Lucas 20

Cho mzaa yalnabeyy lo Jesús

(Mt. 21:23-27; Mr. 11:27-33)

1Tub mbizh gorna lee Jesús kaseed re myet lach roo yidoo, zee ngwa re ngwleyy non lo xaa, nu noka ngwa re maestr, nu noka ngwa re xaa gol lo xaa. 2Nu mnabdizh xaa lo Jesús nu nzhé xaa:

—¿Cho mzaa diizh le lu re kwaane? nu ¿cho yalnabeyy nkano lu le lu re kwaane?

3Jesús nzhé lo re xaa:

—Noka na nabdizh tub kwaan lo gu, keb gu kwaan nabdizh na. 4¿Cho xaa mxaal Juan, xaa mchubnis re myet? ¿Che Dios mxaal xaa o re myet?

5Nu lee re xaa mzelo nzhé lo re wechxinn xaa:

—Chelee be yé be lo xaa: “Dios mxaal xaa”, zee né xaa lo be: “¿Chozhiin nambint gu xtizh xaa?” 6Per chelee be yé be lo xaa: “Re myet mxaal xaa”, zee gut re myet be kwaan ke, nel nzak re myet lee Juan nak tub xaa mzaa kwent kwaan nzhé Dios lo lee xaa.

7Zee nzhé re xaa:

—Nanet nu cho mxaal Juan.

8Jesús nzhé lo re xaa:

—Nixa na naniit lo gu cho mzaa diizh le na re kwaane.

Kwent cheen xaa nawent, kanachii yag ub

(Mt. 21:33-44; Mr. 12:1-11)

9Jesús mzaa stub kwent nabix lo re myet nu nzhé xaa:

—Tub welt ngu tub xaabyi, xaa mgaan yag ub tub lach. Nu mzaa xaaya kompani lo stub xaa zee nachii xaaya, zee nya xaa ngu xaa tub yezh zit doo, nu zyen doo liin nya xaa ngu xaa baa. 10Nu gorna mzhin mbizh top xaa yalgon, zee mxaal xaa tub re xmos xaa, zee yaxii xaa re kwaana yizo xaa nak cheena. Per lee re xaa kanachiiya mzaa golp xaa ba, nu nik tub kwaan namzaat xaa lo xaa gorna mbare xaa. 11Lee xaa nak cheena mxaal stub xmos xaa, nu lee re xaa kanachiiya, mzaa golp re xaa nu ned doo mle xaa xaa ne, nu mxaal xaa xaa nya xaa nu nik tub kwaan namzaat xaa lo xaa. 12Nu zeera lee xaa nak cheena mbare mxaal stub xaa ngok yon xaa. Lee re xaa kanachiiya ngune lo xaa nu mseweey xaa xaa, nu mlebi xaa xaa tub lad pa nanzhaant xaa. 13Zee lee xaa nak cheena nzhé: “¿Cho kwaan le na? Nal xaal na mer xgaan na, xaa nkedoola na, xaa nesi ech zon re xaa xtizh xaa.” 14Gorna ne re xaa kanachiiya lo xgann xaa, zee nzhé re xaa: “Xaa ne nak xaa kayaa rese kwaane gorna lee xuz xaa yet. Gut re be xaa, zee gak lach ne cheen re be.” 15Zee mloo re xaa xaa lach pa nzeb yag ub nu mbit re xaa xaa. Lee nal, ¿xomod nzak gu? ¿cho kwaan le xaa nak cheen lach yag ub nal? 16Ya xaa nu gut xaa re xaa kanachiiya, zee zaa xaa lach ub lo stub naz xaa zee nachii xaaya.

Gorna mbin re xaa kwaane, zee nzhé re xaa:

—¡Nanet Dios gak kwaane!

17Lee Jesús mwii lo re xaa nu nzhé Jesús:

—¿Xomod nak kwaan nkee lo Xkyech Dios?

Lee ke kwaan mlebi re xaa nza yoo tub lad,

leeya gak tub ke mas kwaan chul doo,

zob xaa naz skin yoo. [Sal. 118:22]

18Xaa ral ke ne nii tira yech xaa; nu chelee ke ne la yek tub xaa, yidese leya xaa.

19Re xaa fariseo nu re maestr xaa nlu xtizh Dios, nzhekla re xaa zen xaa Jesús, nel mzeen re xaa lee kwent nabix kwaan ngunii Jesús nlu nen xomod nle re xaa. Per nzheb re xaa ne re myet, zee mlaa re xaa Jesús nu nya re xaa.

Yalnabdizh che nkin kix xaa demi lo César

(Mt. 22:15-22; Mr. 12:13-17)

20Tubka nkwaan re xaa nayii ne Jesús tub mod zen re xaa Jesús. Kwaanzee mxaal re xaa myet, xaa mle mod xaa wlipa nkenzha xtizh Jesús nel xaa ne nzhekla keb Jesús tub kwaan nawent, zee nzho mod zaa xaa Jesús lo re xaa nak zhiin. 21Re xaabyi ne nzhé lo Jesús:

—Maestr, nela nu lee re kwaan nlu lu nak kwaan wli, lee lu nak xaa nali lo re myet, nu nali nlu lu xnaz Dios lo re myet. 22¿Che nzhaal kix nu lo xaa kwaan ntop demi kwaan nya naz Roma o nanzhaalt kix nuya?

23Per Jesús nela lee re xaa kakade, zee nzhé Jesús lo xaa:

24—Blu tub demi lo na. ¿Cho yek nkee loya? ¿Nu cho le nkee loya?

Lee re xaa mkeb nzhé:

—Cheen César, xaa nabeyy Roma.

25Zee nzhé Jesús lo re xaa:

—Mbay. Zaa gu lo César kwaan nak xcheen César, nu bzaa gu lo Dios kwaan nak xcheen Dios.

26Nik tub kwaan nawent nanguzhalt re xaa lo re kwaan mseed Jesús. Nu gorna mbin xaa kwaan nzhé Jesús, mdedyall doo xaa zee zheta ngok re xaa.

Jesús mlu lee re xaa ngut roban

(Mt. 22:23-33; Mr. 12:18-27)

27Lee re xaa saduceo nle xgab, lee re myet xaa ngut, nanrobant. Zee ngwa lak xaa lo Jesús, zee nabdizh xaa lo Jesús, nu nzhé xaa:

28—Maestr, Ches mkee lo Xkyech Dios nzhé: “Chelee tub xaabyi, xaa mchelya ngut nu nik tub xinn xaa namlaat xaa, zee lee wech xaa nzhaal chelya kwaan xngwnaa xaa ngut, zee kano xngwnaa xaa mad, zee naluxt dii cheen wech xaa”. 29Tub welt ngu tub xaa nkano xop wech. Lee xaa yilotlaka mchelya, ta ngut xaa. Nu nik tub xinn xaa namlaat xaa. 30Lee wech xaa, xaa nzeke tich xaa, mchelya kwaan lee me, nu noka xaa ne ngut nu nik tub mad namlaat xaa. 31Nu seeka ngok xaa yon. Nu yizasa gaazh xaa mchelya kwaan lee me nu nik tub xaa namlaat mad. 32Nu gwluzhtlaka noka ngwnaa ngut. 33Chol roban re xaa, ¿xana xaa gak xmbyi me, nel yizasa gazh xaa mka me?

34Jesús nzhé lo re xaa:

—Lee re myet xaa yizhyo ne nchelya. 35Per lee re xaa nzhaal roban lo re xaa ngut, nu nya xaa naz yiba, nu baa nachelyatra re xaa. 36Nu nyentra mod yet xaa stub welt, nel mroban re xaa zee gak xaa xinn Dios. Nu gak re xaa kwenta re mandad cheen Dios. 37Nu axta Ches mlu lee re myet roban, gorna mzaa xaa kwent cheen yag kwaan kayek, gorna ngunii Xaa Nabeyy lo xaa nu nzhé xaa: “Lee na nak Dios cheen Abraham, Dios cheen Chak, Dios cheen Kob”. [Ex. 3:6] 38¡Nel Dios nanakt Dios cheen re xaa ngut; nel Dios nak xaa nabeyy lo re xaa mban, nel lo Dios rese myet mban!

39Nu lee tub maestr xaa nlu xtizh Dios, nzhé lo Jesús:

—¡Maestr, wen né lu!

40Nu gorna ngulo mded kwaane, mzheb re xaa nabdizhra xaa lo Jesús.

¿Cho lo dii nak Xaa Xaal Dios Nabeyy?

(Mt. 22:41-46; Mr. 12:35-37)

41Jesús mnabdizh lo re myet nu nzhé xaa:

—¿Xomod nak kwaan mbezh re myet, lee Xaa Xaal Dios Nabeyy yaad naz lo dii cheen David? 42Nel leeka David mkee lo yech cheen Salm nzhé:

Dios, Xaa Nabeyy rese kwaan,

nzhé lo Xaa Nabeyy lo na:

“Zob lad li lo na,

43axtaka chezhin na rese xaa nayii ne lu,

zee kichxub xaa lo lu,

nu zee gak xaa mod tub kwaan zhib lu nii lu tich”. [Sal. 110:1]

44’Leeka David nzhé: “Lee xaa nak Xaa Nabeyy lo na”. ¿Xomod nzho mod yaad xaa dii cheen David nu leeka David mlole xaa: “Xaa Nabeyy lo na”?

45Leezha kaseed xaa re myet zee nzhé xaa lo re xaa mseed lo xaa:

46—Kanap gu gu zee nakadet re maestr xaa nlu xtizh Dios gu, nel re xaa ne nyula doo gak ler chul doo, zee wii re xaa respet lo xaa lo xbi. Nu nkwaan re xaa tub pa non doo zob xaa pa nkasa be nseed be xtizh Dios, nu nkwaan xaa tub pa mas non nzob xaa gorna nyu tub yalni. 47Nu nkiib xaa li re ngwnaa byud. Nu nzhedizhno xaa Dios xchee doo, zee wii re xaa respet lo xaa. ¡Per Dios ted xaa mas gro doo bid!

Currently Selected:

Lucas 20: zpo

Highlight

Copy