk hag toho turuk lit o Yerusalem fahet elehet hag toho welaruhu. At umbagpag turukon o ino sehelimu welaruhu,’ imihin,” ehek.
Ap o kema-kema hik isibahon suhuloho wamuhup ibag ane
6-7 Ninikni Allahn umalikisi unubam ele uruk lit, ”Anden hit o kema-kema yali fil, hubula fil, ik eleruk fil, ik ambut fil hik-hak hisarik iyag angge famen ketiya hik hisarik iyag ambeg o Babilonia kinang ino embeselug folo-folo o Yerusalem An nantom Sion fam wamuhup,” uruk. 8Ninikni Allah pohol ha kinang ha seneg ahun unuk palimu werehon an mon naptisiyon inowen ap seliyon hit henenggengge huhulangge hilaruson fahet ele uruk lit, ”Ap san hit hunusuruk halug An nilanggen siyahap naptukon hag toho wereg. 9Weregma An ninggik ineyonen it apmayap enebuhukmu ap iren mingming eneptuson arimanowen enenggengge obog toho yoholiyangge hilahup. Ari obog toho teko larukmu yet hahupteg Ninikni Allah pohol ha kinang ha senehon inowen an henembeg mon naptisi angge re honoluk aruhu.
10Hit Yerusalem hinap, An waruhukteg hit sehelimu An nibam ino welaruhuk. Ari fahet henehiyehen henele hi roho yunggultuk lamek! ulug An Hinikni Allahn nele uruk lahi. 11Ari teko lahu li ap o pumbuk anggolo Ninikni Allah apma welamuhuk ulug nambeg wamuhupteg An numalikisi amuhupmu An hit sehelimu welaruhuk,” uruk. Ari teko larukmu yet hahupteg Ninikni Allah pohol ha kinang ha senehon inowen an henembeg mon naptisi angge re honoluk aruhu. 12Ninikni Allahn angginang winon sehelimu o Yehuda kinang eneg indi pulmu emberuk lit nin hebeloho o pumbuk Yerusalem ino mumal tahu.
13Hit honoluk welahebon obog tohowen henele uk fug angge welamok! Ninikni Allah ibamen wilip arik waharuk!
Currently Selected:
ZAKHARIA 2: YLI
Highlight
Share
Copy
Want to have your highlights saved across all your devices? Sign up or sign in
@ LAI 2018
