Lucas 19

Zaqueo

1Jesús nzha mzeeb yezh Jericó. 2Baa nzho tub xaa rik doo, xaa le Zaqueo, xaa ne nak xaa nabeyy lo re xaa ntop demi kwaan nya naz Roma. 3Zaqueo nzhekla ne lo Jesús; per nyent mod lu Jesús lo xaa, nel zyen doo myet nzhi, nu nel chut doo xaa. 4Zee mrexonn xaa nguner xaa naz delant nu nguxoob xaa lo tub yag kwaan le sicómoro, zee wii xaa lo Jesús gorna ded xaa xan yag ba. 5Gorna mzhin Jesús baa, nu mwii xaa naz lo yag zee nzhé xaa lo Zaqueo:

—Zaqueo, bla baa, nel garli lu kwaz na nalzhe.

6Nu gorzee lejer doo mla xaa, nu nyakdoola xaa mbin xaa lee Jesús kwaz garli xaa. 7Gorna ngune re myet kwaane, mzelo re xaa mkediizh xaaya nu nzhé re xaa:

—Lee Jesús nya kwaan tub xaa nzeeb doo jwalt.

8Zaqueo mzoli nu nzhé xaa:

—Wii Xaa Nabeyy, rol re kwaan nkano na za na lo re xaa prob; nu chelee na mlewann na xcheen stub xaa, tap tant kwaan mkiib na lo xaa zere na lo xaa nal.

9Jesús nzhé lo re xaa:

—Nalzhe lee yalnaban kwaan tira mzhin lo re xaa nzho yoo ne, nel noka lee xaa nak dii cheen Abraham. 10Nel na, Xaa Mzhin Ngok Myet, nzekwaan re xaa mzowen zee za na yalnaban lo re xaa.

Kwent nabix cheen demi

(Mt. 25:14-30)

11Gorna mbin xaa re kwaane, Jesús mzaa tub kwent nabix ne lo re xaa, gorna nzhazhin gaxla xaa Jerusalén, nel lee re xaa nle xgab merla nabeyy Dios lo re myet. 12Zee nzhé Jesús lo re myet:

—Ngu tub xaa non doo, nu mroo xaa nzha xaa zit doo, pa gak xaa tub rey xaa nabeyy, nu zeera bare xaa garli xaa. 13Gorna zeeraka roo xaa, mrezh xaa tub chii xmos xaa, nu mzaa xaa tubga demi or lo re xaa nu nzhé xaa: “Bkano gu demi ne zhiin axta gorna bare na”. 14Per re xaa nabeyy xaa lo nayii ne xaa, nu mxaal re xaa lak xaa nzha yéya lo rey: “Nanzheklat nu gak xaa ne rey cheen nu”.

15Per gorna ngok xaa rey zee mbare xaa nabeyy xaa xkyizhyo xaa. Zee mrezh xaa re xmos xaa, xaa mzaa xaa demi lo, nel nzhekla xaa ne xomod mkano xaaya zhiin. 16Xaa yanertlaka mzhin lo xaa nzhé: “Xaa nabeyy, demi or kwaan mzaa lu lo na nee, mle na gan stub chii demi or”. 17Lee xaa nabeyy nzhé lo xaa: “Xmos na, wen doo mkee lu zhiin nu nali doo mle luya. Nali doo ngok lu lo chepse kwaan mza na lo lu, nu lee nal za na chii yezh nabeyy lu.” 18Lee stub xmos xaa mzhin lo xaa nu nzhé: “Xaa nabeyy, kwaan demi or kwaan mzaa lu lo na, mle na gan stub gaay demi or”. 19Nu nzhé xaa lo xaa: “Nal nza na gaay yezh nabeyy lu”. 20Lee stub mos mzhin nu nzhé: “Xaa nabeyy, lee xdemi lu kwaan mzaa lu lo na, leeya nee. Mlozhaw naya lo tub panit. 21Xaa nabeyy na, ne na lee lu nak tub xaa nakap doo, nu nzhaan lu pa nanakt xleyo lu nu ntop lu yalgon pa nankeet lu goon.” 22Lee rey nzhé lo xaa: “Leeka kwaan xtizh lu kwaan ngunii lu lo na, naab na kwent lo lu; lu nak tub xaa mal. Néla lu lee na nzhaan pa nanakt xleyo na nu ntop na yalgon pa naket na goon. 23¿Chozhiin nangoot lu xdemi na bank? Zee gorna ngbare na, ngzaa lu xdemi na kwaan mza na lo lu, nu ngzaa lu xinna kwaan mleya gan lo na.” 24Zee lee xaa nabeyy nzhé lo re xaa nzhi lo xaa: “Bkiib gu demi or lo xaa ne nu bzaa guya lo xaa nkano chii demi or”. 25Nu lee re xaa nzhé lo xaa: “Xaa nabeyy, nkanola xaa chii demi or”. 26Per lee xaa nabeyy mkeb nzhé: “Lee na nii lo gu: Nel xaa nkanoya zaa xaa masraya lo xaa, nu axta nzhobre zaa xaaya lo xaa. Per lee xaa kwaan nankanota axta chep kwaan nkano xaa yiib lo xaa. 27Teno gu re xaa nanzheklat gak na rey lo, nu bit gu xaa lo na nee.”

Jesús mzeeb leen yezh Jerusalén

(Mt. 21:1-11; Mr. 11:1-11; Jn. 12:12-19)

28Gorna ngulo mzaa xaa kwent ne, zee nzha xaa naz Jerusalén. 29Gorna lee Jesús nzhazhin gax rop yezh kwaan le Betfagé nu Betania, gax yi le Olib, mxaal xaa chop xaa mseed lo xaa. 30Nu nzhé xaa lo rop xaa:

—Gwa gu yezh kwaan nzhi gax nee, nu baa yizhal tub burr ma nkadoo lo gu, ma nik tub xaa zer zob tich. Xek gu ma nu yaadno gu ma nee. 31Chelee nzho cho nabdizh lo gu nu né xaa lo gu: “¿Chozhiin kaxek gu burr ba?” yé gu lo xaa: “Xaa Nabeyy nkin ma, nu zeera bare nu yiidlaa nu ma”.

32Lee rop xaa kwaan mxaal Jesús nzha, nu nguzhal xaa burr kwentaxa nzhé Jesús lo rop xaa. 33Gorna lee xaa kaxek ma, lee bixwann burr mnabdizh lo xaa:

—¿Chozhiin kaxek gu xburr na?

34Lee rop xaa mkeb nzhé:

—Nel Xaa Nabeyy nkin ma.

35Zee mbe xaa ma lo Jesús. Nu mzhib xaa xab xaa tich ma, zee mzob Jesús tich ma. 36Nu gorna nzhaded Jesús lee re myet mbek xab leen naz. 37Nu gorna nzhakato xaa xan yi Olib, lee re myet kwaan nzhake tich xaa mzelo mbill dublegan lo Dios nu mzaa re xaa dixkix lo Dios kwent cheen rese kwaan gro doo kwaan ngune xaa mle Jesús. 38Nu mbezh re xaa:

—¡Goll be lo xaa nze kwaan yalnabeyy cheen Xaa Nabeyy! ¡Wen kwi re xaa leen yiba nu gool re be lo xaa nzob naz yiba!

39Lee lak fariseo nzo lo re myet nzhé lo Jesús:

—Maestr, bgalno re xaa nzeke tich lu.

40Per lee Jesús nzhé lo xaa:

—Lee na nii lo gu, chelee re xaa ne saaw roo lee re ke wdizh.

41Leezha mzhin Jesús gaxla Jerusalén, mbinn xaa gorna mlu yezh lo xaa. 42Nu nzhé xaa:

—¡Oj chol ne re gu xaa Jerusalén, nalzhe nzho mod kwi wen gu, per lee nal mkaxlaan Dios re kwaane lo re gu! 43Mzhin gaxla re mbizh lee re xaa nayii ne lu dil kwaan lu, nu dub welt lo lu kwi re xaa. 44Telisa lux xaa lu kwaan re xinn lu, nu nik stub ke nalaketra tich sa ke ke, nel nangunet lu mbizh kwaan mbiid Dios lo lu.

Jesús mtexonn re myet xaa nto lach roo yidoo

(Mt. 21:12-17; Mr. 11:15-19; Jn. 2:13-22)

45Jesús mzeeb lach roo yidoo, nu mloo xaa re xaa nzi nu re xaa nto naz jwer. 46Nu nzhé xaa lo re xaa:

—Nkeela lo Xkyech Dios nii: “Li na nak yoo pa wdizhno rese xaa Dios” [Is. 56:7; Jer. 7:11]; per gu mleya kwenta tub pa nzho wann.

47Yizata mbizh mseed Jesús re myet leen lach roo yidoo. Nu lee re fariseo nu re maestr xaa nlu xtizh Dios, nu re xaa non nkwaan re xaa mod gut xaa Jesús. 48Per nangazhaalt mod ngut re xaa Jesús, nel zyen doo myet tubka nzeke tich Jesús nu nzhon xaa re kwaan nseed Jesús re xaa.

Currently Selected:

Lucas 19: zpo

Highlight

Copy