KEJADIAN 42

Yusuf ori o Mesir libag ane

1O Mesir inowen roti anggen palu roho emberuson foroho lit wereg urukmu holfareg Yakub inowen umalikisi unubam ele uruk lit, ”Hit nungge fahet hininggik lebe ruk fug angge welahep? 2#Kis 7:12O Mesir inowen roti anggen wereg urukmu holtikik. Ari fahet nit suburu oboken war amuhuk tohon roti anggen onggo paloho walug wamuhuben o Mesir lalihip,” ulug hiyag isibag. 3Hiyag isibag ane hikit toho Yusuf owesi numen itano roti anggen onggo palik lahuk ulug o Mesir libag. 4Larukmu Yakub inowen Yusuf ot Benyamin ino alem siyahon ubam aruhu rohon ulug wenggel haruk lit lamisi fug ibagma ibam pok atfag. 5Pok atukmu Kanaan kinang fam suburu obok lahibag ane fahet Yakub umalikisi arimano oho it winon roti anggen onggo palik lahuk ulug libahon men o Mesir libag.

6Libag li itano Yusuf inowen Mesir kinang seneg lit ap roti anggen onggo palik lahuk ulug waharuk latfahon obog toho og isaruk latfag. Ari turukmu Yusuf owesi arimano at ambeg watfareg Yusuf alukema kinangma onorohole han sahung atfag. 7Sahung atukmu Yusuf inowen yet isibareg nowesi wahasa ulug oluk atfag angge famen it fahet napeleg hag toho timin ulug ele olok toho unubam uruk lit, ”Hit keman wahep?” ulug kapal isibagma iren, ”Roti anggen palik wahuk ulug o Kanaan kinang famen wahe,” ulug hiyag itfag. 8Hiyag utukmu Yusuf inowen it fahet oluk atfag angge famen iren nonot Yusuf ambeg wahe ulug enepeleg latfag. 9#Kej 37:5-10Enepeleg latfagma Yusuf inowen tam owesi fahet nei waruk latfahon fahet wenggel hibareg it unubam ele uruk lit, ”Hiren kinang aru ilmig tahuken kuk teg ambeg kema wereg ulug aluwat ha wahep,” ulug hiyag isibag. 10Hiyag isibagma iren hebeloho hiyag utuk lit, ”Haren ehenon hikit toho wahe fug! Nit hat hamingmingangge welaheyonen roti anggen palik lahuk ulug wahe. 11Nit waheyon aruma ninikni misihonen ondohowon wahe. Nit nunubabut fano welahereg kinang aru aluwat ha wahe fug,” ulug hiyag itfag. 12Hiyag itfagma Yusuf inowen it unubam ele uruk lit, ”Henele si ane ehep! Kinang aru kuk teg ambeg kema wereg ulug aluwat ha wahep,” ibag. 13Ibagma iren Yusuf hiyag utuk lit, ”Nit hat hamingmingangge ninikni misig o Kanaan werehon ino umalikisi nenebe nisanggowen welahe. Nonot eke eleg atfagma ilabowon ino ninikni men wereg,” ulug hiyag itfag. 14Hiyag itfagma Yusuf inowen hebeloho hiyag isaruk lit, ”Kinang aru aluwat ha wahep ihiyon ino tem toho ihi. 15Alem ari seleg aruhuwen anden wal hisahukon tu: Hit honot ilabowon ino an nambeg waruhu fug halug hit kinang aru embeselug hinibam lahup fuhen anden sen henebuhuk ulug Mesir ninap nonowe suwon olohotma ninggik leho lit we tik-tem toho uruk lahi. 16Ari fahet hit sehelimuwon misig lahureg hit honot tuma hondoholug waruhuwen hiyag itlihip. Hit winon hininggik hele waroho an nambeg weregman eneg at ebe waruhumu anden yet haruk lit hiren nonot eke wereg ehebon ino tem toho urusa puhukteg hit lol henebuhuk angge famen hit honot nambeg waruhu fug halug hit aluwat ha waharikibon ino noluk aruhu ulug Mesir ninap nonowe olohotman we tik-tem toho uruk lahi,” ulug hiyag isibag. 17Hiyag isibareg owesi obog toho penjara ap ininggik hele waroho kilap eneptuk ambeg kilap enepfagma weregman eneg hup piren atfag.

18Hup piren atfagma Yusuf inowen owesi hiyag isaruk lit, ”Anden oho Allah fahet wenggel haruk lahi. Ari fahet hiren an nele irikikon hikit toho turuk lamuhup halug anden hunusuhuk fug. 19Hiren irikibon fahet anden tem toho urusa puhuken hit sehelimuwon misig penjara tu fam embeselug lalihipteg hit honori suburu obok toho werehon enembeg roti anggen walug lalihip. 20Lalihipteg hit honot misig an nambeg hondoholug wamuhupmu anden yet hisaruk lit hiren irikibon fahet tem toho urusa puhukteg hunusuhuk fug,” ulug hiyag isibagma Yusuf ori arimanowen haren hiyag nesehen ane hikit toho turuk lamuhuk ulug hiyag itfag. 21Ari hiyag itfareg it-it enele uruk lit, ”Niren nonot fam siyag ane turukukon ino fahet hebeloho alem siyahon tu nit nunubam aha. Niren at siyahap turukmu indimu akolen hinindi neyemek irisi angge famen niren holtukuk fug. Holtukuk fug ane ariyen nit ketiya siyahap neneptuk,” ibag. 22#Kej 37:21-22Ari ibagma Ruben inowen it unubam ele uruk lit, ”Anden malik aru siyahap tuk fug irikik angge famen hiren an hol niya fug angge ware ferikip. Ware ferikipmu ketiya nit ayeg waroho war amul,” ibag. 23Ari roho uruk lit ap ekeyen hol nisamisi fug ulug Yusuf owesi arimanowen Israel inap enele fam ibag. Yusuf inggarehen Mesir inap enele fam urukmu ap ekeyen Israel inap enele fam hebeltuk lit Yusuf owesi hiyag isibag ane ari fahet iren at fahet nit nenele holtuk eleg pibag. 24Ari pibag angge famen Yusuf inowen iren ibahon obog toho holfareg ambol fil hebeltuk lit uba yatfag. Uba yatfareg nin hebeloho it unubam ele uruk lit ori sehelimuwen Simeon senetfareg it onolohotman inggik hele watfag. 25Ari tibareg Yusuf inowen amingmingangge hiyag isaruk lit, ”Roti anggen it enesum fam hinangguruk lit uang iren an og nereheson oho hebeloho enesum fam fani rilihipteg suburu kalemma laruk lit narukon oho og isalihip,” ulug hiyag isibag ane hikit toho tibag.

26Tibagma Yusuf owesi arimanowen enesum wam keledai fam lahapfareg ninibam lul ulug libag. 27Larukmen o hup atfagma ap ekeyen nambohom suburu og itmin ulug asum ele husoho kim harukmen uang aren tohon roti anggen emberimu weregma kim hibag. 28Kim hibareg ori hiyag isaruk lit, ”Uang anden tohon hebeloho nasum fam fani ruruson aru yet hemek!” ulug hiyag isibagma enekolen unuwag elek-elek angge ruruk lit ekeyen eke fam, ”Allahn nungge ane nit nunubam tehek?” ibag.

29Ari tibareg inikni Yakub ibam o Kanaan kinangma libareg it unubam teko libag ane obog toho hiyag itfag. 30Hiyag utuk lit, ”Mesir inap onowe suwon inowen ele olok toho pet neneptuk lit kinang aru aluwat ha wahep irisi. 31Ari irisimu niren hebeloho hiyag utuk lit, ’Nit we fano ane turuk ninap wereg lit kinang aru aluwat ha wahe fug. 32Nit waheyon ninikni misig umalikisi nenebe nisanggowen welahe. Nonot eke eleg atfagma ilabowon ino ninikni men o Kanaan kinangma wereg,’ ulug hiyag utukuk. 33Hiyag utukukmu ap inowen hiyag nisaruk lit, ’Hit fano ane turuk hinap welahep ano ulug wal hisahukon tu: Hit sehelimuwon misig an men welaruhumu hit winon honori suburu obok toho werehon enembeg roti anggen walug lahup. 34Lahupteg honot ilabowon ino an nambeg hondoholug wamuhupmu anden yet hisaruk lit hiren kinang aru aluwat ha wahe fug irikibon ino tem toho urusa ulug noluk aruhumu henere misig ino lol hisahuk. Lol hisahukmu ap misihen oho hit henele ying heneptuk elehen kinang tu fam aben angge onggo paloho ayeg waroho hilaruk lamuhup,’ irisi,” ulug Yakub hiyag itfag.

35Hiyag itfareg roti anggen sum elman hinanggul ulug turuk lit kim harukmen uang iren tohon enesum wal taneg elma weregma it inikni menen kim hibareg enekol tibag. 36Enekol harukmu inikni Yakub inowen ele uruk lit, ”Hiren tirikip ane ariyen numalikisi longgo uruk. Yusuf ino eleg atfagma Simeon oho elegma ketiya hiren Benyamin ino hondoholug lahuk peruk lahepma an nindi mondabi anggin toho welahi,” ibag. 37Ibagma Ruben inowen ikni fam ele uruk lit, ”Benyamin ino an ninggikmu embemihinmu fobik anden at ebe fano angge hebeloho hambeg hondoholug waruhuk. Waruhuk fug halug haren an numalikisi piren itano unusuhun,” ulug hiyag itfag. 38Hiyag itfagma Yakub inowen ele uruk lit, ”An namloho Benyamin ino hit men ambiyeg lahup fug. At owe Yusuf ino war atfagma he Rahel inowen indag tarisiyon we at eneg wereg. Hit kalemma larukmen Benyamin alem siyahon ubam aruhu halug hiren an nubam telebon ariyen an noruk hubulu wilip atisi nahun ino nindi angginen war ale,” ulug hiyag isibag.

Currently Selected:

KEJADIAN 42: YLI

Highlight

Copy