KEJADIAN 33

Yakub men Esau men nin inindi fano atfag ane

1Welatfagma Yakub inowen orohole leko yet harukmen Esau otsi teng nuwal fumahen 400 men waharukmu yet isibag. Yet isibareg Yakub inowen umalikisi unubam hinisingasi Lea men Rahel men enemingmingangge Bilha men Zilpa men wal toho iniraham in arik lalihip ulug hiyag isibag. 2Hiyag isaruk lit enemingmingangge piren itano unumalikisi men tam lalihip, Lea umalikisi men it onombolim lalihip, Rahel amloho Yusuf men fobik atlihip ulug hiyag isibag. 3Ari hiyag isibareg Yakub inggareg it onolohotma tam laruk lit sabirenam kinangma orohole han ying aheg in aheg turuk lit owe horogma libag. 4Ari turukmu yet hibareg Esau pupu angge Yakub ambeg libareg anggolopne helmako wak libareg uba yatuk lit mako pug toho hi-hi atfag. 5Hi-hi atfareg Esauen hiyap unumalikisi men unduhukmu yet isibareg Yakub fam ele uruk lit, ”It aruma hat men sa-sa wahep?” ulug kapal hibagma Yakuben, ”Numalikisi Allahn an hat hamingmingangge og nutuk latisiyon men wahe,” ulug hiyag itfag. 6Hiyag itfagma Yakub amingmingangge piren itano unumalikisi men Esau alukema watfareg onorohole han kinangma ying atlug Esau hi ribag. 7Hi ribagma Lea umalikisi men oho watfareg kinangma hur atlug Esau hi ribag. Hi ribagma Yusuf isinga Rahel men watfareg ir oho kinangma hur atlug Esau hi ribag. 8Hi ribagma Esauen Yakub fam ele uruk lit, ”Nungge pehenteg ap men wam men itano asan hum toho an nambeg mon enebik wahen?” ulug hinog og hibag. Hinog og hibagma Yakuben, ”Hat an nowe hindi fano atmisi ulug mon enebik wahi,” ibag. 9Ibagma Esauen, ”Anden angge oho anggolo werehen noren og hitmin pehenon ino senetmin fug,” ibag. 10Ibagma Yakuben hebeloho hiyag utuk lit, ”Ari uk fug. Hat hindi fano roho an nolohotma wahenma hat horohole yet hiyaruk lit Allah orohole hag toho yet hiyaruk lahi. Ari fahet an hindi nasug lahenma anden og hirihi angge aru embesemihin fug. 11Allahn indi nasug lit mun angge man angge anggolo og nutuk latisimu anden hi rimin ulug mon enebik wahi angge aruma haren embesemihin fug,” ibag. Ari urukmen warukmen eneg senetfag. 12Senetfareg Esau inowen, ”Hat men an men ambiyeg laruk lamul,” ulug hiyag itfag. 13Hiyag itfagma Yakuben Esau fam ele uruk lit, ”Yu, nowe, haren an men lul ulug hiyag nerehen angge famen an numalikisi unuwag elehen nambohom domba men sapi menen oho ag mondotuk lit werehen we il misihim folo-folo hondog eneplug lul halug wam aruma obog toho war am nowen ulug ninim lul fug. 14Hat tam laruk latmihinmu an fobik nambohom nolohotma larukon men numalikisi an nim laruk laheyon men it unuwag orog-orog laruk ane wirim toho o Edom hondog eneplug wamuhuk,” ulug hiyag itfag. 15Hiyag itfagma Esauen ele uruk lit, ”Ari ehen halug an notsi winon minggiroho hat men embeselug lamin,” ibag. Ibagma Yakuben, ”Ari ulug hiyag nerehen angge famen haren an fahet hindi neyehenma an fahet anggolo wenggel ha fug,” ulug hiyag itfag. 16Ari ulug hiyag itfagma Esau ino o ino sambil eneg ibam o Edom libag. 17Libagma Yakub o Sukot lalug o witfareg ambohom nohoruk ambeg oho witfag. Witfag ane ari hikit toho o ino Sukot suwalfag.#O unuk Sukot ino nit nenele fam nohoruk ambeg uruk.

18Yakub ino o Mesopotamian wilip atfareg alem eke hag eke hag ubam am fug angge o Sikhem Kanaan kinangma libareg o ino yali fil o sabo witfag. 19#Yos 24:32; Yoh 4:5Kinang o sabo witfag ambeg ino onggo uang perak teng uhan 100 hun Sikhem ikni Hemor inowen ondohowonen endetfahon unubam og isibag. 20Og isibareg o inowen Allah fahet hubu lahaptuk ambeg ulug helep sengget watfareg unuk ”Allah nit Israel ninap Ninikni wereg ambeg” suwalfag.

Currently Selected:

KEJADIAN 33: YLI

Highlight

Copy