KELUARAN 6

Israel inap o Mesiren hondog eneplug lahup ulug Allahn Musa men Harun men mon enepfag ane

1O misihim sambil Allahn nin eke Musa fam ele uruk lit, ”An Hikni Allah inowen nele aru hubam uruk lahi: 2An Allah Abraham, Ishak, Yakub men onolohotman ebenam atuk lit, ’An nunuk Hinikni welahi,’ ulug fag toho hiyag isarik iyag fugmu iren Allah ine anggolowon nenembeg waha ulug wenggel haruk latfag. 3#Kel 3:13-15An ebenam atuk li itano nele hiyag isaruk lit, ’Kinang Kanaan aru fam hit ap pohon hag toho welahep angge famen hit fobik ngi amuhuben hiyag hisahuk,’ ulug sali emberuk latik iyag. 4Ketiya Mesir inaben Israel inap ininggik lisoho emberukmu enele hum toho uba yatukon Anden hol isaruk lit sali imbiyahon hikit toho tuhuk ulug wenggel haruk lahi. 5Ari ulug wenggel haruk lahireg An nele aru Israel inap hiyag isa lahun, ’An Hinikni Allah welahiyon inowen Mesir inaben yabuk wiriyek ulug hit mingming heneptukmu ininggikmuwen windat henebuhuk. An ninggik ineyonen Mesir inap unubam alem angginon ekeyon-ekeyon emberuk lit hit tel henebuhuk. 6An hit Hinikni aruhukmu hit An numalikisi welamuhup. Anden hit Mesir inap ininggikmuwen windat henebuhuk halug hit hinindimuwen An nubahet Allah Ninikni wereg ulug honoluk aruhu. 7Anden Abraham Ishak Yakub men unubam, ’Kinang Kanaan we tik-tem toho hiyag hisahuk,’ ulug sali imbiyag ambeg ino hondog heneplug lahukteg ngi roho welamuhuben hiyag hisahuk. An Hinikni Allahn nele aru ihi,” ulug Musa hiyag itfag. 8Ari ulug hiyag itfag ane Musa inowen Israel inap unubam hiyag isibag angge famen Mesir inaben yabuk angginon wiriyek ulug mingming eneptukmu sat toho warukmen eneg fano amuhuk fug ulug inindi anggin atuken hol hibag fug.

9Hol hibag fugmu Ninikni Allahn Musa fam ele uruk lit, 10”Mesir inap onowe ambeg lamihinteg Israel inap Mesir kinang embeselug lahuben hele hiyag itmihin,” ibagma 11Musa inowen, ”Nori Israel inaben an nele fuki roho holtuk eleg angge re Mesir inap onowe inowen nangginoho nele holuk teg? Anden nele ine roho uk fug teg lahi,” ibagma 12Ninikni Allahn Musa men Harun men hiyag isaruk lit, ”Israel inap Mesir kinang famen hondog eneplug lahup ulug mon heneptuk lahi ane fahet hiren Israel inap men Mesir inap onowe suwon men hiyag isa lalihip,” ulug hiyag isibag.

Musa men Harun men unumbasi fahet ibag ane

13Musa men Harun men unumbasi ununuk tuma ul: Yakub amloho monggiyon Ruben umalikisi Henokh, Palu, Hezron, Karmi men welatfag. It arimanowen Ruben inap ununggul unuk wal taneg werehon ondoko laruk latfag. 14Yakub amloho Simeon umalikisi Yemuel, Yamin, Ohad, Yakhin, Zohar, Saul men welatfag. Saul ino o Kanaan hiyap ekeyen Simeon indag itfag. It arimanowen Simeon inap ununggul unuk wal taneg werehon ondoko laruk latfag. 15Yakub amloho Lewi umalikisi ununuk suwesingga fam haharoho imbibahon Gerson, Kehat, Merari men welatfag. Hun Lewi indag tibag sali mo ilig am wirig am turukmen teng fuwaben nubam hilag piren 137 atfagma war atfag. 16Gerson umalikisi Libni men Simei menen ununggul unuk wal taneg werehon ondoko laruk latfag. 17#Bil 3:17-20, 26:57-59; 1Taw 6:16-19, 23:13Kehat umalikisi Amram, Yizhar, Hebron, Uziel men welatfag. Hun Kehat indag tibag sali mo ilig am wirig am turukmen teng uhanen nubam hilag hinahaneg fiman 133 atfagma war atfag. 18Merari umalikisi Mahli men Musi men welatfag. Hun Lewiyen ondohowonen ondohowon ununggul unuk wal taneg werehon arimano suwesingga fam haharoho imbibag.

19Lewiyen ondohowonen ondohowon Amram inowen ikni erek Yokhebed hilibag. Yokhebed inowen Harun men Musa men indag itfag. Hun Amram indag tibag sali mo ilig am wirig am turukmen teng fuwaben nubam hilag piren 137 atfagma war atfag. 20Lewiyen ondohowonen ondohowon Yizhar umalikisi Korah, Nefeg, Zikhri men welatfag. 21Lewiyen ondohowonen ondohowon Uziel umalikisi Misael, Elsafan, Sitri men welatfag. 22Harun inowen Aminadab ahaloho Eliseba hun Nahason erek ino hilibag. Eliseba inowen Nadab, Abihu, Eleazar, Itamar men indag itfag. 23Hun Korah umalikisi Asir, Elkana, Abiasaf menen ununggul unuk wal taneg werehon ondoko laruk latfag. 24Harun amloho Eleazar inowen hun Putiel ahaloho eke hilibag. Hiyap inowen Pinehas indag itfag. It eheyon arimano hun Lewiyen ondohowonen ondohowon ununggul unuk wal taneg werehon obog toho ehe.

25Harun men Musa men ununuk eheyon unubam Ninikni Allahn ele uruk lit, ”Israel inap asan wal taneg werehon iraroho hondog eneplug o Mesir kinangman wilip amuhup,” ulug hiyag isibag. 26Hiyag isibagma Israel inap o Mesir kinangman hondog eneplug wilip amuhuken hiyag nisamisi ulug Mesir inap inikni suwon ambeg libareg ubam enele hiyag utuk latfag. Enele hiyag utuk latfahon Musa men Harun men unumbasi ununuk obog toho palimu ehe.

Mesir inap onowe henele hiyag irik lalihip ulug Allahn Musa men Harun men hiyag isibag ane

27Musa o Mesir weregma Ninikni Allahn at ubam ele uruk lit, 28”An Hikni Allah welahiyonen hat hubam nele uruk lahi ane il misig oho umbusuk fug angge Mesir inap onowe suwon hiyag irik lamihin,” ibagma 29Musan hebeloho hiyag utuk lit, ”An nele ine roho uk fug teg lahireg Mesir inap onowe inowen nangginoho nele holuk teg?” ulug hiyag itfag.

Currently Selected:

KELUARAN 6: YLI

Highlight

Copy