KELUARAN 16

Israel inap Allahn suburu manna men suwe puyuh yalma hahon men og isaruk latfag ane

1Israel inap obog toho o Elimen wilip atfareg o Elim honggoleg tom Sinai honggoleg o Sin lekma libag. O Mesir embeselug larukmen pikalem misig atfareg hup nuwal fuman atfagma o Sin ino libag. 2O Sin libareg Musa men Harun men unubam enele siyag toho uruk lit, 3”Ninikni Allahn o Mesiren nunuselepma war ala fano. O Mesir wereg lit suburu men wam men nenehum ouk toho naruk latukuk angge famen suburu oboken war amag ulug hiren tuma hondoko nunumbahik waharikip,” uruk latfag.

4 # Yoh 6:31 Ari urukmu Ninikni Allahn Musa fam ele uruk lit, ”Ketiya Anden naruk angge anggolo poholman osit hag toho hit obog toho fahet pilabik waharuk laruhuk. Hup misihim narukon fahet likiya hupmu naruk angge Anden pilabik waharuk laruhukon arimano palu ruruk lamuhup. Ari roho turuk laruhukmu An nele fano holuhup ano ulug wal hisaruk laruhuk. 5O falfaliken angge hup pirenam narukon wirim toho palu ruruk lamuhup,” ulug hiyag isibag.

6Ari ulug hiyag isibagma Musa men Harun menen Israel inap unubam enele uruk lit, ”O yoho hupmu Ninikni Allahn o Mesiren hondog neneplug wilip atisiyon fahet honoluk atmisi. 7Niren Ninikni Allahn hiyag nisaruk ane hikit toho turuk laheman hiren pet neneptuk lahebon ari Ninikni Allah ubam uruk lahep. Ari roho urukmu Aren hol harisireg o sono likiya ebe umbagpag toho waharukmu hiren yet hahup. 8Ninikni Allahn hiren suwahal ubam urukmu hol harisireg hupmu suwe unu og heseheg hubet suburu roti og heseheg turukmu henehum ouk toho naruk lamuhup. Hiren nit nunubam suwahal uruk lahebon ari nit nunubam uruk lahep fug. We Ninikni Allah ubam uruk lahep,” ulug Israel inap hiyag isibag.

9Hiyag isibagma Musa inowen Harun fam uruk lit, ”Israel inaben enele siyag toho urukon ino Ninikni Allahn hol harisimu Ninikni Allah olohotma wamusan obog toho wol enepmihin,” ibag. 10Ari ibagma Harun inowen ele hiyag isarukmu Israel inaben hebeloho lek fil yet harukmen Ninikni Allah hina seheli ke ebe umbagpag toho waharuk latfag. 11Watfareg Ninikni Allahn Musa fam ele uruk lit, 12”Israel inaben enele siyag toho urukmu hol harikik. Ari fahet Israel inap unubam hiyag isamihinon te, ’Hupmu suwe unu nalihipteg sono hubet suburu roti nahupmu henehum ouk amuhup. Henehum ouk amuhup halug An Hinikni Allah welahiyon fahet honoluk aruhu,’ ulug hiyag isamihin,” ibag.

13Ari ibagma hupmu itano suwe puyuh yalma hahon ilang anggolo roho waharuk lit o sabo Israel inaben wirihon owahalem ke hondo ribag. Hondo ribagma noholug likiya inibam o sabo walinggoho hibilil wambik watfag. 14Wambik watfareg ahe laharukmu kinang pali ke soho anggen hahon sako angge wereg latfag. 15#1Kor 10:3Israel inaben yet harukmen wereg latfagma, ”Yihi, ari indam oho yet harukuk fug angge nungge haruk lahe?” ulug it-it enele uruk latfag.

Ari urukmu Musa inowen hiyag isaruk lit, ”Ari naruk angge Ninikni Allahn hit fahet og hesehekon wereg. 16Ninikni Allahn ele uruk lit, ’Hinibam wal taneg iniknisi werehonen hinibam ap enebe werehon fahet nila peruk ane hikit toho sum misig-misig andog turuk lamuhup,’ irisi,” ulug hiyag isibag.

17Hiyag isibag ane hikit toho Israel inaben andog turuk lit winonen te tor angge andog turukmu winonen te su roho andog tibag. 18#2Kor 8:15Andog tibahon arimano wirim harukmen su roho andog tibahon arimano anggolo atfag fugmu tor angge andog tibahon arimano tor am fug angge weregma enebe wal tanehen nila peruk ane hikit toho andog tibag. 19Ari roho andog tibagma Musa inowen hiyag isaruk lit, ”Andog tehep angge aruma ap misihen oho sono nahukon ulug umbuk fug,” ibag angge famen 20Israel inap winonen Musan hiyag isibahon holuk fug angge sono nahukon ulug imbibag. Imbibahon arimano likiya kim harukmen amben turuk lit sobonanggen kibagma Musa ino indimu it unubahet het-pet hibag. 21Eke sambil eke sambil likiya Israel inap wal tanehen nila peruk ane hikit toho naruk angge arimano palu ruruk latfag. Naruk angge palu ruruk latfag fuhon arimano unukoho atikim inahanen il filik angge atuk latfag.

22O falfaliken atuk sambil eneg naruk angge arimano ap wal tanehen sum piren andog toho umbat tibag. Sum piren andog toho umbat tibag ane ari Israel inap onowesi obog tohowen Musa fam hiyag irik libagma 23#Kel 20:8-11Musa inowen, ”Ninikni Allahn irisi ane hikit toho teko laha. Sono o Sabat Ninikni Allah wel tul ulug nininggik lebe ruk fug angge kel tahuk sambil aruhu. Ari fahet o yoho naruk angge arima wiratla perukon wiratuk lit eseta perukon esetuk latlihipmu minggir atukon halug sono nahubon fahet umbat talihip,” ulug hiyag isibag.

24Musan hiyag isibag ane hikit toho naruk angge minggir atfahon arimano sono nahukon ulug umbat tibag. Umbat tibahon arimano filik am fug angge sobonanggen kibag fug.

25Sobonanggen kibag fugmu Musa inowen, ”O yoho Sabat Ninikni Allah wel turuk lit kel taruk sambil ahama naruk angge minggiroho umbat tarikibon arimano nalihip. O yoho naruk angge arimano andog tik lul pelep halug lekma lelepteg elehen helelep fug. 26Hiren naruk angge arimano o falfalikenam eneg palu ruruk lamuhup angge famen o sabiren angge Allah wel tul ulug kel taruk sambil naruk angge arimano poholman wambik waharuk laruhu fug,” ulug hiyag isibag.

27Hiyag isibagma o sabit sambil ino Israel inap winon naruk angge arimano andog tik lul ulug larukmen elehen hilibag fug. 28Hilibag fugmu Ninikni Allahn Musa fam ele uruk lit, ”Anden komo heneptuk ane hiren soptukmen eneg noenam welamuhupteg nele holuhup? 29Anden, ’O Sabat sambil wene uruk lit kel taruk lamuhup,’ irikikon honoluk toho welamuhup! Ari fahet o falfalik sambil ino naruk angge hup pirenam narukon fahet og hisaruk lahi. O sabit sambil ino ap obog toho selma la fug angge inibam welamuhup,” ulug hiyag itfag. 30Hiyag itfag ane ari hikit toho Israel inap arimanowen o sabit sambil ino o yabuk wibuk fug angge kel taruk latfag.

31 # Bil 11:7-8 Naruk angge poholman wambik waharuk latfahon arimano Israel inaben unuk manna suwalfag.#Manna: Unuk ari nit nenele roho ”tu nungge?” uruk (ayat 15 yet hemek). Manna suwalfahon arimano ololom anggen yanggowon hag toho wereg lit kin ahaluwe unduk fanowon hag teg latfag.

32Musa inowen ele uruk lit, ”Ninikni Allahn, ’Naruk angge arimano ap misihen o misihim sambil narukon hikit toho embelihipteg foroho lamuhup,’ irisi. Foroho lamuhubon arimano nunumalikisi fobikonen yet haruk lit Allahn nunumbasi o Mesiren hondog eneplug wilip atfareg lekman naruk angge og isaruk latfahon ulug enehangge kim haruk lamuhup,” ulug hiyag isibag. 33#Ibr 9:4Hiyag isibareg Musa inowen Harun fam ele uruk lit, ”Kubag suburu esetukon wamihinteg naruk angge manna o misihim sambil narukon hikit toho kilabe felug nunumalikisi fobikonen kim haruk lamuhup ulug Ninikni Allah wereg ambeg imbik kimihin,” ibag. 34Ninikni Allahn Musa fam hiyag itfag ane hikit toho Harun inowen kubag eke fam naruk angge arimano kilabe felug peti Allah Wene Numen haharehon kilabeg angge iraham mondabi welamag ulug imbibag. 35#Yos 5:12Naruk angge manna suwalfahon arimano Israel inaben nil-wil larukmen eneg mo teng misig nubam hilag nuwalen 40 atfagma o Kanaan mondabi kibag. (36Naruk angge wirim haruk anggubag hup numenam narukon hikit toho kilabuk teg latfag.)

Currently Selected:

KELUARAN 16: YLI

Highlight

Copy