KEJADIAN 44

Yusuf inowen owesi men suwahal ibag ane

1Nibareg Yusuf inowen at ibam foroho ahun fam ele uruk lit, ”Roti anggen anggolo ap aruman ha roho walug lawon enesum fam hinangguruk lit uang iren og neseheson arimano roti anggen emberimu enesum wal taneg fam fani rimihin. 2Fani rimihinteg an nanggubag ili ruruk angge perak fam wirihon ino it onot ilabowon asum fam uang aren tohon iraham embemihin,” ulug hiyag itfag ane hikit toho tibag. 3Ari tibagma likiyamon o sakan turukmu Yakub umalikisi unubam hinibam lalihip ulug hiyag isibagma enembohom keledai men libag. 4O pumbuk ino wilip atug horogma larukmu Yusuf inowen at ibam foroho ahun fam ele uruk lit, ”Folo-folo mug eneplug lamihinteg it unubam hiyag isa lamihinon tu, ’Nungge fahet niren fano ane hunubam tehema hiren ayeg waroho siyag ane nunubam tehep? 5Ik naruk anggubag an nikniyen fulu roho yet haruk angge ino hiren nungge fahet yoholiyangge hilaruk lit siyag ane tehep?’ ulug hiyag isa lamihin,” ibag.

6Ibagma Yusuf ibam foroho ahun ino Yakub umalikisi mug eneplug libareg Yusuf inowen hiyag itfag ane hikit toho hiyag isibag. 7Hiyag isibagma iren hebeloho hiyag utuk lit, ”Ninikni, nungge fahet ari hag toho hiyag nesehen? Nit hat hamingmingangge welaheyonen haren ehen ane tehe fug ulug we tik-tem toho uruk lahe. 8Uang nenesum fam fani rurusama hiyaharukukon arimano niren o Kanaan kinang famen walug hit hebeloho og hisarukuk angge re nungge fahet niren fano-fano angge perak ano emas ano hat hikni ibam forohowon yoholiyangge hilala? 9Nit sehelimuwon san kubag ino hirako foroho lit weregma hiyahamihin halug at ino war aruhumu nit winon hat hamingmingangge amuhuk,” ulug hiyag itfag. 10Hiyag itfagma ap inowen ele uruk lit, ”Fano ehep. We ap san kubag ino helehekon hiyahamin halug at ino an namingmingangge aruhu angge famen hit winonen siyag ane tehep fug ulug lalihip,” ibag. 11Ari ibagma it wal tanehen folo-folo enesum kinangma imbibareg ele piyat hibag. 12Piyat hibagma Yusuf ibam foroho ahun inowen kubag ino yami rimin ulug Yakub amloho monggiyon asum famen ak tulug ilabowon asum fam pen ha ril libag. Pen ha ril larukmen kubag ino Benyamin asum elma weregma hiyahibag. 13Hiyahibagma Yakub umalikisi arimano inindi siyahen enesum wan teg latfahon tararag isibareg nungge-nungge walug laruk latfag angge nin hebeloho enembohom keledai enemberimu imbik lahibareg it obog toho o pumbuk ino suhuloho libag.

14Libareg Yehuda ori men Yusuf olman uwan wilip am fug angge weregma kibareg at olohotma onorohole han kinangma sahung atfag. 15Sahung atfagma Yusufen ele uruk lit, ”Hiren nungge ulug siyag ane ari tehep? Ap an hahonen fulu roho yet ha reg ulug henepeleg ano?” ulug hiyag isibag. 16Hiyag isibagma Yehuda inowen ele uruk lit, ”Nikni, niren siyag ane tehe fug ulug awiya waruk lit hebeloho uk fug teg lahe. Niren siyag ane teheyon ino Allahn inamap tehekma nit men malik kubag ino hirako foroho lahawon men ambiyeg hat hamingmingangge amuhuk,” ulug hiyag itfag. 17Hiyag itfagma Yusufen ele uruk lit, ”Haren ehenon hikit toho timin fug. Kubag hirako foroho lahawon ino eneg an namingmingangge aruhumu hit winon fano angge hinikni wereg ambeg lalihip,” ulug hiyag isibag.

Yehuda inowen Benyamin ili watfag ane

18Hiyag isibagma Yehuda ino Yusuf iraham libareg hiyag utuk lit, ”Nikni, hat Mesir inap onowe suwon hag toho welahenon, an hat hamingminganggeyen hat hubam nele iminon haren holeg lit an nubam holok hamihin fug. 19Haren nit tam kapal nisaruk lit, ’Hinikni oluk wereg ano? Henere eke wereg ano?’ irikinmu 20niren hiyag hutuk lit, ’Ninikni sabal atisiyon men amloho kabiniyon at sabalonen indag tarisiyon men wereg. Malik ino owe war atisimu isingan indag tarisiyon we at eneg weregma ikniyen at indi anggolo haruk,’ urukuk. 21Urukukmu haren hiyag nisaruk lit, ’An nilen honot ino yet hahuken an nambeg hondoholug wamuhup,’ irikin. 22Irikinmu niren te, ’Malik ino ikni embeselug la fug teg. Lelep halug at ikni war alep,’ ulug hiyag hutukuk. 23Hiyag hutukukmu haren hiyag nisaruk lit, ’Honot ilabowon men ambiyeg wamuhup fug halug hiren an norohole nin suhuloho yet niyahup fug,’ ulug hiyag nisarikin. 24Ari hiyag nisarikinmu nit ninikni ibam suhuloho larukukteg haren hiyag nisarikin ane at hiyag utukuk. 25Welatukukmu ninikniyen hiyag nisaruk lit, ’Nin suhuloho o Mesir lahupteg roti anggen ayeg waroho walug wamuhup,’ ulug hiyag nisarisimu 26niren hebeloho hiyag utuk lit, ’Nit nonot ilabowon men ambiyeg lahuk fug halug Mesir ahun ino orohole yet hahuk fug. Ari fahet nit la fug teg lahe. We Benyamin ino nit men ambiyeg lahuk halug o Mesir lahuk,’ urukuk. 27Urukukmu an nikni hat hamingmingangge inowen ele uruk lit, ’An nuhe Rahel inowen numalikisi piren eneg indag nitisi angge re hit honoluk. 28Namloho misig ino an numbahalug larisi. At ino wam eliyen waroho senggel tarisi irikikteg indamen tulug ketiya oho yet haruk lahi fug. 29Namloho pirenehon ino hiren an nirahamen oko hondoholug lahuk pehep. Ari pehepteg hit kalemma larukmen alem siyahon ubam atep halug hiren an nubam telebon ariyen an noruk hubulu wilip atisi nahun ino nindi angginen war ale,’ irisi. 30Ari irisimu ketiya nit ninibam suhuloho larukmu nit ninikni hat hamingminganggeyen yet nisarukmen malik at indi rehon nit men ambiyeg waharuk elegma yet nisahu halug 31war aruhu. War aruhu ane ari niren tuhukon ariyen ap oruk hubulu wilip atisiyon ino indi angginen war aruhu rohon. 32Ari fahet anden nit ninikni ubam sali emberuk lit, ’Anden malik ino foroho laruhuk. Foroho lit lahukteg anden malik ino hat hambeg suhuloho hondoholug waruhuk fug halug an noluk wereg li alem angginon ari an nubam eneg welaruhu,’ irikik. 33Ari fahet nikni, malik aru ubalma an ninggareg hat hamingmingangge atuk lit tuma welaruhukmu malik aru owesi men inibam lalusan hiyag isamihin. 34Malik aru tuma embeselug nangginoho an nikni ambeg suhuloho lahuk? Ari hag toho waruhukmu alem siyahon an nikni ubam aruhu ane anden yet hahuk tohon,” ulug Yehuda inowen Yusuf hiyag itfag.

Currently Selected:

KEJADIAN 44: YLI

Highlight

Copy